2017-09-23 09:22:12 clouds 27o High | Kigali Rwanda

Dukurikire:
 
 

Nyamasheke: Ikiraro cyagwiriye abantu batatu umwe ahita apfa

Yanditswe na IMVAHO NSHYA

Kuya 2017-07-01 15:15:00

 
Share on:
 
Yasuwe:8
 
Yavuzweho:200
 
10
 
10

Abantu batatu bubakaga ikiraro cya Nyamyazi gihuza utugari twa Miko na Gashashi, umurenge wa Karengera mu karere ka Nyamasheke bagwiriwe na cyo umwe ahita ahasiga ubuzima,undi agakomereka ukuguru agahita ajyanwa ku kigo nderabuzima cya Mwezi undi we avamo ari muzima.

Nk’uko Imvaho Nshya yabitangarijwe n’umunyambanga nshingwabikorwa w’umurenge wa Karengera, Cyimana Kinyogote Juvénal , icyo kiraro cyangiritsee bikomeye mu myaka ibiri ishize.

Ubuyobozi bw’aka karere bwafashe icyemezo cyo kubaka ikindi gikomeye kurushaho kubera akamaro kanini gifitiye abaturage b’aka karere kose ka Nyamasheke ndetse n’ab’imirenge ya Bugarama na Muganza y’akarere ka Rusizi, abaturage bakakinyuraho bajya cyangwa bava guhahirayo.

JPEG - 55.4 kb
Nyuma yo kubaka ikiraro gishya,bagwiriwe n’umukingo bajya gutunganya n’ahari hari igishaje

Imirimo yo kubaka ikiraro gishyashya yari irangiye hasigaye isoza, biba ngombwa ko abakora kuri iki kiraro gishya bajya gutunganya aho kiriya cyahoze kugira ngo hamere neza hatazagira nk’uwahanyura akaba yahagirira impanuka.

Cyimana avuga ko ubwo batatu muri aba bakozi barimo bagenda baringaniza umukingo ahahoze ikiraro gishaje wahise utenguka ukabagwira, umusore witwa Niyitegeka Zacharie w’imyaka 27 wari utuye mu kagari ka Mwezi mu mudugudu wa Nyarusange ahita ashiramo umwuka, mugenzi we Iyakaremye J.D w’imyaka 18 arakomereka ahita ajyanwa ku kigo nderabuzima cya Mwezi,na ho Ngirimana Eugène we avamo ari muzima.

Gitifu Cyimana yagize ati “Umurambo wa nyakwigendera wahise ujyanwa mu bitaro bya Bushenge gukorerwa isuzuma mbere yo gushyingurwa,uwakomeretse na we ajyanwa ku kigo nderabuzima cya Mwezi kuvurirwayo,duhumuriza abaturage tukaba dutegereje kumenya niba iyi sosiyete ikora iki kiraro yari ifite ubwishingizi ku buryo umuryango wa nyakwigendera wari ukiri ingaragu hari icyo wahabwa.

“Impanuka yo ntiteguza nta kindi cyakorwa, gusa twasaba abakora hariya hantu kujya babanza kwitonda bakareba ahadashobora guteza impanuka mbere yo kuhakora,tukaba twahise duhagarika iyo mirimo yo kuhatunganya ngo ababishinzwe ku karere babanze barebe niba nta kindi kibazo byateza habone gukorwa.’’

JPEG - 217.3 kb
ki kiraro cyari cyarashize ku buryo cyagombaga guteza impanuka umwanya uwo ari wo wose

Umwe mu bo mu muryango wa nyakwigendera waganiriye n’Imvaho Nshya yavuze ko bababajwe n’uru rupfu,basaba ubuyobozi kubafasha gukurikirana ngo barebe ko babona impozamarira ,cyane cyane ko yari akiri muto kandi afatiye runini umuryango, bakanasaba gufashwa gushyingura nyakwigendera kubera ko bo batahita babona ubushobozi bwo kumwishyingurira.

Ubwo yasuraga iki kiraro umwaka ushize, umuyobozi w’aka karere wungirije ushinzwe iterambere ry’ubukungu, Ntaganira Josué Michel, yari yijeje ko kigiye gukorwa vuba kubera ko yari cyahagaritse ubuhahirane hagati y’abaturage bahacaga bajya cyangwa bava guhaha mu bice byombi,kimwe n’abanyeshuri bo mu kagari ka Miko bacyambukaga bajya kwiga mu kagari ka Gashashi.

JPEG - 228.9 kb
Ubwo abayobozi b’akarere bari basuye iki kiraro mu ntangiriro z’umwaka ushize bari basabye ko kitakongera gupfa kwegerwa

Igice cyangiritse cyane cyari cyahagaritswe kunyurwaho, nyuma y’iyi mpanuka, ubuyobozi bw’umurenge bwasabye abaturage kuhitondera bakanyura ku gishyashya cyuzuye gusa, aho babona hateza impanuka bakahirinda.

Umurambo wa Nyakwigendera washyinguwe mu masaha y’umugoroba yo ku wa Gatandatu, uwajyanywe ku kigo nderabuzima cya Mwezi we yari acyitabwaho n’abaganga.

BAHUWIYONGERA Sylvestre

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE