2017-12-11 11:00:24 clouds 27o High | Kigali Rwanda

Dukurikire:
 
 

Iyo twibuka Jenoside tunishimira kwishakamo ibisubizo-Jeannette Kagame

Yanditswe na IMVAHO NSHYA

Kuya 2017-06-25 08:54:31

 
Share on:
 
Yasuwe:52
 
Yavuzweho:200
 
10
 
10

Madamu Jeannette Kagame yavuze ku mateka y’u Rwanda, avuga ko Jenoside yakorewe Abatutsi yasize imfubyi n’abapfakazi, ko abayisizemo ubuzima bibukwa buri mwaka, ariko kandi Abanyarwanda bakanishimira kuba barishatsemo ibisubizo.

Ibi Madamu Jeannette Kagame yabivugiye mu Bwongereza, aho yitabiriye ibirori byo kwizihiza isabukuru y’imyaka 20 y’Umuryango “Loomba Foundation” yahujwe n’Umunsi Mpuzamahanga wo kuzirikana abapfakazi.

Mu ijambo yagejeje ku bantu bari aho babarirwa muri 400 barimo abagize Guverinoma na sosiyete sivile mu Bwongereza, u Buhinde no mu bindi bihugu, Jeannette Kagame yagarutse kuri Jenoside yakorewe Abatutsi mu 1994, avuga ko yatewe n’urwango rwavuyemo urupfu rw’abantu barenga miliyoni.

Yavuze ko Abanyarwanda batazabibagirwa, ati “Ni yo mpamvu buri mwaka, ubu ni ku wa 23, tuba tugomba kumara iminsi ijana y’icyunamo twibuka abambuwe ubuzima muri Jenoside yakorewe Abatutsi mu 1994, ariko tunishimira kwishakamo ibisubizo …”

JPEG - 92.3 kb
Madamu Jeannette Kagame ageza ijambo ku bitabiriye isabukuru y’imyaka 20 ya Loomba Foundation ku munsi mpuzamahanga w’abapfakazi

Umufasha w’Umukuru w’Igihugu yongeyeho ko abagore babarirwa mu bihumbi amagana bafashwe ku ngufu ndetse abandi banduzwa agakoko gatera sida. Jenoside ikaba yarasize abapfakazi ibihumbi 50 ndetse n’imfubyi ibihumbi 75.

Yakomeje agira ati “Mubitekerezeho, babuze abana babo, abagabo, imitungo,…” Akaba yaravuze ko Abanyarwanda basubiye mu muco wabo bishakamo ibisubizo, ubu Abanyarwanda bariyubatse.

Ati “U Rwanda rwerekanye ko gukorera hamwe bigeza abantu ku cyerekezo bifuza, byihuse”. Yagaragaje ko abantu bafashanya iyo bahuje imbaraga bagamije kugera ku ntego imwe y’iterambere ry’imibereho myiza n’ubukungu. Akaba yarasabye abari aho ko mu gihe hizihizwa umunsi mpuzamahanga w’abapfakazi habaho gushyigikira uburenganzira bwabo, kandi hakarwanywa icyabuhungabanya.

Yatunze agatoki ivangura ndetse n’akarengane nk’ibyabaye akamenyero mu kubabaza abapfakazi hirya no hino ku isi.

Ati “Nyuma yo gupfa kw’abagabo babo, imibereho yabo ndetse n’ubukungu bishobora kurushaho kuba bibi cyane, maze bigatera kubaho mu buzima bubi haba kuri bo no ku bana babo.”

Jeannette Kagame yashimiye Lord Loomba n’umugore we Veen kuba baratekereje ku kwita ku bapfakazi, anashimira Madamu Cherie Blair umuyobozi wa “Loomba Foundation” ku bwo guharanira uburenganzira bw’abagore.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE