2017-11-17 14:59:33 clouds 27o High | Kigali Rwanda

Dukurikire:
 
 

Mukura na Kiyovu zazize abakinnyi b’abana kandi batitanga- Umunyezamu Mazimpaka

Yanditswe na IMVAHO NSHYA

Kuya 2017-06-18 11:45:18

 
Share on:
 
Yasuwe:653
 
Yavuzweho:200
 
10
 
10

Shampiyona ya 2016-2017 iheruka gusozwa yasize amateka kuri amwe mu makipe y’ubukombe nka Kiyovu Sports yamanutse mu cyiciro cya kabiri na Mukura VS itaritwaye neza.

Mu gusesengura icyo aya makipe yazize, Imvaho Nshya yaganiriye na Mazimpaka Andre, umunyezamu wakiniye aya makipe yombi mu bihe bitandukanye, agaruka cyane kuri Mukura yakiniye ari kapiteni umwaka ushize.

Mazimpaka ahobora kwerekeza muri AS Kigali aho agombaga kuyisinyira amasezerano y’imyaka ibiri kuri miliyoni 3.5 n’umushahara w’ibihumbi 350, gusa Perezida wa Mukura, Nizeyimana Olivier yari yiteguye kumuha miliyoni 3.5 n’umushahara w’ibihumbi 400 ngo agume muri Mukura ariko akifuza kujya mu ikipe itwara ibikombe.

JPEG - 191.9 kb
Mazimpaka Andre wari kapiteni wa Mukura wagaragaje impamvu iyi kipe ititwaye neza umwaka ushize w’imikino (2016-2017)

Ikiganiro kirambuye Imvaho Nshya (IN) yagiranye na Mazimpaka Andre (Mazimpaka).

IN:Tuguhaye ikaze

Mazimpaka: Murakoze cyane

IN: Mu gutangira, umukino wa nyuma wa shampiyona mwawutsinzwemo na Kirehe FC igitego 1-0 nyamara mwari mwasabwe kurokora Kiyovu. Byabagendekeye bite?

Mazimpaka: Twarawutsinzwe nk’uko n’izindi zagiye zigenda nabi tukazitsindwa mu buryo butumvikana. Muri rusange twagize umwaka mubi.

Nta muntu dukorera, ibyo abantu bavuze ngo twakoreraga Kiyovu, ibyo ni amagambo y’abantu n’abafana ariko ababivugaga bari kubanza kubitekereza neza. Shampiyona twayitangiye nabi, dushaka kuyisoza neza nabyo biranga kandi hari abasoje amasezerano bashakaga kujyenda hari icyo basigiye Mukura.
IN: Mbere yo kujya yindi ngingo, ni iyihe impamvu yatumye ujugunya mu bafana umwenda wa Mukura nyuma y’umukino wa Kirehe FC

Mazimpaka :Nta mpamvu yihariye, ni uko ahubwo nabonye ari yo mpano naha abakunzi bacu.

IN: Hari abavuga cyane ko Mukura yapfuye kubwa Okoko (watangiranye na shampiyona) abandi bati Minnaert yarayizambije. Ku bwawe Mukura yapfiriye he?

Mazimpaka: Ni mujye mureka kuvanga ibintu. Ntabwo Mukura yapfuye kubwa Okoko cyangwa se kwa Minnaert cyangwa nde, oya rwose.

Hari ikindi ku mutima nshaka kubwira ababishinzwe, Mukura ni ikipe ihangana, ikwiye kugira abantu b’abagabo, ntabwo ari ishuri ry’umupira w’amaguru. Mukura ikwiye gushaka abantu b’abagabo bazaza gutwara igikombe. Ibi ndabivuga mbabaye. Dukwiye abakinnyi bazi icyo gukora. Mukura ikwiye kugura abakinnyi b’amakipe ari hejuru yayo niba ishaka igikombe.

IN: Tuvuge se ko abakinnyi baguzwe cyane cyane abavuye muri Rwamagana City FC batagaragaje ishyaka no gukura mu mutwe?

Mazimpaka: Si icyo nshaka kuvuga (ngo nibasire aba Rwamagana gusa) ahubwo hari abantu mbona badakuze mu mutwe, kandi Mukura ikwiye abagabo bahatanira igikombe kuko ari ikipe nkuru byanga byakunda.

IN: Uri umwe mu bantu bari bafite ijambo muri iyi kipe, utirengagije ko ari ikipe ihemba amafaranga make, ni iyihe nama wabagira kugira ngo babe ikipe byibuze itanga ibyishimo?

Mazimpaka: Biragoye kwemeza ko kuri uyu munsi umukinnyi yava muri APR FC, AS Kigali ngo aje Mukura guhembwa ibihumbi 200 ntibishoboka. Icyo nzi Mukura ifite umuyobozi mwiza (Perezida Nizeyimana Olivier) ukunda ikipe, abamuri hafi bamwegere bareke kumutererana. Icyo nzi ubushobozi arabufite yabikora kuko n’utari uwo muri APR FC yamuzana.

IN: Wumva bazana umutoza umeze gute?

Mazimpaka:Mukura ikeneye igikombe, bivuze ko ikeneye umwe mu bigeze gutwara igikombe, mu Rwanda barahari no hanze. Byibuze ba bantu batoje imikino y’amakipe yabaye aya mbere cyangwa yitwaye neza iwayo bafite inyota yo gusohoka n’iy’igikombe. Ku buryo yafata abantu akabashyira ku rundi rwego, abereka ko nawe yabigezeho.

Ikindi cy’ingenzi ni ukuzana umutoza wakumvikana n’abakinnyi kandi asabana nabo.

IN: Byararangiye ariko reka mbigarukeho, Ivan Minnaert yarabatoje ntibyamuhira, ubona ari he yagize intege nke?

Mazimpaka: Uriya mugabo yaje aje gusenya. Ku isi yose nzima nta kipe igira ba kapiteni barindwi, umukinnyi azubaha nde areke nde? Niba turi ba kapiteni barindwi, umukinnyi azumva nde? Twari barindwi, nta muntu wabwira ngo tanga umupira uku. Mu mwaka wabanje twari ba kapiteni babiri bubashywe wababwira ngo muze bakakumvira ariko ubu byari byarabaye “Ka gatambaro k’abana”.

Ikindi namugaya ntiyari azi kudupanga, ntiyari wam muntu ugirwa inama, ntiyumvaga ko dufite uruhare ku mukino, yari kujya yumva ibitekerezo byacu byibuze ku rugero rwa 60% ariko we nta gitekerezo yumvaga, byatumaga yikorera ibyo ashatse. Nyamara n’abo batoza bakomeye ba Nshimiyimana Eric bagisha inama, ariko we byabaga ari ibintu bye akadushyira mu kibuga nk’imifuniko bakinisha dame.

IN: Wabaye umukinnyi wa Kiyovu Sports igihe kirekire, shampiyona yarangiye, ubu igiye kujya mu cyiciro cya kabiri wabyakiriye gute?

Mazimpaka: Kiyovu ni ikipe y’amateka nta n’umwe utakwifuza kuyikinamo ya kipe yakugura miliyoni 5. Kiyovu ni ikipe yo mu mujyi, ni ikipe nkuru. Birababaje, gusa navuga ngo bihangane aho igiye turayifuriza kuzagaruka vuba ariko tuzanayikumbura.

IN: Ubona Kiyovu yarahuye n’ikihe kibazo, ni umutoza cyangwa ni ibyo gukinisha abana?
Mazimpaka: Kiyovu yacu yari itandukanye n’iyi .Iriya yari ishuri ry’umupira, bari abana nyine, kandi shampiyona ni Marato abana bageraho bakananirwa bitandukanye n’abantu b’abagabo. Bazize kutagira abantu b’abagabo bazi icyo bakora, bafite ishyaka.Mbese baciye abafana intege.

Kiyovu ifite imbaraga zishoboka igisigaye ni ukongera kwisuganya ku buryo shampiyona izaza ikagerageza.

IN: Abayobozi se bo buriya nta ruhare bagize ?

Mazimpaka: Na komite na yo yatumye ikipe ititwara neza, buri munsi ngaho perezida yeguye, ngaho yagiye, na byo hari ukuntu byasubije inyuma iyi kipe.

Gusa ikibazo njye mfite ni icy’abakinnyi b’abana bakoraga ibintu ukabona n’iby’abana nta shyaka, nta bwitange.

IN: Hari ubutumwa wagenera abafana ba Mukura wahoze ubereye kapiteni ?

Mazimpaka: Abafana bafite ukuri, ntabwo ushobora gutsindwa imikino irenga 9 muri shampiyona uvuge ngo umufana azagaruka. Ibi mbivuze nk’uwari kapiteni wa Mukura, abakinnyi bose bagiye mu kiruhuko bagende bigaye, nta kintu bamariye Mukura , habe na gito. N’abazaba bahari cyangwa n’abazagenda, tugerageze twubahe akazi ka kandi kadutunze. Niba twarahisemo gukina tubikorane ishyaka n’imbaraga ntabyo kujenjeka.

Abakinnyi ba Mukura niba hari uganira n’umufana amusabe imbabazi, twababaje abafana bikomeye, kandi n’ibyishimo twabahaye umwaka ushije wabonaga ko baza ari benshi ariko wabababaza bakagenda. Umwaka utaha umukinnyi wese uzaba ari muri Mukura yumve ko agomba guha ibyishimo abafana bacu basanzwe ari beza , bakunda abakinnyi babo.

IN: Turagushimiye

Mazimpaka: Murakoze namwe.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE