2017-09-21 09:07:12 clouds 27o High | Kigali Rwanda

Dukurikire:
 
 

Kaboneka yasabye abakobwa kwitondera ababashuka ko bagiye kubashakira akazi mu mahanga

Yanditswe na IMVAHO NSHYA

Kuya 2017-06-21 09:01:04

 
Share on:
 
Yasuwe:62
 
Yavuzweho:200
 
10
 
10

Minisitiri w’ubutegetsi bw’igihugu Francis Kaboneka, yasabye abakobwa kwirinda ababashuka bakajya kubacuruza babashora mu busambanyi, bababeshya ngo bagiye kubashakira akazi mu mahanga.

Mu ruzinduko aherutse kugirira mu karere ka Rubavu, Minisitiri Kaboneka yagarutse ku kibazo cy’abana b’abakobwa bashukwa bagashorwa mu ngeso mbi, bakitesha agaciro kandi bikabagiraho ingaruka mbi.

Yavuze ko igihugu kigomba kwiteza imbere, kigatezwa imbere n’abana bacyo, ariko yibutsa ko amafaranga akuwe muri bene ubwo bucuruzi atari yo akenewe ngo iterambere rizamuke, asaba abakobwa guhaguruka bakagira uruhare mu kurwanya icuruzwa ryabo.

Yagize ati “Bana b’u Rwanda, musabwe kwirinda ubwomanzi, mwirinde ababashuka, ababashukisha utuntu tudafatika bakabatesha amahirwe yanyu, bakabatesha imigisha mufite, abantu bagurisha abandi, abaza bababeshya ngo bagiye kubaha akazi, ujye ubanza unamurebe, umuntu ntafite inkweto yambaye arakubwira ngo agiye kuguha akazi? Kuki we atabanje akakishakira, ngo akihe na we yiyiteho?”

JPEG - 122 kb
Minisitiri Kaboneka asaba abakobwa kwirinda ababashuka ngo barabashakira akazi mu mahanga

Yakomeje agira ati “Ubanze unamubaze akazi umpa ni akahe? Karagenda gate? We kumva ko umuntu agiye kuguha akazi ngo uhite wiruka, hari abo byabayeho bagenzi banyu bagerayo barakubitika, kujya kubagarura bikaba ibibazo, ugasanga barahahamutse, bakorewe ibya mfura mbi, cya kindi bashakaga nta cyo bagezeho ahubwo bafite ubumuga.”

Minisitiri Kaboneka yagaragaje ko iki kibazo gihangayikishije kandi kugira ngo gikemuke bisaba uruhare rwa buri wese, mu rwego rwo kugira ngo ababikora bafatwe babihanirwe, habungabungwe ubuzima bw’abana b’abakobwa n’abashaka amafaranga bayashake mu buryo bwemewe.

Uwimana Hamida, umukobwa utuye mu karere ka Rubavu, yemeza ko iki kibazo kigihari, aho ahamya ko hari abantu bigize abakomisiyoneri batwara abakobwa.

Yagize ati “Nkatwe duturiye igihugu cya Repubulika Iharanira Demokarasi ya Congo biracyabaho da, aho usanga hari abagabo n’abagore wagira ngo baba bafite komande z’abakobwa, baracyadushuka ariko bigenda bicika, gusa ni ikibazo gikwiye gukemurwa mu maguru mashya, haracyakenewe ubuvugizi.”

We n’abandi baturage bavuga ko hari abasohoka mu gihugu banyuze inzira zitemewe, bityo hakwiye kongerwa ubugenzuzi ku mipaka mu rwego rwo gucukumbura amakuru y’aho abakobwa bambuka baba bagiye.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE