2017-12-13 06:59:31 clouds 27o High | Kigali Rwanda

Dukurikire:
 
 

Ishuri rikuru rya Tumba ryamuritse imbabura itangiza ibidukikije

Yanditswe na IMVAHO NSHYA

Kuya 2017-06-24 12:54:27

 
Share on:
 
Yasuwe:137
 
Yavuzweho:200
 
10
 
10

Ishuri rikuru ry’ikoranabuhanga rya Tumba (Tumba College of Technology) ryashyize ahagaragara imbabura ikoresha amakara akorwa mu bishingwe no mu mbagara, mu rwego rwo kurengera ibidukikije.

Abarimu bigisha muri iri shuri bavuga ko iyo mbabura bayibonamo igisubizo cyo kubona ibicanwa kandi hatangijwe ibidukikije, dore ko n’ubusanzwe amakara asanzwe agenda aba make, ndetse n’iyi mbabura nshya yamuritswe ikaba idahenze, kuko into igura amafaranga ibihumbi 5 mu gihe inini igura amafaranga ibihumbi 7.

Iraguha Etienne, umwarimu muri iri shuri rikuru ry’ikoranabuhanga, yagize ati “Iyo dukora iyi mbabura tuzana imbagara tukavanga n’igitaka, hanyuma tugashyiramo tugatwika hakavamo amakara akozwe nk’itafari, ayo makara akozwe nk’itafari ari yo akoreshwa mu gihe cyo guteka”.

JPEG - 165.1 kb
Abanyeshuri ba TCT bamurika imbabura n’amakara atangiza ibidukikije

Iraguha yavuze ko gukoresha aya makara bifasha abaturage guhendukirwa ku bicanwa, kandi igikomeye kurusha ibindi akaba ari uko ubu buryo bunafasha mu kubungabunga ibidukikije.

Avuga ko abaturage nibitabira ubu buryo bizarinda iyangizwa ry’amashyamba atanga umwuka abantu bahumeka, ndetse bigatuma hatabaho imihindagurikire y’ikirere ya hato na hato.

Ubuyobozi bw’ishuri rikuru ry’ikoranabuhanga rya Tumba, buvuga ko bwiyemeje gukomeza guhanga udushya mu ikoranabuhanga, hagamijwe kurushaho guteza imbere imibereho myiza y’abaturage, binyuze mu bumenyi butangirwa muri iri shuri.

Bamwe mu baturage bo mu karere ka Rulindo baganiriye n’Imvaho Nshya, bishimiye cyane ubu buryo bushya begerejwe bwo guteka batangije ibidukikije, bavuga ko bagiye kubwitabira cyane, kuko ubusanzwe kubona inkwi zo guteka biri mu bibazo bibagora.

Mulindwa Prosper, Umuyobozi w’akarere wungirije ushinzwe iterambere ry’ubukungu mu karere ka Rulindo, avuga ko batangiye gushishikariza abanyarulindo kwitabira ubwo buryo bwo guteka bifashishije ikoranabuhanga, kuko ari uburyo bubafasha kurinda iyangizwa ry’amashyamba rikorwa ahanini n’abashaka ibicanwa.

BASANDA NS OSWALD

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE