2017-10-18 18:43:44 clouds 27o High | Kigali Rwanda

Dukurikire:
 
 

Ngoma: Abaturage basaga ibihumbi 5 bazahabwa amashanyarazi muri 2017-2018

Yanditswe na IMVAHO NSHYA

Kuya 2017-07-04 06:55:27

 
Share on:
 
Yasuwe:150
 
Yavuzweho:200
 
10
 
10

Ubuyobozi bw’ikigo gishizwe gukwirakwiza amashanyarazi EUCL, ishami rya Ngoma buratangaza ko muri uyu mwaka wa 2017-2018, abaturage basaga ibihumbi 5 bagiye guhabwa umuriro w’amashanyarazi, ku bufatanye n’umushinga w’ababiligi.

Abazatangirirwaho guhabwa amashanyarazi ni abo mu mirenge ya Murama, Rukira, Kibungo, Kazo, na Mutenderi, itanu muri 14 igize akarere ka Ngoma.

Bamwe mu batuye muri iyo mirenge batangarije Imvaho Nshya ko bashimira ubuyobozi bw’u Rwanda burangajwe imbere na Perezida wa Repubulika Paul Kagame, bugiye kubagereza amashanyarazi aho batuye mu cyaro, ibi bikaba bigiye kwiyongera ku rindi terambere bagezeho, byose babikesha imiyoborere myiza.

Sikuzani Faustin wo mu murenge wa Mutenderi, mu kagari ka Muzingira yagize ati “Iterambere ubu twarigezemo, ubu amashanyarazi twizeye ko tugiye kuyabona kuko amapoto yo bari kuyashinga turayabona.Ku iterambere twari dufite ry’ubuhinzi n’imihanda, hagiye kwiyongeraho n’amashanyarazi.

JPEG - 391.8 kb
Mu mwaka 2017-2018 abaturage basaga 5000 bagiye guhabwa amashanyarazi ( Foto Manishimwe N)

Twizeye ko amashanyarazi natugeraho, iterambere ryacu riziyongera kuko akazi kaziyongera, n’urubyiruko ruzabona imikorere, abogosha, abazana ibyuma bisya,… hazahita haba umujyi rwose.”

Niyonkuru Bénoit, uyobora ishami ry’ikigo gikwirakwiza amashanyarazi EUCL ishami rya Ngoma, avuga ko ubu ikiri gukorwa ari ukugeza amapoto ku miyoboro izanyuzwaho amashanyarazi, kandi biteganyijwe ko mu gihe cy’umwaka umwe abaturage barenga ibihumbi 5 batuye mu mirenge 5 yo mu karere ka Ngoma, bazaba bamaze guhabwa amashanyarazi; ku bufatanye bwa Leta y’u Rwanda n’umushinga w’ababiligi.

Uyu mushinga uzatanga amashanyarazi ku miyoboro ireshya n’ibirometero bisaga 190, akazaba afite ingufu zishobora no gukoresha inganda ziciriritse.

Nambaje Aphrodise, Umuyobozi w’akarere ka Ngoma, atangaza ko uretse imiyoboro mishya izakorwa muri uyu mwaka wa 2017-2018, akarere kihaye n’ intego yo gufatira amashanyarazi ku miyoboro isanzwe, akazagezwa ku baturage bangana na 6.1%.

Yagize ati “Turateganya guha abaturage amashanyarazi dufatiye ku miyoboro isanzwe y’amashanyarazi dufite, tukayageza ku baturage bacu bangana na 6.1%.Ariko uyu mubare uracyari muto, duhamagarira n’abafatanyabikorwa bacu kudufasha muri iyi gahunda, kugera ku ntego igihugu kihaye yuko abaturage bacu bafite amashanyarazi bagera nibura 70% muri uyu mwaka wa 2017.”

Ubuyobozi bw’akarere ka Ngoma butangaza ko kugeza ubu abaturage bagerwaho n’amashanyarazi muri aka karere bari ku gipimo cya 31%.

Meya Nambaje avuga ko mu ngamba akarere kiyahe, harimo no gushishikariza abaturage gukomeza kwitabira gukoresha ingufu z’amashanyarazi akomoka ku mirasire y’izuba, ku buryo nibura imiryango irenge ibihumbi 2 izabona izo ngufu muri uyu mwaka wa 2017-2018.

Ibivugwa n’akarere ka Ngoma kuri gahunda yo kongera ingufu z’amashanyarazi muri uyu mwaka wa 2017-2018, byumvikanisha ko ushobora kuzasiga igipimo cy’abakoresha ingufu z’amashanyarazi muri aka karere bagera kuri 40%, byanaba ngombwa iri janisha rikarenga, kuko gahunda ari uko buri muturage azagerwaho n’amashanyarazi.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE