2017-12-11 14:03:29 clouds 27o High | Kigali Rwanda

Dukurikire:
 
 

Rutsiro:Igihingwa cy’ibirayi cyibasiwe n’indwara itazwi

Yanditswe na IMVAHO NSHYA

Kuya 2017-06-16 07:16:03

 
Share on:
 
Yasuwe:87
 
Yavuzweho:200
 
10
 
10

Abahinzi b’ibirayi bo mu murenge wa Mukura mu karere ka Rutsiro, batewe impungenge n’indwara yateye mu birayi bahinze ku materasi yo mu kagari ka Mwendo, bamwe bavuga ko batayizi, abandi bakayita Kirabiranya.

Aba baturage bavuga ko niba nta gikozwe mu maguru mashya ngo bashobora kubura umusaruro bari biteze, kuko ikirayi cyafashwe n’iyi ndwara kidatanga umusaruro.

Musinga Elie, umwe muri abo bahinzi, yagize ati “Twateye ibirayi bimwe byanga kumera, ibyameze ntibijya hejuru, ibindi birimo kuma amababi, ibindi birimo kubora igiti, iyo tubiranduye dusangamo udukoko tumeze nk’inda.”

Ku rundi ruhande bamwe mu baturage barahamya ko yaba ari Kirabiranya y’ibirayi, kuko ngo babona iyi ndwara ifitanye isano na Kirabiranye isanzwe imenyerewe ku gihingwa cy’urutoki cyangwa ibigori.

JPEG - 215.2 kb
Indwara yateye mu birayi itarwanyijwe hakiri kare yatuma umusaruro uba muke

Nuwumuremyi Jeanine, umukozi w’ikigo cy’igihugu gishinzwe ubuhinzi n’ubworozi mu ntara y’Uburengerazuba, yabwiye Imvaho Nshya ko iyi ndwara abaturage bakunze kwita Kirabiranya ari indwara yo kuma iterwa na bagiteri (Bacterie), akaba agira aba baturage inama yo gusura imirima yabo, bagakuramo ibyafashwe.

Yagize ati “Iyi ndwara abaturage bakunda kuyita kirabiranya, ariko ni indwara iterwa n’udukoko duto bita bagiteri, tukaba dusaba abaturage b’abahinzi bose kuzajya basura imirima yabo buri munsi kuko iyi ndwara nta muti igira, kandi nta n’ubwo ikingirwa, ahubwo ibyarwaye bisaba kurandurwa umurima ukongera ugaterwamo indi myaka.”

Yakomeje atangaza ko iyi ndwara ikunze gukururwa na bamwe mu bahinzi badakurikiza amabwiriza y’ubuhinzi.

Ati “Iyi ndwara hari igihe ikururwa nuko abahinzi batahinduranyije ibihingwa, ugasanga basaruye ibyo birayi bakongera bakabisubizamo. Turasaba ko bazajya bahinduranya ibihingwa kuko ari wo muti wonyine kandi bakanubahiriza inama bagirwa n’abagoronome.”

MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE