2017-11-18 15:01:27 clouds 27o High | Kigali Rwanda

Dukurikire:
 
 

Ibitaro by’i Ndera byakiriye abasaga 2800 bashegeshwe n’ibiyobyabwenge mu mwaka umwe

Yanditswe na IMVAHO NSHYA

Kuya 2017-06-26 07:10:29

 
Share on:
 
Yasuwe:199
 
Yavuzweho:200
 
10
 
10

Mu mwaka ushize ibitaro byakira abafite uburwayi bwo mu mutwe i Ndera, byakiriye abasaga 2800 basaritswe n’ibiyobyabwenge.

Dr. Turate Innocent, umuyobozi mukuru w’ikigo gishinzwe gukumira no kurwanya SIDA n’izindi ndwara z’ibyorezo, agaragaza ko uko imyaka ishira ariko habaho ubwiyongeye bw’abagaragaweho n’indwara zo mu mutwe, zitewe n’ikoreshwa ry’ibiyobyabwenge.

Imibare yerekana ko mu mwaka ushize wa 2016, ibitaro by’icyitegererezo by’i Ndera, bivura indwara zitandukanye zo mu mutwe, harimo n’iziterwa n’ikoreshwa ry’ibiyobyabwenge, byakiriye abantu bagera ku 2800 basanganwe ikibazo cyo kuba barokamwe n’ibiyobyabwenge, birimo urumogi, itabi, kanyanya n’ibindi bisindisha.

JPEG - 348.6 kb
Ibiyobyabwenge byangiza ubuzima bw’uwabinyweye (Foto Manishimwe N)

Iyi mibare ngo yariyongere kuko mu mwaka wa 2004 ibitaro by’i Ndera byari byakiriye abantu bagera kuri 440, bagaragaweho ko bokamwe no gukoresha ibiyobyabwenge. Icyakora avuga ko kugira ngo uyu mubare ugabanuke ku buryo bufatika, hakenewe imbaraga n’uruhare rwa buri wese.

Yagize ati “Uyu mubare ni munini cyane, ni ngombwa ko twese duhagurikira rimwe, kugira ngo turwanye ikibazo cy’ibiyobyabwenge, kuko nitudahaguruka hakiri kare ngo tubirwanye, tubikumire, imibereho n’iterambere ry’igihugu bishobora kuzahungabana mu myaka iri imbere.”

Ikindi Dr. Turate Innocent avuga ko gikwiye gushyirwamo imbaraga ni ugukumira iyinjizwa ry’ibiyobyabwenge mu gihugu cy’u Rwanda n’ubukangurambaga bwo gukangurira urubyiruko kwirinda ibiyobyabwenge kuko ubushakashatsi bwagaragaje ko umubare munini w’ababikoresha mu Rwanda bari gahati y’imyaka 14 na 35.

Maniraguha Etiènne wo mu murenge wa Mushikiri, ni umwe mu rubyiruko rwagizweho ingaruka no gukoresha ibiyobyabwenge by’itabi n’urumogi, aravurwa arakira, ndetse anoherezwa kugororerwa Iwawa mu gihe cy’umwaka n’amezi 2.

Ubu yongeye kuba muzima, icyakora ahamagirira urubyiruko kwirinda ibiyobyabwenge no kwirinda abashaka kubashuka, bagambiriye kubashora mu biyobyabwenge.

Yagize ati “Ubu inama ngira urubyiruko bagenzi banjye ni uko twarwanya ibiyobyabwenge, tukirinda no gushukwa n’urungano.Hari igihe abantu bakinywa ibiyobyabwenge, iyo bakubonye baba bifuza ko ubisubiramo.

Ingaruka z’ibiyobyabwenge zo ni mbi cyane, nanywaga urumogi nkaba nk’umusazi, nkarwana n’abantu bo mu rugo nkabakubita, ariko ubu barangoroye, narakize, ndubatse mfite umugore n’abana 2.”

Minisiteri y’ubuzima mu Rwanda yatangije ubukangurambaga bw’igihe kirekire bwo gukangurira abanyarwanda kwirinda ibiyobyabwenge.Bwatangirijwe mu karere ka Kirehe, mu murenge wa Gahara, kuwa 22 Kamena 2017, bufite insanganyamatsiko igira iti ‘Twirinde ibiyobyabwenge kuko byica ubuzima n’iterambere’.

Ni ubukangurambaga bwitezweho kuzatanga umusaruro ushimishije, ku buryo imibare y’abanywa n’abakwirakwiza ibi biyobyabwenge izagabanuka nyuma yo kwigishwa ingaruka mbi zabyo

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE