2017-09-23 09:22:12 clouds 27o High | Kigali Rwanda

Dukurikire:
 
 

Kirehe:Abirukanwe Tanzaniya basabye gushyirwa mu bahabwa akazi muri VUP

Yanditswe na IMVAHO NSHYA

Kuya 2017-06-30 06:46:47

 
Share on:
 
Yasuwe:52
 
Yavuzweho:200
 
10
 
10

Imiryango 10 y’abanyarwanda birukanwe muri Tanzaniya batujwe mu mudugudu wa Mumeya, mu kagari ka Rwantonde, umurenge wa Gatore, barasaba ko bahabwa amahirwe yo kujya bahabwa akazi, mu murimo y’amaboko muri gahunda ya VUP, kugira ngo nabo babashe gukorera amafaranga.

Ni mu gihe babwiye Imvaho Nshya ko bashyizwe mu cyiciro cya 2 cy’ubudehe, bituma babura amahirwe yo kujya bahabwa akazi, mu bikorwa by’imirimo y’amaboko ikorwa n’abari mu cyiciro cy’abatishoboye muri gahunda ya VUP.

Icyo bagaragaza nuko nta buryo bwo gukorera amafaranga babona, mu gihe bo bahamya ko muri bo harimo abafite imbaraga zo gukora, bagahuriza ku gusaba ubuyobozi kubahindurira icy’icyiro bagashyirwa mu cya 1 cy’ubudehe, cyangwa se nabo bakajya bahabwa akazi mu bikorwa bya VUP.

Rubanda Jean Bosco, ni umugabo w’imyaka 30 uvuga ko afite imbaraga zo gukora, ariko atabona aho akora, akagaragaza ko ahawe akazi mu bikorwa by’amaboko nko gukora imihanda n’ibindi muri gahunda ya VUP, byamufasha we n’umuryango we kurwanya ubukene.

Yagize ati “Turamuka twicaye, tukirirwa twicaye kandi tugakenera kurya. Kandi dufite imbaraga zo gukora, ariko nta bwo tubona aho dukora, twifuza ko ubuyobozi bwadufasha bakadushyira mu cyiciro cya 1, kugira ngo nibura tujye tubona akazi mu mirimo ya Leta nko gukora imihanda, muri VUP, tukabona aho dukora, tukabona amafaranga.”

JPEG - 183.4 kb
Uyu mudugudu wa Mumenya niwo watujwemo imiryango 10 y’abanyarwanda birukanwe muri Tanzaniya (Foto Manishimwe N)

Nsengumuremyi James, na we uri mu kigero cy’imyaka 35 yagize ati “Tuba mu buzima butari bwiza, kandi dufite imbaraga zo gukora, twifuza ko Leta yadufasha. Kuko badushyize no mu cyiciro cya 2 cy’ubudehe bituma tubura amahirwe yo kubona akazi muri VUP, nibura ngo tujye dukoreramo amafaranga. Nko mu gihe cy’impeshyi abandi bashobora kubona akazi, nko mu muhanda bagakora, ariko twe nta bwo twakora kubera ko turi mu cyiciro cya 2.”

Iyamuremye Antoine, Umunyamabanga Nshingwabikorwa w’umurenge wa Gatore, yabwiye Imvaho Nshya ko icyifuzo cyo guhabwa akazi, aba banyarwanda birukanwe muri Tanzaniya bafite cyakiriwe kandi kiri kwigaho.

Yagize ati “Twavuganye n’abashobora kuba bakora akazi ko mu muhanda, mu buryo bwa Public work, muri gahunda ya VUP, twumvikana ko abafite imbaraga bandika, bakabisaba hanyuma njyanama y’umurenge izagifatira umwanzuro, ku buryo nabo umwaka utaha bazajya bahabwa akazi, bakabona amafaranga abatunga mu buzima bwa buri munsi.”

Ubuyobozi bw’umurenge wa Gatore butangaza ko mu ngengo y’imari y’umwaka utaha wa 2017-2018 hateganyijwe gukorwa umuhanda wa Nganda-Kiha, kugeza hasi ku cyambu, bigakorwa n’abaturage bari mu cyiciro cy’abatishoboye bafite imbaraga zo gukora, ku buryo n’aba banyarwanda birukanwe muri Tanzaniya bashobora guhabwamo akazi.

Gitifu Iyamuremye, anavuga ko byemewe ko umuntu ashobora kuba ari mu cyicirio cya 2 ariko akaba yahabwa ubufasha nk’ubw’uri mu cyiciro cya mbere bitewe n’uko ameze.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE