2017-11-23 18:23:19 clouds 27o High | Kigali Rwanda

Dukurikire:
 
 

Rubavu:Abayoboke ba ADEPR barishimira ibyo bagezeho mu myaka 7

Yanditswe na IMVAHO NSHYA

Kuya 2017-07-05 07:19:08

 
Share on:
 
Yasuwe:61
 
Yavuzweho:200
 
10
 
10

Abayoboke b’itorero ry’abapentekote mu Rwanda (ADEPR) mu karere ka Rubavu, barashimira Imana kubera ibyiza u Rwanda rumaze kugeraho, by’umwihariko ibyo ubuyobozi bw’igihugu bwatumye bageraho muri iyi myaka 7 ishize.

Aba barokore bavuga ko mu byo bishimira harimo iterambere bavuga ko ryagezweho kubera imiyoborere myiza, umutekano n’ubwisanzure bwa buri muntu mu gihugu.

Mu giterane cyahuje abayoboke b’iri torero, abaturage n’abayobozi mu nzego z’ubuyobozi bwite bwa Leta, bashimye ibyagezweho mu myaka 7 ishize u Rwanda ruyobowe na Perezida wa Repubulika Paul Kagame, ndetse banaragiza Imana amatora y’Umukuru w’igihugu, n’ibindi bikorwa biteganyijwe mu Rwanda mu minsi iri mbere.

Iki giterane cyitabiriwe n’abakirisitu bo mu itorero ADEPR baturutse mu maparuwasi atanu n’abandi batuye mu Karere ka Rubavu bo mu yandi matorero n’amadini, cyaranzwe no gusangira ijambo ry’Imana, amasengesho n’indirimbo zihimbaza Imana, hashimwa Imana kubera imiyoborere myiza iri mu Rwanda, n’ibyiza abanyarwanda bagezeho mu myaka 23 ishize u Rwanda rubohowe.

JPEG - 281.4 kb
Umuyobozi w’akarere ka Rubavu Sinamenye Jeremie yifatanyije na ADEPR mu gishima Imana

Reverend Pasteur Nsonera Lazare, umushumba w’iri torero, yagize ati “Mu by’ukuri ibyo twagezeho muri iyi myaka irindwi gusa navuga ko byikubye kabiri ibyo twagezeho mu myaka yose iyi paruwasi imaze ishinzwe, kuko muri iyi myaka itatu gusa ishize twari dufite urusengero rwakiraga abantu 300 gusa, none ubu twabashije kwiyubakira aho dusengera twisanzuye ni ukuvuga urusengero rubasha kwakira abantu 2000.

Amashuri yikubye kabiri, twubatse ikigo nderabuzima, twigishije abatazi kubara gusoma no kwandika basaga ibihumbi 10, abayoboke bacu hafi bose bafite ubwisungane mu kwivuza, n’ibindi ku buryo ibyo byose tubikesha impanuro nziza na gahunda nziza bya Perezida Kagame.”

Yifashishije ijambo ry’Imana, Umuvugabutumwa Singirankabo Boniface, yagaragarije abitabiriye iki giterane ko badakwiye kwibagirwa aho u Rwanda rwavuye, ahubwo ko bakwiye kuzirikana aho u Rwanda rugeze ubu n’uburyo rwahageze.

Yagize ati “Muzajye mushimira Imana yabahaye ubuyobozi bwiza, ndemeza ko ibyo bakora babikoreshwa n’Imana”

Sinamenye Jérémie, umuyobozi w’akarere ka Rubavu, yashimiye itorero ADEPR uruhare rigira mu iterambere ry’akarere ndetse abagaragariza ko ibyagezweho mu Rwanda bituruka ku bufatanye, kujya inama no kunga ubumwe Leta y’u Rwanda yimakaje.

Yagize ati “Turashima ko ibyo tugeraho byose tujya inama namwe, hari ibyo mwagizemo uruhare kandi tuzahora dufatanya.”

Igiterane nk’iki cyo gushima Imana ibyiza u Rwanda rwagezeho mu myaka 23 ishize rubohowe ndetse no gusengera amatora y’Umukuru w’igihugu ateganyijwe mu Rwanda muri Kanama 2017 kizakomereza no mu yandi maparuwasi agize aka Karere.

MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE