2017-12-11 14:03:29 clouds 27o High | Kigali Rwanda

Dukurikire:
 
 

Kwibohora 23: Kagame yanenze abivanga mu matora y’u Rwanda

Yanditswe na IMVAHO NSHYA

Kuya 2017-07-05 05:35:47

 
Share on:
 
Yasuwe:516
 
Yavuzweho:200
 
10
 
10

Perezida Paul Kagame yamaganye abahagarariye ibihugu byabo mu Rwanda bivanga mu mitegurire y’amatora mu Rwanda, avuga ko badakwiye gusimbura Komisiyo y’Igihugu y’Amatora.

Ibi Perezida Paul Kagame yabigarutseho mu kiganiro cyanyuze imbona nkubone kuri Radiyo na Televiziyo by’u Rwanda, cyatambutse ku mugoroba w’ejo hashize ku wa 4 Nyakanga 2017, cyibanda ku kwibohora ku nshuro ya 23.

Ubwo yabazwaga ku bahagarariye ibihugu byabo mu Rwanda bivanga mu matora, aho basaba Komisiyo y’Igihugu y’Amatora ubusobanuro nyuma yo kuba bamwe mu bakandida ku mwanya wa Perezida wa Repubulika batujuje ibisabwa bakajyana ibibazo byabo ku bahagarariye ibyo bihugu, Perezida Kagame yavuze ko n’iyo haba hari ibitagenda, buri wese wese agomba kumenya aho agarukira.

Yagize ati “Abahagarariye ibihugu byabo mu Rwanda ntibagomba gusimbura Komisiyo y’Amatora. Tugomba kuyireka igakora akazi kayo […] Nta bwo Komisiyo y’Amatora ikora akazi kayo kuko ibibwirijwe n’Umuryango w’Ubumwe bw’u Burayi.”

JPEG - 160 kb
Perezida Paul Kagame ubwo yari mu karere ka Nyabihu, ageza ijambo ku Banyarwanda, yagaragaje ko ubu nta gikwiye kuzitira Abanyarwanda mu iterambere

Umukuru w’Igihugu yakomeje avuga ko ikibabaje ari uko usanga abivanga mu matora hano mu Rwanda ari bo babirwanya iwabo ko hari uwabivangira mu matora. Akaba yarakomeje agira ati “Hari nubwo ubona bageze aho batekereza ko bagomba kugira ijambo ku batsinda amatora n’abayatsindwa!”

Akaba yaravuze ko kuba abahagarariye ibihugu byabo mu Rwanda bahamagaza abiyamamaza kujya kwisobanura ari ibintu abantu badakwiye kwemera.

Muri iki kiganiro, Kagame yanavuze ku myitwarire y’aba banyamahanga banenga u Rwanda ku bwisanzure, ko babikora bari iwabo ndetse n’iyo bari mu Rwanda, maze avuga ko iyo mu Rwanda haza kuba nta bwigenge bwa politiki buhari, abagize uruhare muri Jenoside yakorewe Abatutsi bataba babana n’abo bahemukiye. Ati “Umuntu ashobora kwicara mu mahanga ya kure akatuvuga uko ashaka, ariko ni twe tubaho ubuzima bwacu uko tubushaka.”

Kagame yishimiye kugira uruhare mu byo u Rwanda rwagezeho

Mu myaka 23 ishize u Rwanda rubohowe, Perezida Paul Kagame yavuze ko hatewe intambwe urebye aho igihugu kivuye, avuga ko mu kwibohora hakozwe byinshi.

Ati “U Rwanda rwateye intambwe idasanzwe, kandi nishimiye kubigiramo uruhare, natanze umusanzu wanjye, kandi nizera ko ibintu bizakomeza kugenda neza, gukomeza gutera imbere, ni byo twiteze.”

Yavuze ko abazi u Rwanda mbere y’uko rubohorwa, iyo barubonye ubu babona impinduka zidasanzwe.

Ati “Twakoze neza, twarakoze cyane, ariko ntitwakoze ibihagije, haracyari abakene mu byaro, ntiturihaza…”

Yavuze ko abakiri bato, bafite imyaka 23 kumanura, ko bakwiye kubwirwa ibyabaye mu Rwanda mu rwego rwo kubaka ejo hazaza heza, kuko bo batikoreye umuzigo w’ibyo igihugu cyanyuzemo, bityo amateka bumva ya Jenoside yahitanye abantu, ibyo babwirwa, bikwiye kubafasha kubaka ejo hazaza, bakumva ko nta muntu ukwiye kongera kwamburwa ubuzima.

Umukuru w’Igihugu yanavuze ko kwibohora bikubiyemo ibintu byinshi, harimo kwikiza politiki mbi ndetse n’abayobozi babi. Gusa, ngo kubakuraho ntibihagije, ubu igihugu kirahangana n’ingaruka zabo, hari urugamba rwo kurwanya ubukene, abantu bagomba gutera imbere, imibereho igahinduka.

Kagame akaba yaravuze ko intego ari uko nta bayobozi babi bazongera kubaho mu Rwanda, cyangwa se ikintu cyose cyasubiza u Rwanda mu byo rwanyuzemo. Ati “U Rwanda ni igihugu cyacu, reka tucyubake”.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE