2017-11-17 14:59:33 clouds 27o High | Kigali Rwanda

Dukurikire:
 
 

Tugerageze kwizigamira ibyo twejeje-Guverineri Kazaire

Yanditswe na IMVAHO NSHYA

Kuya 2017-06-29 10:52:11

 
Share on:
 
Yasuwe:54
 
Yavuzweho:200
 
10
 
10

Guverineri w’intara y’Uburasirazuba, Kazaire Judith, yasabye abatuye umurenge wa Nyamugali mu karere ka Kirehe, kumenya kwizigamira umusaruro w’ubuhinzi babonye, kugira ngo bazabashe guhangana n’ingaruka z’imihandagurikire y’ibihe.

Ni bimwe mu bikubiye mu butumwa uyu muyobozi yatangiye mu kagari ka Kiyanzi, ubwo yifatanyaga n’abaturage mu gikorwa cy’umuganda usoza ukwezi kwa Kamena 2017, wabaye hacukurwa umuyoboro w’amazi azashyirwa muri Poste de santé ya Kiyanzi-Rusumo.

Guverineri Kazaire avuga ko nubwo muri iyi ntara mu bihembwe byashize humvikanye abaturage bagizweho ingaruka n’izuba ryavuye ari ryinshi rikumisha imyaka bari barahinze, bikaviramo bamwe kugira ibibazo by’amapfa; ngo ubu muri iki gihembwe cya 2017 B nibura habonetse umusaruro.

Yibutsa abaturage ko uwo musaruro wabonetse kabone n’aho waba udahagije, badakwiye kuwupfusha ubusa, ahubwo bakwiye kwizigamira.

Yagize ati “Nzi ko mu minsi ishize twagize ikibazo cy’amapfa, ariko turabashimira imbaraga mwashyizemo mugakora, mugahinga. Uyu munsi bamwe muri mwe murejeje, ariko noneho turejeje ni byo nubwo hari aho bidahagije, ariko n’ibyo bikeya dufite; tugerageze kwizigamira.”

JPEG - 165 kb
Guverineri Kazaire yasabye abaturage kwizigamira ku musaruro babonye

Akomeza avuga ko abaturage bagombye kumenya ko muri aya mezi arenga 3 y’igihe cy’impeshyi, haba hava izuba ku buryo abenshi batabona uko bahinga; adakwiye gusiga umusaruro bari babonye muri iki gihembwe cy’ihinga gishize warashize, biturutse ku micungire mibi yawo.

Yagize ati “Dore ubu dutangiye impeshyi, ukwezi kwa gatandatu, ukwa karindwi n’ukwa munani, tuzongera guhinga mu mpera z’ukwa cyenda no mu kwa cumi mu gihembwe cy’ihinga cya mbere cya 2018 A, ndagira ngo mbashishikarize kwizigamira, mu buzima busanzwe kugira ngo mutere imbere, ariko kandi no kugira ngo mubashe guhangana n’ingaruka z’imihindagurikire y’ikirere.”

Nyamugali ni umwe mu mirenge 12 igize akarere ka Kirehe. Mu bihembwe bigera kuri 2 byabanjirije iki gishize cya 2017 B, waranzwemo n’izuba ryinshi ryanatumwe abaturage bagobokwa na Leta y’u Rwanda yabageneraga ibyo kurya.

Icyakora kuri ubu abatuye Nyamugali baganiriye n’Imvaho Nshya, barishimira ko abahinze mbere ibirimo ibishyimbo, ibigori n’amasaka byeze neza, ndetse n’abahinze nyuma bavuga ko byeze nubwo biteze neza; ariko nibura ntawabutashye nk’uko abatuye Kiyanzi babivuga.

Ntezukobagira Innocent avuga ko umusaruro wabonetse biteguye kuwucunga neza, bazirikana ko bagomba kuzigamira iminsi mibi ishobora guterwa n’imihindagurikire y’ikirere.

Yagize ati “Inaha ubushize twari twagize uruzuba rwinshi, turasonza Perezida wacu aratugoboka aduha ibyo kurya. Ubu rero nta wapfa gusesagura umusaruro; keretse umuntu utareba kure.

Ubu imvura yagiye twarejeje; nkanjye ibishyimbo bike nahinze namaze gusarura, ubu amasaka ni yo ntegereje.”

Guverineri w’intara y’Uburasirazuba Kazaire Judith yanashishikarije abatuye akarere ka Kirehe gukomeza kurangwa no gukunda umurimo, no guharanira gukora umurimo unoze kurushaho; kuko ari bwo iterambere bifuza kugeraho rizashoboka.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE