2017-11-22 09:53:14 clouds 27o High | Kigali Rwanda

Dukurikire:
 
 

2010-2017: Amashanyarazi yikubye hafi gatatu

Yanditswe na IMVAHO NSHYA

Kuya 2017-06-30 07:18:19

 
Share on:
 
Yasuwe:384
 
Yavuzweho:200
 
10
 
10

Mu myaka irindwi ishize ya manda ya kabiri ya Perezida Paul Kagame, kuva 2010 kugera 2017, amashanyarazi yagezweho mu Rwanda akubye inshuro ebyiri n’igice ayari asanzwe mu gihugu, kandi abayafite nabo muri iyi myaka irindwi bikubye gatatu.

Imibare Imvaho Nshya ikesha Minisiteri y’Ibikorwa remezo, igaragaza ibyagezweho mu gihe cy’imyaka irindwi ishize mu rwego rw’ibikorwa remezo mu Rwanda, harebwe ku mashanyarazi, muri 2010 u Rwanda rwari rufite amashanyarazi angana na MW 85, ariko kugeza ubu, hari MW 213, bivuze ko mu myaka irindwi ishize hiyongereyeho MW 128. Mu yandi magambo, mu mateka y’u Rwanda rwatangira kubona amashanyazi, ayo rwari rufite yikubye 2.5 mu gihe cy’imyaka irindwi gusa.

Uku kwiyongera kw’amashanyarazi mu gihugu mu buryo bwihuse, Minisiteri y’Ibikorwa remezo ivuga ko gushingiye kuri gahunda ya Guverinoma ya EARP yo kugeza ku Banyarwanda benshi amashanyarazi, yatumye abari bafite amashyarazi muri 2010 banganaga na 10.8% bagera kuri 34.5% muri Gicurasi uyu mwaka wa 2017.

Muri aba 34.5% bafite amashanyarazi, muri bo abangana na 27.2% bakoresha amashanyarazi akomoka ku muyoboro mugari (on grid), naho 7.3% bakaba bakoresha andi nk’akomoka ku mirasire y’izuba (off grid).

Kugeza ubu, inzego za Leta ndetse n’ibigo binyuranye bifite amashanyazi mu buryo bukurikira: imirenge ingana na 92% ifite amashanyarazi, ibigo nderabuzima biyafite ni 85%, amashuri ayafite ni 54% n’izindi nzego zinyuranye zahawe amashanyazi mu gihe cy’imyaka irindwi ishize.

JPEG - 256 kb
Aha Perezida Kagame yafunguraga ku mugaragaro uruganda rw’amashanyarazi rwa Nyabarongo rutanga MW 28

Ikindi kandi, muri iyi manda ya kabiri ya Perezida Paul Kagame, hubatswe imiyoboro y’amashanyarazi indi irasanwa mu rwego rwo gukwirakwiza amashanyarazi ndetse no koroshya kuba yacuruzwa hirya no hino mu karere. Muri rusange, imiyoboro yo mu rwego rwo hejuru ireshya na km 363.5 yarubatswe, hanubakwa kandi imiyoboro ireshya na kilometero 16,162 igeza amashanyarazi ku bantu hirya no hino mu gihugu.

Ibikorwa remezo byubatswe mu myaka irindwi bitanga amashanyarazi

Ibikorwa remezo byatumye ubu bwinshi bw’amashanyarazi n’abayakoresha bigerwaho, mu myaka irindwi ishize hubatswe uruganda rw’amashanyarazi rwa Nyabarongo rutanga MW 28 kuva mu Gushyingo 2014, Giciye II itanga MW 4 kuva muri 2016, na Rukarara I itanga amashanyarazi angana na MW 9 kuva mu mwaka wa 2010.

Hari kandi MW20 zateganyijwe kuva mu ngomero z’amashanyarazi (inganda nto) kuva muri Nyakanyanga 2011 kugeza muri Kamena 2017, aho MW 18.8 ziva mu ngomero 13 za Nkora, Cyimbili, Keya, Mazimeru, Musarara, Janja, Mukungwa II, Nyirabuhombohombo, Nyabahanga, Nshili I, Gashashi, Rukarara II, Giciye I na Gaseke.

JPEG - 364.6 kb
Ibikorwa remezo byubatswe ni byinshi byatumye umubare w’abagerwaho n’amashanyarazi wikuba gatatu mu myaka irindwi ishize

Mu myaka irindwi kandi ishize, gaze metane yo mu Kivu yabyajwe umusaruro, aho mu Kuboza 2015 KivuWatt icyiciro cyayo cya mbere cyatangiye gutanga amashyarazi angana na MW 25.

Ku nshuro ya mbere kandi, u Rwanda rwashoboye kubyaza amashanyarazi nyiramugengeri, aho uruganda rwa Gishoma kuva muri Mata uyu mwaka wa 2017 rutanga ingufu z’amashanyazi akomoka kuri nyiramugengeri angana na MW15.

Muri iyi manda ya kabiri kandi ya Perezida Paul Kagame, u Rwanda rwashoboye kugeza ku baturage amashanyarazi akomoka ku mirasire y’izuba akomoka mu mushinga wa Giga Watt Global i Rwamagana, angana na MW8.5, umushinga wa mbere munini mu karere. Hari kandi uruganda rwa Nasho na rwo rutanga amashyarazi nk’aya akomoka ku mirasire y’izuba angana na MW3.3, n’urwa Nyamata rutanga angana na MW0.03.

Imiyoboro y’amashanyarazi yarubatswe indi irasanwa

Imiyoboro minini y’amashanyarazi ireshya na kilometero 363.5 yarubatswe mu myakla irindwi, iyo ikaba ari uwa kV (kilovolts) 220 uhuza Karongi – Rubavu – Shango – Birembo ureshya na kilometero 180 wuzuye muri Werurwe 2017.

Uwa kV 220 uhuza Shango – Mirama (Uganda Border) ureshya na kilometero 93.5 warangiye mu Gushyingo 2017. kV 110 wa Nyabarongo I – Kilinda unyuze Muhanga, Ngororero na Karongi ureshya na kilometero 28 warangiye mu Kwakira 2014.

Undi ni uwa kV 110 wa Gishoma – Bugarama – Ntendezi unyura mu turere twa Rusizi na Nyamasheke, ureshya na kilometero 30.5 warangiye muri Nzeri 2016, hakanaza kV110 wa Rukarara – Kilinda unyuze mu turere twa Nyamagabe na Karongi ureshya na kilometero 31.5 warangiye mu Kuboza 2016.

Uretse imiyoboro yubatswe, hari n’iyasanwe mu rwego rwo kugabanya amashanyarazi apfa ubusa. Iyo ni umuyoboro ureshya na kilometero 87 wa Jabana – Birembo – Gasogi – Musha – Kabarondo – Rwinkwavu, wavanwe kuri kV 70 KV ugezwa kuri kilovolts 110 warangiye mu Kuboza 2016. Hasanwe kandi umuyoboro w’amashanyarazi muri Huye, uvanwa kuri kV 6.6 ugezwa kuri 30, hanasanwa “Substations” za Jabana, Gikondo, Musha na Rwinkwavu zirangira muri 2011.

Imishinga izatanga amashanyarazi irimo gushyirwa mu bikorwa

JPEG - 72.8 kb
Uruganda rwa Gishoma rutanga amashanyarazi akomoka kuri nyiramugengeri

Kuri ubu, hari imishinga iri mu nzira, iyo ni “Symbion Methane Gaz” izatanga amashanyarazi akomoka kuri gazi metane angana na MW 50, hari uzatanga amashayarazi akomoka kuri nyiramugengeri “Hakan Peat” angana na MW80, hakaza MW8 ziziyongera kuri KivuWatt, ndetse n’imishinga yo mu karere nk’uwa Rusumo uzatanga amashanyarazi angana na MW80 na Rusizi III izatanga angana na MW147 aho ibiganiro bikiri mu nzira.

Minisiteri y’Ibikorwa remezo kandi itangaza ko hari inganda nto zirindwi z’abikorera zizatanga amashanyarazi angana na MW16 ubu zirimo kubakwa zizarangira mu gihe cya vuba. Ibi byose bikazatuma mu mpera z’umwaka w’ingengo y’imari wa 2017/2018, biteganyijwe ko ingano y’amashanyarazi mu Rwanda azaba angana na MW563, akubiyemo asanzwe mu gihugu ndetse n’imishinga ihari izaba yarangiye.

Imiyoboro y’amashanyarazi irimo kubakwa

Hari kandi imishinga iri mu nzira yo kongerera imbaraga amashanyarazi aharimo umushinga w’umuyoboro wa kilometero 119 wa kV 110, uhuza Rulindo – Ngarama – Gabiro – Musha, biteganyijwe ko uzarangira mu mpera z’uyu mwaka wa 2017.

Hari gusana no kwagura umuyoboro wa kilometero 27 wa kV 110 uva Jabana-Mont Kigali – Gahanga. Imirimo biteganyijwe ko izaba yarangiye mu mwaka wa 2018. Hari na none kongerera imbaraga amashanyarazi yo mu gace kihariye kagenewe inganda muri Kigali (Kigali Special Economic) bizarangira mu mpera z’umwaka w’ingengo y’imari wa 2017/2018 uzatangirana n’iyi Nyakanga.

Ikindi ni imirimo yo gusana imiyoboro y’amashanyarazi na substation mu mujyi wa Kigali hagamijwe gukuraho ikibazo cyo gucika kw’amashanyarazi kwa hato na hato. Biteganyijwe ko bizarangira mu ngengo y’imari ya 2017/2018.

Minisiteri y’Ibikorwa remezo ivuga ko mu rugendo rwa “U Rwanda twifuza” (The Rwanda we want) mu gihe kigufi n’ikirekire, izakomeza kubakira ku byagezweho, ikomeza gushyira mu bikorwa gahunda n’ingamba bizakomeza kuzamura urwego rw’ibikorwa remezo, hongerwa amashanyarazi ahabwa abaturage, inganda ndetse n’izindi nzego zitanga umusaruro.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE