2017-09-21 09:07:12 clouds 27o High | Kigali Rwanda

Dukurikire:
 
 

Leta igiye kunganira abashaka ubwishingizi mu buhinzi n’ubworozi

Yanditswe na IMVAHO NSHYA

Kuya 2017-06-27 06:41:21

 
Share on:
 
Yasuwe:57
 
Yavuzweho:200
 
10
 
10

Minisitiri y’Ubuhinzi n’Ubworozi (MINAGRI) yatangaje ko mu ngengo y’imari y’umwaka wa 2017/2018, hateganyijwe amafaranga y’u Rwanda miliyoni 200 azunganira abazashaka kugura ubwishingizi mu buhinzi n’ubworozi.

Minisitiri Dr Mukeshimana Geraldine yagaragaje ko ari ku nshuro ya mbere aya mafaranga yunganira abashaka ubwishingizi mu buhinzi n’ubworozi atanzwe kuko mbere iyi minisiteri yakanguriraga ibigo by’ubwishingizi kujya mu cyaro kwigisha abantu bakagura ubwo bwishingizi.

Dr Mukeshimana asobanura ko impamvu bahisemo gutera inkunga icyo gikorwa mu buryo bw’amafaranga byatewe n’imihindagurikire y’ibihe itari isanzwe.

Yagize ati “Twaje kubona y’uko uko ibihe bigenda bihinduka kandi bikaba bibi abantu badashobora kugira ubushobozi bwo kwigurira ubwo bwishingizi bukenewe mu buhinzi n’ubworozi, ari yo mpamvu Leta yahisemo gutanga iyo nkunganire”.

JPEG - 79.1 kb
Dr. Mukeshimana Geraldine, Minisitiri w’Ubuhinzi n’Ubworozi (Foto James R)

Yunzemo ati “Iyo ‘nkunganire’ ni amahirwe twashyiriyeho abahinzi n’aborozi ku buryo ugize ubwishingizi muri izi nzego, ukagira n’ubushobozi bwo kuhira, icyo gihe ingaruka ku mihindagurikire y’ibihe ziragabanuka. Ikindi n’amabanki yajyaga atinya gutanga inguzanyo mu buhinzi n’ubworozi bizagabanuka ahubwo amahirwe yo gutanga inguzanyo aziyongera bitandukanye n’uko mbere nta na kimwe cyabaga gihari.”

Minisitiri w’ubuhinzi n’ubworozi kandi yibukije ko Leta ishyira Nkunganire mu kintu runaka ariko ntikomeze kuyitanga igihe cyose. Kuko “Itanga iyo nkunganire bitewe n’ikibazo gihari kigomba gukemuka, hashira iminsi ikavamo ikajya mu kindi.”
Yasabye abikorera kubyaza umusaruro amahirwe ari mu buhinzi bwa kijyambere no kuhira imyaka ndetse no gutanga ubwishingizi ku bahinzi.

UWIMANA DONATA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE