2017-09-23 09:22:12 clouds 27o High | Kigali Rwanda

Dukurikire:
 
 

Gicumbi:Barashimira Perezida Kagame washyizeho gahunda zateje imbere imibereho yabo

Yanditswe na IMVAHO NSHYA

Kuya 2017-06-24 05:33:24

 
Share on:
 
Yasuwe:65
 
Yavuzweho:200
 
10
 
10

Abaturage bo mu karere ka Gicumbi barashimira cyane Perezida wa Repubulika Paul Kagame, watangije gahunda ya Girinka mu Rwanda n’izindi gahunda zabafashije kurwanya imirire mibi no guteza imbere imibereho yabo muri rusange.

Aba baturage bavuga ko ibyiza Umukuru w’igihugu Paul Kagame yabagejejeho ari byinshi, dore ko ngo ibyo yabasezeranyije ubwo yiyamamazaga mu myaka 7 ishize byose byashyizwe mu bikorwa.

Ndahimana Felicien, umuturage wo mu murenge wa Mukarange, akagari ka Mutarama, yagize ati “Hari abareba Girinka bakayibonamo amafaranga ifumbire, n’ibindi, bakiyibagiza ko byaturuhuye kwirirwa mu bisambu ducunga aho amafuku atimbya, ngo tubone inyama zo guha abana bacu mu gihe babaga barwaye Bwaki.

Mbwira na we kubona umugabo nkanjye yirirwa mu gihuru ahiga imbeba, ngo arashaka umuti wa Bwaki!ariko kuri ubu Kagame yaduhaye Girinka, abana baranywa amata, akarima k’igikoni gafumbirwa n’ifumbire ikomoka kuri Girinka hakavaho imboga duha abana bakagira imibereho myiza, iyo urebye se ugira ngo Bwaki bamwe baburaga uburyo bayisonura bakitirira bagenzi babo ko babarogeye, ntiyabaye amateka?”.

JPEG - 139.6 kb
Depite Gatabazi yishimira iterambere Perezida Kagame yagejeje ku baturage b’i Gicumbi

Uyu muturage akomeza avuga ko Girinka n’akarima k’igikoni byabahangiye n’umurimo, aho bagurisha amata bagakuramo amafaranga buri kwezi, ndetse buri cyumweru bamwe ngo bagemura imboga zo ku karima k’igikoni.

Yagize ati “Ubu ntabwo ngisaba umunyu kuko iyo ushize nikoza mu mudugudu nkagurisha imifungo itari munsi ya 50, nkakuramo ay’umunyu ngataha, ibi kandi na byo biterwa n’uko twatuye hamwe mu midugudu, aho twagiye dushinga udusantere tw’ubucuruzi ku bw’imiyoborere myiza ya Paul Kagame”.

Depite Gatabazi Jean Marie Vianney, uvuka muri aka karere ka Gicumbi, avuga ko ibyo Perezida Kagame yabagejejeho ari byinshi cyane, ku buryo ubu imibereho yabo yabaye myiza.

Yagize ati “Kagame gahunda ze z’imiyoborere myiza ntabwo zahembuye abanyagicumbi gusa ahubwo ni u Rwanda rwose, reka wenda mvuge akarere ka Gicumbi mu murenge wa Mukarange, uzi ko buriya umuriro w’amashanyarazi waturukaga kuri Ntaruka ugakomeza kuri Perefegitura ya Byumba, ukanyura hejuru y’ingo z’abaturage, umuturage akareba amashanyarazi nk’ureba indege.

Ndibuka na Perezida Habyarimana yazaga kwa Kabuga akarara yo bacanye moteri, ariko ntazirikane ko hakenewe umuriro kuri bose, ariko reba aho Kagame ayoboreye u Rwanda ubu nta joro nta manywa, hose haba hagaragara”.

Depite Gatabazi yakomeje avuga ko nta kindi cyari cyarabuze ngo abaturage batere imbere nk’ubu, uretse imyumvire mike y’abayobozi no kutakundaga abo bayobora.

Yagize ati “Abanyarwanda bajyaga kwivuriza muri Uganda kubera kutagira ibitaro, bajyaga kwigira mu cyahoze ari Zaire, mbese umwana w’umunyarwanda yakoraga urugendo rurerure bitewe na serivise ashaka, ariko ubu byose biri hafi yabo.

Ariko nanone hari icyo nabasaba birimo gukora cyane, bita kuri gahunda ya Girinka, bumva ko yatumye bazamura imirire mu gihe hitabazwaga koko amafuku ngo barwanye Bwaki, kuko abayobozi inka bari baraziciye burundu, ndabasaba kandi kuzigamira ejo hazaza basigasira umutekano n’ibimaze kugerwaho.”

Abaturage bo muri aka karere ka Gicumbi bagaragaje ko biteguye gusigasira ibyiza bimaze kugerwaho mu myaka 23 ishize, ndetse bakavuga ko n’ubuyobozi bwiza bwabibagejejeho bazakomeza kubushyigikira.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE