2017-09-24 09:25:05 clouds 27o High | Kigali Rwanda

Dukurikire:
 
 

Mu burezi, ubufatanye bwa Leta n’abikorera ni ngombwa- Perezida Kagame

Yanditswe na IMVAHO NSHYA

Kuya 2017-07-05 14:00:42

 
Share on:
 
Yasuwe:177
 
Yavuzweho:200
 
10
 
10

Perezida Paul Kagame atangaza ko igihe urubyiruko rworoherejwe kubona uburezi bujyanye n’igihe, hakabaho ubufatanye hagati ya za leta n’abikorera, impande zombi zungukira mu mpano z’urwo rubyiruko zitandukanye, kuko n’abikorera bakenera abarangije kaminuza.

Ibi Umukuru w’Igihugu Paul Kagame yabivuze ejo hashize ku wa 5 Nyakanga 2017 mu nama ibera mu Rwanda ihuje abahanga n’abahagarariye za kaminuza zitandukanye zo muri Afurika, yateguwe na “SDGCA Africa” ifite icyicaro mu Rwanda.

Muri iyi nama, Perezida Kagame yibanze ku kugaragaza akamaro k’uburezi no guharanira uburezi kuri bose, ndetse n’ubufatanye mu burezi hagati ya za leta z’Afurika n’abikorera.

Yagize ati “Nitworohereza urubyiruko kubona uburezi bujyanye n’igihe, twese tuzungukira mu mpano zabo zitandukanye”. Yongeyeho ko inshingano ari ugukorana mu gushyiraho uburyo bworohereza urubyiruko kubona uburezi bubabereye. Ati “Kugera ku burezi twifuza bishingiye ku buryo tuzakomeza gushyira hamwe imbaraga zacu, tugakorana mu nzego zose.”

Paul Kagame yavuze ko hagomba gukomeza gushakwa uburyo bwo kubona ubushobozi bukenewe binyuze mu bufatanye n’abikorera. Ati “Gukorana bidufasha kandi kungukira mu mahirwe ahari y’inkunga zishyigikira ireme ry’uburezi […] Ubushobozi bwose zaba zifite, leta nta cyo zageraho zonyine. Uruhare rwa buri wese ni ngombwa.”

Akaba yabwiye abari aho ko urubyiruko rwa Afurika rwo ruhari, rwiteguye kandi rurashaka gukoresha neza amahirwe ahari mu burezi.

Umukuru w’Igihugu yavuze ko uruhare rwa za leta mu gushyiraho politiki z’uburezi no kubutera inkunga rugomba gukomeza. Ati “Tugomba guhora twibuka ko uburezi busaba ishoramari rihamye kandi inyungu yabwo igatinda.”

Perezida Kagame yakomeje gushimangira ubufatanye hagati ya za Leta n’abikorera, avuga ko ari ngombwa kuko abikorera nabo bakenera ubumenyi bw’abarangiza mu mashuri makuru na za kaminuza, kandi avuga ko abahungu n’abakobwa nibakomeza guhabwa amahirwe angana mu burezi, abakozi Afurika ikeneye bazaboneka vuba.

Yashimye intambwe imaze guterwa mu burezi, avuga ko ari ngombwa kwibutsa intambwe imaze guterwa kuko yerekana ko bishoboka. Gusa ntibihagije kugira ngo Afurika igere aho ishaka, kuko ngo ikeneye abarangiza kaminuza benshi bafite ubumenyi n’ubushobozi bituma bafasha mu guteza imbere ibihugu.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE