2017-11-24 09:36:46 clouds 27o High | Kigali Rwanda

Dukurikire:
 
 

Abacuruza imyenda ikorerwa mu Rwanda barishimira ko imisoro ya caguwa yongerewe

Yanditswe na IMVAHO NSHYA

Kuya 2017-06-26 13:02:59

 
Share on:
 
Yasuwe:481
 
Yavuzweho:200
 
10
 
10

Bamwe mu bacuruzi n’abakora imyenda ikorerwa mu Rwanda baravuga ko kuzamura imisoro ku myenda n’inkweto byambawe bizwi nka caguwa, byatumye umubare w’abakiriya wiyongera.

Mu mwaka w’ingengo y’imari wa 2016/2017 ni bwo leta y’u Rwanda yazamuye imisoro ku nkweto n’imyenda byambawe byinjiza mu Rwanda bizwi nka caguwa aho yikubye inshuro 25, ni nako bizaguma mu mwaka wa 2017/2018.

Ibi byakozwe mu rwego rwo kugabanya imyenda ya caguwa ikundwa na benshi, hagatezwa imbere inganda zikora imyenda zo mu gihugu. Ibi kandi u Rwanda rubihuriyeho n’ibindi bihugu bigize Umuryango w’Afurika y’Uburasirazuba aho muri 2019 nta mwenda wambawe uzaba wemerewe kwinjira muri ibi bihugu.

Bamwe mu bakora imyenda n’inkweto, bakanabicuruza batangaza ko aho imisoro yongerewe ku myenda n’inkweto bya caguwa, ngo byatumye abakiliya babagana biyongera.

Uwitwa Eric Rugira akora inkweto zizwi nka Masayi avuga ko kuba imisoro yarongerewe ku nkweto za caguwa byatumye abakiriya be biyongera.

Yagize ati “icyo navuga kuri Made in Rwanda, icyambere baragikoze, kiriya gikorwa bakoze cyo kugabanya caguwa, byatumye noneho ubu umuntu akora ikintu akabona abakiriya. Nk’ubu urabona abakiriya bari kugura ariko iyo haba hakiriho za caguwa niho aba bigiriye.

JPEG - 99.7 kb
Imyambaro ikorerwa mu Rwanda irakomeye kandi ni myiza kurusha imwe itumizwa hanze

Uwineza Ange nawe akora imyenda y’ubwoko bitandukanye yifashishije ibitenge, avuga ko gahunda yo guteza imbere ibikorerwa mu Rwanda, hongerwa imisoro ku myenda ya caguwa, byatumye abanyarwanda batinyuka kwambara imyenda ikoze mu bitenge mu gihe bumvaga ko ihenze yambarwa n’abanyamahanga gusa.

Yagize ati “ icyo twishimira ni uko ubona abanyarwanda nabo bamaze gusobanuka, ntibagitinya kwambara ishati ikoze mu gitenge, kuko mbere wasangaga bavuga ko imyenda nk’iyi igurwa n’abazungu gusa.”

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba mu gihe ubukangurambaga bwo guteza imbere ibikorerwa mu Rwanda bumaze, abakora imyenda n’inkweto bateye intambwe ishimishije gusa ngo hari inzira ndende kugira ngo u Rwanda rugere aho rwifuza.

Yagize ati “intambwe imaze guterwa irashimishije, urebye inganda nto n’iziciriritse zikora imyenda n’inkweto zimaze gushingwa . ibintu byose bikiri bishya ntago abantu babyumva kimwe, politiki leta yashyizeho ugasanga ntabwo zibageraho neza kuko batazi uburyo bashobora kwishyira hamwe kugira ngo bashobore kubona ibyiza bizituruka ho. Aha niho hakiri imbogamizi kugira ngo ibintu bijye ku murongo neza.”

Ishami rishinzwe Ubucuruzi rya Leta Zunze Ubumwe z’Amerika riherutse gutangaza ko rishobora gufatira ibihano mu by’ubucuruzi Leta y’u Rwanda hamwe n’ibindi bihugu by’Afurika y’Uburasirazuba kuko byazamuye imisoro ku myenda yacuguwa, bikagira ingaruka ku bacuruzi bo muri Amerika,ariko u Rwanda rwo ruvuga ko rudateze kwisubiraho n’ubwo bihano bishobora kugira ingaruka ku bukungu bw’u Rwanda.

Gahunda yo guteza imbere ibikorerwa mu Rwanda yitezweho gufasha u Rwanda kugabanya umubare w’abashomeri, kongera umusaruro w’u Rwanda biturutse mu maboko y’abanyarwanda, ari nako u Rwanda rufata ibindi bihugu byari byararusize mu iterambere.

Kugeza ubu mu Rwanda hari inganda nini zikora imyenda nka Utexurwa, C&H Garments n’izindi nganda nto zikorera mu bice nitandukanye by’igihugu. Hari kandi n’uruganda rwa Kigali Leather Ltd rutunganya impu rukaba rwaranatangiye gukora inkweto z’ubwoko butandukanye.

MUVUNYI ARSENE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE