2017-12-11 14:03:29 clouds 27o High | Kigali Rwanda

Dukurikire:
 
 

Imirimo yo kubaka umuhanda Kayonza-Rusumo yaratangiye

Yanditswe na IMVAHO NSHYA

Kuya 2017-06-21 12:33:44

 
Share on:
 
Yasuwe:194
 
Yavuzweho:200
 
10
 
10

Abakoresha umuhanda Kayonza-Rusumo barishimira ko mu gihe gito itwara ry’abantu n’ibintu rizarushaho koroha, kuko uyu muhanda watangiye kubakwa neza, ndetse ukazagurwa mu rwego rwo korohereza abawukoresha.

Umuhanda Kayonza-Rusumo uzakorwa ni uw’ibirometero 92, ukazubakwa na sosiyete y’Abashinwa imaze igihe ikorera mu Rwanda, CRBC, ifatanyije na sosiyete y’ubwubatsi yo mu Rwanda, NPD Ltd.

Liu Zemin, umuyobozi w’uyu mushinga muri sosiyete y’abashinwa yemeza ko bazakora ibishoboka byose bakubahiriza amasezerano bagiranye n’ikigo cy’igihugu gishinzwe imihanda, RTDA.

Yagize ati “Amasezerano dufitanye na Leta y’u Rwanda, ni uko uyu muhanda uzubakwa mu gihe cy’amezi 30. Tuzakora ibishoboka byose twubahirize iki gihe twumvikanye, imirimo yo kubaka uyu muhanda twayitangiye ku bufatanye na sosiyete nyarwanda, twe turatangirira hano Kayonza tugere Ngoma, NPD nayo ihere ku rugabaniro rwa Ngoma na Kirehe irangirize Rusumo.

JPEG - 217 kb
Umuhanda uzubakwa uzaba ari mugari kuruta uhasanzwe (Foto Hakizimana Y)

Twe nka China Road dufite ubunararibonye bwo gukorera mu Rwanda kuko tumaze imyaka irenga 14 tuhakorera.”

Bamwe mu baturage n’abakoresha uyu muhanda baganiriye n’Imvaho Nshya, bemeza ko ari amahirwe babonye bari bategereje nk’uko byemezwa na Kanamugire Samuel, umuturage w’i Kayonza.

Yagize ati “Aya ni amahirwe twari dutegereje ubu turayabonye, ibyo Leta yacu ivuga irabikora bikaba ingiro, nta bwo ari nka Leta ya Habyarimana yatubeshye umuhanda wa Gitarama- Kibuye ntituwubone.

Njye iwacu ni i Karongi ariko nsingaye nibera inaha, ubu tugiye kubona akazi abandi bazacuruza kuko uyu muhanda uzakoresha abantu benshi, ni ibintu byo gushimira Perezida Kagame kuko ibi byose ni we.”

Saalum Ahmed Fadhil, umunyazanzibari utwara imodoka y’ikamyo, na we yemeza ko uyu muhanda nukorwa bizabafasha. Yagize ati “Maze imyaka irenga 10 nkoresha uyu muhanda, ariko twajyaga twibaza impamvu batawukora, ahubwo aho ugenda hose ukahabona ibiremo, uyu muhanda wuzuyemo ibiremo byinshi ubwo bagiye kuwusana ni ukuvuga ko bazanawongera kuko ni muto, ni ibintu bizatworohereza cyane cyane abakora akazi k’ubwikorezi bwo mu muhanda.”

Umuyobozi w’akarere ka Kayonza Murenzi Jean Claude witabiriye umuhango wo gutangiza ibikorwa byo gusana uyu muhanda ku mugaragaro byabereye i Kayonza, yemeza ko ibi ari amahirwe abaturage babonye yo kuzabona umuhanda mwiza, ariko kandi bakazabona n’akazi kuko abazaba bubaka muri uyu muhanda bazakenera byinshi kandi bakazabihabwa n’abanyakayonza, nabo bakabona amafaranga akomoka kuri uyu muhanda.

Diamba Unembo, umwe mu bagenzuzi batsindiye isoko ryo kuzakurikirana uko umuhanda uzaba wubakwa no kumenya ko ibikoresho bikoreshwa ndetse n’ingano y’umuhanda biri mu mpapuro ari byo byakozwe, yemeza ko yizeye ko ibizakorwa kuko bamaze igihe bakorana n.’iyi sosiyete y’Abashinwa.
HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE