2017-09-21 09:07:12 clouds 27o High | Kigali Rwanda

Dukurikire:
 
 

Perezida Kagame yijeje Abanyarwanda kongera umuvuduko mu iterambere

Yanditswe na IMVAHO NSHYA

Kuya 2017-06-26 06:33:55

 
Share on:
 
Yasuwe:267
 
Yavuzweho:200
 
10
 
10

Perezida Paul Kagame yatangaje ko igihe Abanyarwanda bongeye kumutora, hazabaho gukora cyane, nubwo aho igihugu kigeze hashimishije, ntihagomba kubaho kwirara, ahubwo hazabaho kongera umuvuduko.

Ibi Perezida Paul Kagame yabivuze ejo hashize ku wa 25 Kamena 2017, ubwo yagiranaga ikiganiro n’Abanyarwanda b’ingeri zose bamubazaga ibibazo imbona nkubone kuri Radiyo na Televiziyo by’u Rwanda.

Muri iki kiganiro, Umukuru w’Igihugu yavuze ko igihe Abanyarwanda bongeye kumutora icyo abasaba ari ugukorera hamwe, hakabaho guteza igihugu imbere no guharanira umutekano wacyo ku bufatanye, ariko anabasezeranya ko hazabaho gukora cyane.

JPEG - 161.2 kb
Perezida Paul Kagame mu kiganiro cy’imbona nkubone kuri Radiyo na Televiziyo by’u Rwanda, yasezeranyije Abanyarwanda gukora cyane

Yavuze ko aho u Rwanda rugeze hashimishije, ariko ko nta kwirara, ko hazabaho kongera imbaraga, hakabaho gukora cyane no gukorana umurava. Ati “Aho abandi bagenda bisanzwe, twe tugomba gukoresha imbaraga zo kwiruka”.
Perezida Kagame yavuze ko hazabaho gukoresha imbaraga zisumbye, ati “Tugomba guhora dutekereza ahazaza hacu nk’Abanyarwanda bikajyana no kongera imbaraga mu mikorere.”

Muri iki kiganiro, yagarutse no ku nkomoko y’iterambere ry’u Rwanda, ati “Abanyarwanda twashoboye kugera kuri byinshi kuko twihaye intumbero, tugahora duharanira kuyigeraho […] Nta bwo dukora cyane ngo badushime, ahubwo tuba duharanira gukemura ibibazo byacu.”

Perezida Kagame yavuze ko mu 1994 abantu bishwe, habaho gusenyuka kw’ibintu byose, ku buryo mu ntangiriro yo kwiyubaka nk’igihugu habayeho guhera ku busa, n’inzitizi nyinshi.

Ariko ubu, abantu bibaza uko nyuma y’igihe gito igihugu cyageze ku byiza byinshi, ati “N’ubu umuntu wese asubije amaso inyuma agatekereza ku myaka 15 cyangwa 20 ishize, ashobora kuvuga ati hariya twahavuye dute, arebye uko ibintu byari bimeze nuko bimeze ubu.”

Yakomeje avuga ku cyatumye ibyagezweho byinshi bigerwaho, ati “Ibyo twagezeho benshi babonaga bidashoboka byerekana ibishoboka iyo abantu bafatanyije bagakora cyane […] Hari inzira yo kuba n’ibitarakemuka bishobora gukemuka.”

Akaba yarasabye urubyiruko gukora, kugira umuhate, bagakora cyane. Ati “Buri wese yifitemo imbaraga zituma yagira umusanzu atanga mu kubaka ahazaza dushaka […] Nk’urubyiruko, aho muri hose mufite inshingano. Muzihereho muzuzuze neza. Ni aho bihera”.

Urubyiruko rwamubajije ibibazo rwakomeje kumushimira ku gikorwa yakoze cyo kuyobora urugamba rwo kubohora igihugu no guhagarika Jenoside yakorewe Abatutsi mu 1994, bavuga ko iyo ataza kubikora baba batariho kuko bavutse nyuma ya Jenoside yakorewe Abatutsi mu 1994.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE