2017-12-13 06:59:31 clouds 27o High | Kigali Rwanda

Dukurikire:
 
 

Muhanga:Army Week:Mu minsi 5 haravurwa abarwayi basaga ibihumbi 5

Yanditswe na IMVAHO NSHYA

Kuya 2017-06-28 15:01:26

 
Share on:
 
Yasuwe:40
 
Yavuzweho:200
 
10
 
10

Ubuyobozi bw’akarere ka Muhanga burakangurira abaturage kubyaza umusaruro amahirwe babonye yo kwegerezwa serivise z’ubuvuzi, muri gahunda ya Army week, yateguwe na Minisiteri y’ingabo z’u Rwanda.

Biteganyijwe ko mu bitaro bya Kabgayi no mu bigo nderabuzima bya Gitega na Nyabikenke mu Karere ka Muhanga, abarwayi bagera ku bihumbi 5 bagiye guhabwa ubuvuzi ku buntu mu gihe cy’iminsi itanu.

Iyi gahunda ya Army week igamije kwegereza serivisi z’ubuvuzi mu bitaro bya Kabgayi no mu bigo nderabuzima bibiri byo mu Karere ka Muhanga, kugira ngo abaturage bafite indwara zananiranye bazivurwe bitabagoye.

JPEG - 206.3 kb
Visi Meya Mukagatana Fortunée mu muhango wo gutangiza Army Week i Muhanga

Zimwe mu ndwara aba baganga bagiye kuvura harimo indwara z’abagore, amaso, amenyo, rubagimpande, indwara zo mu muhogo, n’iz’amagufa, bikaba biteganyijwe ko abazirwaye bavurwa bakoresheje ubwishingizi bwemewe mu Rwanda harimo na mituweli.

Umuyobozi ukuriye itsinda ry’abaganga muri iki gikorwa, yavuze ko bigabanyijemo amatsinda kugira ngo babashe guha ubufasha abarwayi benshi bashoboka, bagereranyije n’iminsi bafite, kandi bakaba bifuza kuvura umubare munini w’abafite ibibazo bitandukanye by’izi ndwara.

Uwimana Alexia wo mu Murenge wa Nyarusange muri aka Karere, avuga ko amaze gukurwamo amenyo 6, ndetse akaba agiye no kwikuza irya karindwi muri iyi gahunda ya army week, akaba yishimira cyane ko yegerejwe serivise, kuko iyo hataba iyi gahunda byari kuzamugora kwikuza aya menyo yose.

Uyu mubyeyi kandi anavuga ko yaboneyeho n’umwanya wo kuvuza umwana acukije, na we watangiye kurwara amenyo, akaba ashimira cyane ingabo z’igihugu kuri ibi bikorwa by’ubutwari.

Umuyobozi wungirije ushinzwe iterambere ry’ubukungu mu Karere ka Muhanga Mukagatana Fortunée, yavuze ko ubusanzwe izi ndwara zirimo kwibandwaho muri ubu buvuzi butangwa n’ingabo z’igihugu ari nazo (indwara) zikunze kwibasira abaturage, gusa akagaragaza ko hari n’abaturage barwara bakanga kwivuza barindiriye iki gikorwa cyo kubavura ku buntu, bakazira rimwe ari benshi ku buryo hari ubwo abaganga basanga zarabashegeshe.

Yakomeje agira ati “Abaturage benshi twasanze bafite indwara z’amenyo, turasaba abafite iki kibazo kwihutira kuza kwivuza ndetse bakazajya bubahiriza amabwiriza bahawe na muganga kuko hari abatayakurikiza.»

Ku munsi wa mbere w’iki gikorwa cyo kuvura abaturage muri gahunda ya Army week, muri serivisi zitandukanye zo mu bitaro bya Kabgayi no mu bigo nderabuzima bya Kibangu na Nyabikenke havuwe abarenga 600, bakavuga ko mu minsi basigaranye bazavura benshi kurushaho, ku buryo intego bihaye yo kuvura abarwayi 5000 izagerwaho.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE