2017-11-18 15:01:27 clouds 27o High | Kigali Rwanda

Dukurikire:
 
 

Musanze:Abana 7 bahoze mu mitwe yitwaje intwaro bahujwe n’ababyeyi babo

Yanditswe na IMVAHO NSHYA

Kuya 2017-06-26 07:35:42

 
Share on:
 
Yasuwe:65
 
Yavuzweho:200
 
10
 
10

Komisiyo y’igihugu ishinzwe gusubiza mu buzima busanzwe abahoze mu gisirikare yahuje abana 7 muri 20 baturutse mu mitwe yitwaje intwaro mu mashyamba ya Repubulika Iharanira Demakarasi ya Kongo n’imiryango yabo.

Ni igikorwa cyabereye i Mutobo mu karere ka Musanze, ababyeyi bahujwe n’abana babo bakaba bavuga ko ngo iki ari igikorwa gishimangira gahunda y’ubumwe n’ubwiyunge mu banyarwanda.

Uwizeyimana Immaculee, umwe mu babyeyi bahujwe n’umwana we nyuma y’imyaka irenga 7, avuye mu mashyamba ya Kongo, yagize ati “Naraje (ava mu mashyamba ya Kongo) ngeze hano mu Rwanda impa uburyo bwo gukora niteza imbere, none kubera imiyoborere myiza idahora, impuje n’umwana wanjye, ibi ndabishima, uyu mwana wanjye aba yaraje bakamufunga cyane ko yari muri FDLR, umutwe wanga u Rwanda n’abanyarwanda urunuka, ariko bamwakiriye neza ndetse baramufasha kongera gutangira ubuzima bushya.

Ndishimye kuba mbonye uyu mwana wanjye azi umwuga kandi bakamutekesha bamuha ibikoresho byo mu gikoni, n’igishoro, kugira ngo ashyire mu bikorwa amasomo yahawe yihangira umurimo, yewe sindabona aho umuntu atera igihugu akagororerwa kwigishwa no gutekeshwa, uretse mu Rwanda”.

JPEG - 327.1 kb
Abana bafashe ifoto y’urwibutso nyuma yo guhuzwa n’ababyeyi

Bahati Theophile, umwe mu bana bahujwe n’umubyeyi we ukomoka mu karere ka Kamonyi mu ntara y’Amajyepfo, yagize ati “Ninjiye muri FDLR mfite imyaka 13, ariko mu myaka isaga 5 namaze ndwana nari meze nk’inyamaswa, kwica umuntu kuri njye ni byo bari barantoje kimwe no gusahura ibya rubanda, ibi rero nabyinjiyemo atari ku bwanjye kuko iyo umwana w’umuhungu ugeze ku myaka 12 muri Kongo afite inkomoko yo mu Rwanda, ahita yinjizwa mu gisirikare.

Ikintu kimbabaza ntazibagirwa ni umunsi njya k’urugamba bakandasa ku kaguru, hagapfa n’abana bato batari hasi ya 30, umunsi umwe, kuri ubu rero nshimishwa no kuba ndyama sinumve isasu, n’ubwo hari ubwo rimwe na rimwe njya nshidukira hejuru nikanze abarwanyi bo muri Nyatura (umutwe urwanira muri Kongo) baje kuturasa ariko nizera ko bizakira, kuko u Rwanda narubonye ruzanyomora ibikomere natewe na FDLR.

Umukozi muri Komisiyo y’igihugu yo gusubiza mu buzima busanzwe abahoze mu gisirikare, Nyamurangwa Fredy, yagize ati “Guhuza abana n’imiryango yabo ni imwe muri gahunda ishimangira uburenganzira bw’umwana, nk’uko n’amategeko u Rwanda rugenderaho abyemera, n’ubwo aba bana bahuye n’imitwe inyuranye yitwaje intwaro ikabica mu bwonko ibatoza amacakubiri, nta rirarenga ngo u Rwanda rubasubize agaciro kabo.

Kandi rwabikoze kuko ubu buri mwana nyuma yo kwigishwa imyuga ahabwa n’ibikoresho by’ibanze azifashisha mu mwuga we, igishoro cy’amafaranga, yemwe n’ibikoreho byo mu gikoni nk’uko mwabibonye, kandi iyo bavuye hano komisiyo ikomeza kubasura no kumva ibibazo bafite mu mibereho yabo”.

Nyamurangwa akomeza asaba ababyeyi b’aba bana gukomeza kubitaho babatoza kwirinda ingengabitekerezo ya Jenoside, bakimakaza Ndi umunyarwanda, kandi bakabafasha gukomeza kwiga”.

Mu bana 13 basigaye batarabona ababyeyi babo, ngo biteganyijwe ko komisiyo izabafasha kubona imiryango ibakira mu gihe cya vuba.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE