2017-10-16 07:05:01 clouds 27o High | Kigali Rwanda

Dukurikire:
 
 

Imyaka 7 y’iterambere ridasanzwe mu mujyi wa Rusizi

Yanditswe na IMVAHO NSHYA

Kuya 2017-06-21 06:35:06

 
Share on:
 
Yasuwe:414
 
Yavuzweho:200
 
10
 
10

Abazi umujyi wa Rusizi mbere y’umwaka wa 2010, bahamya ko muri iyi myaka 7 ishize wagize impinduka mu iterambere ku buryo budasanzwe, kandi bakaba bishimira ko impinduka zitari mu myubakire myiza gusa, ahubwo n’imibereho y’abaturage yazamutse ku buryo bugaragarira buri wese.

Abatuye, abakorera n’abagenda mu mujyi wa Rusizi bavuga ko bafitiye Perezida wa Repubulika Paul Kagame ishimwe ryihariye, kuko ngo inzozi z’iterambere barotaga bazikabije, ubu umujyi wabo ukaba utatswe n’inzu z’imiturirwa, imihanda myiza, n’ibindi bikorwa remezo batatekerezaga kuzabona mu myaka ya vuba aha.

Mu bikorwa remezo by’ibanze aba baturage bishimira harimo amahoteli agezweho yubatswe ku bwinshi, isoko rishya, umuhanda wa kaburimbo uca mu mujyi rwagati, amatara yo ku mihanda mu mpande zose z’umujyi, ubucuruzi buteye imbere kandi byose bikaba bifite igishushanyombonera cy’umujyi bigenderaho.

JPEG - 178.9 kb
Mu myaka 7 ishize umujyi wa Rusizi wazamuwemo inyubako zibereye ijisho (Foto Bahuwiyongera S)

Hategekimana Fidèle, umwe mu bagenda kenshi muri uyu mujyi, yagize ati “Uko imyaka itaha ni ko n’uyu mujyi urushaho gutera imbere kubera imiyoborere myiza iri mu gihugu ituma umutekano uhora usesuye, abaturage bakarwana no kwiteza imbere gusa.

Iyo urebye ukuntu uyu mujyi urimo uzamuka urabona ko bishimishije. Amahoteli menshi hirya no hino uhereye mu mujyi rwagati kugeza kuri Rusizi ya mbere, imihanda myiza irimo kaburimbo, amagorofa azamuka mu mujyi n’inyubako y’isoko igiye kuhuzura, kuba ucanirwa mu mpande zawo zose, n’ibindi, byose birerekana umujyi uhinduka uko bwije n’uko bukeye.”

Uwitonze Furaha uhacururiza na we yemeza ko uyu mujyi intambwe uteye mu iterambere muri iyi myaka 7 ya manda ya Perezida Kagame ishimishije cyane, akifuza kuwubona mu yindi myaka 7 iri imbere.

Yagize ati “Maze igihe nshururiza muri uyu mujyi ariko urebye inyubako zimaze kuhazamuka mu gihe gito ugereranyije n’uko umujyi wari urutoki gusa muri 2010 ariko ukaba ugaragaza amazu akomeye gusa, yaba ayo guturamo, yaba n’ayo gucururizamo, n’ibindi, urujya n’uruza rw’abawugendamo ubu utabonaga mbere n’irindi terambere ryose tubona, nifuza kuwubona mu yindi myaka 7 iri imbere, uzaba umeze nka Kigali y’ubu.”

Ngabonziza Jean Bosco, umuyobozi w’urugaga rw’abikorera muri aka karere, avuga ko iterambere ry’umujyi rishimishije rikaba riterwa n’ubufatanye busesuye hagati ya Leta n’abikorera, rituruka ku miyobrere myiza irangajwe imbere na Perezida Paul Kagame, iha abikorera ijambo, akavuga ko bazakomeza gukora ku buryo uyu mujyi ukomeza kugenda uhindura isura uko imyaka izajya ishira indi igataha.

Umuyobozi w’aka karere Harelimana Frédéric, na we ashimangira ko iyi myaka 7 ishize yabaye iy’iterambere ridasanzwe, agasaba abatuye uyu mujyi gukomeza guharanira iterambere ryawo no gukomeza kuwusukura ku buryo uzajya ugenda urushaho kuba mwiza kuko wakira abawugana buri munsi, baba abanyarwanda cyangwa abanyamahanga.
BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE