2017-11-23 07:40:03 clouds 27o High | Kigali Rwanda

Dukurikire:
 
 

Bimwe mu byagezweho mu rwego rw’ubuzima mu myaka 7 ishize

Yanditswe na IMVAHO NSHYA

Kuya 2017-06-29 08:18:44

 
Share on:
 
Yasuwe:258
 
Yavuzweho:200
 
10
 
10

Hubatswe:
• Ibigo nderabuzima bine bigezweho
• Amavuriro y’ingoboka 400 asanga 71
• Ibitaro bishya umunani
• Ibitaro bine ku rwego rw’Intara
• Ibitaro 36 ku rwego rw’Akarere
• Ibigo nderabuzima 499
• 900 000 bavuwe n’abajyanama b’ubuzima
• 80% bakoresha inzitiramubu
• 91% babyarira kwa muganga

Minisiteri y’Ubuzima ivuga ko mu myaka irindwi ishize ya manda ya Perezida Paul Kagame urwego rw’ubuzima rwageze kuri byinshi bishimishije.

Umuvugizi wa Minisiteri y’Ubuzima, Malick Kayumba, avuga ko muri iki gihe cy’imyaka irindwi umubare w’abagore babyarira kwa muganga wazamutse ukava kuri 69% ugera kuri 91%, hubatswe ibigo nderabuzima bine bigezweho birimo ikigo nderabuzima cya Remera, Kanyinya, Gatenga na Mageragere.

JPEG - 299.8 kb
Ikigo nderabuzima cya Gatenga cyubatswe mu buryo

Hubatswe ibyumba by’isuzumiro, aho bakirira indembe, aho babyarira, ibitaro ibitaro bya Bushenge, CHUB, Kibuye, Nyagatare, na Byumba byongererwa ubushobozi.

Kayumba avuga ko urebye ibisabwa n’umuryango mpuzamahanga wita ku buzima usaba ko imbangukiragutabara imwe ikoreshwa ku barwayi ibihumbi 50, ubu u Rwanda rugeze ku mbangukiragutabara imwe ku barwayi ibihumbi 55.

Ati “Ibi bivuze ko tutari habi ushingiye ku mibare turiho. Hubatswe amavuriro y’ingoboka 400 aza asanga ayari asanzweho 71, hubakwa ibitaro bishya umunani ari byo ibitaro bya Bushenge, Ruhango, Kinihira, Shyira, Kirehe, Masaka, Ibitaro bya Rutongo n’ibitaro bya Kibuye.

Ibitaro bya Nyagatare na CHUB byongerewe ubushobozi, hubatswe kandi ibitaro byo ku rwego rw’Intara bine, ku rwego rw’Uturere 36, hanubakwa kandi ibigo nderabuzima 499.

JPEG - 161.8 kb
Uku ni ko ibitaro bya Bushenge byari bimeze mbere y’uko umukuru w’igihugu asaba ko bivugurwa

Hari imishinga y’ibitaro irimo uwatangiye w’ibitaro by’i Gatonde ho mu karere ka Gakenke, i Gatunda ho mu Karere ka Nyagatare, n’ibindi bitaro bizubakwa mu Ruhengeri, iyi mishinga y’ibitaro bibiri nayo ikaba itangizwa mu minsi iri imbere.”

Malick Kayumba avuga ko hashingiwe ku mubare n’umurava by’abajyanama b’ubuzima, ibihumbi 900 by’abaturage bavuriwe mu ngo n’abajyanama b’ubuzima.

Ati “Kugeza ubu abajyanama b’ubuzima bafite ubushobozi bwo kuvura indwara ku kigero cya 80%.”

Mu rwego rwo kurwanya Sida n’izindi ndwara z’ibyorezo, agira ati “Kugeza ubu hashyizwe imbaraga mu guhangana n’izi ndwara z’ibyorezo, Sida kugeza ubu iri ku gipimo cy’ubwandu cya 3%, muri bo 80% bafata imiti igabanya ubukana, ibi binajyana no kuba ibigo nderabuzima 96% bitanga iyi miti, ibi bivuze kwegereza serivisi z’ubuzima aho abaturage batuye. Mu mwaka wa 2010 abafataga imiti y’igituntu bari 87%, nyuma y’imyaka ibiri gusa bageze kuri 93%.”

Avuga ku ndwara ya malariya izwiho kwibasira abantu ikanatwara ubuzima bwabo, Malick yavuze ko iyi ndwara Leta yayihagurikiye ikarwanywa byivuye inyuma.

Ati “Nyakubwahwa Perezida wa Repubulika ubwe yemeje ko abantu bari mu budehe icyiciro cya mbere n’icya kabiri bavurirwa malariya ubuntu.

Ibi byerekana uruhare rwe mu kubungabunga ubuzima bw’Abanyarwanda, ibi kandi binajyana n’urwego rw’abakoresha inzitiramubu, kugeza ubu 80% bakoresha izi nzitiramubu zikoranye umuti. Uyu mwaka hatanzwe miliyoni 6 z’inzitiramibu, hanaterwa umuti wica udukoko dukwirakwiza malariya mu ngo 465 616, aha hibanzwe cyane mu turere 13 turangwamo malariya cyane nka Huye n’utundi.”

Malick Kayumba avuga ko mu rwego rwo gufasha abana gukura neza haba mu gihagararo no mu bwenge hatangijwe gahunda yo gutanga ifu ya Shisha kibondo aho babyeyi bayihabwa ku buntu ibi bikajyana no kwigishwa uko indyo yuzuye itegurwa.

Ati “Mu rwego rwo kurwanya imirire mibi igira ingaruka ku mikurire n’ubwenge by’umwana ubu ababyeyi basigaye bahabwa iyi fu yujuje intungamubiri zose.”

JPEG - 76.7 kb
Ibitaro bya Bushenge bibereye ijisho

Asoza asaba Abanyarwanda guharanira kubungabunga ubuzima bwabo bitabira n’imyitozo ngororamubiri kuko nayo iri mu bituma umubiri umererwa neza ukanashobora guhangana n’indwara.

JPEG - 384.2 kb
Ibitaro bya Masaka mu karere ka Kicukiro nabyo byubatse vuba
JPEG - 395.3 kb
Ibitaro bya Kinazi bimaze igihe gito byuzuye

GATETE JEAN BOSCO

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE