2017-11-23 18:23:19 clouds 27o High | Kigali Rwanda

Dukurikire:
 
 

Perezida Kagame yasezeranyije ko umuhanda uhuza Huye na Nyaruguru uzakorwa vuba

Yanditswe na IMVAHO NSHYA

Kuya 2017-07-03 07:43:02

 
Share on:
 
Yasuwe:679
 
Yavuzweho:200
 
10
 
10

Minisitiri w’Intebe, Murekezi Anastase, yagejeje ku baturage batuye Akarere ka Huye n’aka Nyaruguru ubutumwa bwa Perezida Paul Kagame, buvuga ko umuhanda uhuza utu turere uzatangira gukorwa mu gihe cya vuba, ugashyirwamo kaburimbo.

Ubu butumwa Minisitiri w’Intebe Murekezi Anastase yabutanze ku ya 1 Nyakanga 2017 ubwo yari ahagarariye Perezida Paul Kagame mu birori byo kwizihiza yubile y’imyaka 25 Diyoseze Gatorika ya Gikongoro imaze ishinzwe, aho yifatanyije n’abakirisitu Gatolika kuri sitade ya Nyagisenyi i Nyamagabe.

Atanga ubutumwa bwa Perezida Paul Kagame, Murekezi yagize ati “Perezida Paul Kagame yantumye kubabwira ko umuhanda wa kaburimbo uzahuza Huye na Nyaruguru uzatangira gukorwa mu gihe cya vuba.”

Yabwiye ubuyobozi bw’iyi diyosezi ko Perezida Paul Kagame ashima Diyosezi ya Gikongoro na Kiliziya Gatolika muri rusange, kuko ari bamwe mu bafatanyabikorwa beza ba Leta.

Murekezi kandi yabwiye abari aho ko Perezida Kagame azabasura vuba, ati “Aziyizira kubaramutsa vuba hano iwanyu, kugira ngo mukomeze igihango mufitanye cy’urukundo, umutekano n’iterambere kuri bose.”

Yakomeje avuga ko Leta y’u Rwanda yiyemeje gufatanya na Kiliziya Gatolika mu guteza imbere Abanyarwanda bakagira imibereho myiza.

Ati “Uruhare mugira mu rwego rw’uburezi, ubuzima, imibereho myiza y’abaturage n’ubukungu, ni umusanzu ku iterambere ry’u Rwanda.”

Minisitiri w’Intebe yasabye Amadini n’Amatorero kurushaho kugira uruhare mu guharanira ko umuryango uba igicumbi cy’uburere bwiza, Abakiristu bo abasaba gukomeza gushyigikira ubumwe n’ubwiyunge bw’Abanyarwanda no kurwanya sekibi washaka kongera kubatanya.

Yashimiye abakirisitu b’iyi Diyosezi ko bafashe umwanya wo kwisuzuma kandi bakiyemeza kwivugurura mu bukirisitu.

Bityo, Murekezi yavuze ko yubile ari umwanya wo kwishimira ibyagezweho, kwinenga, gusaba imbabazi ku bitaragenze neza, no gufata ingamba zo kubikosora, abifuriza ibyiza byinshi mu myaka 25 iri imbere hamwe n’Abakiristu bose b’iyi Diyoseze ya Gikongoro.

Umuhanda uhuza Akarere ka Huye na Nyaruguru, niwuzura uzaba ari igisubizo kuko mu karere ka Nyaruguru herekeza Abakirisitu Gatolika benshi baba bagiye mu rugendo rutagatifu ku butaka butagatifu bwa Kibeho.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE