2017-12-11 14:03:29 clouds 27o High | Kigali Rwanda

Dukurikire:
 
 

Rwamagana: Abaturage biyubakiye ibyumba by’amashuri 24

Yanditswe na IMVAHO NSHYA

Kuya 2017-06-15 07:40:21

 
Share on:
 
Yasuwe:61
 
Yavuzweho:200
 
10
 
10

Abaturage bo mu midugudu 24 yo murenge wa Mwurire barishimira ko abana babo b’inshuke batazongera kubura aho bigira, kuko biyubakiye ibyumba by’amashuri bazajya bigiramo, muri gahunda yo kwishakamo ibisubizo.

Abaturage bo muri iyo midugudu bemeza ko nyuma yo kwiyubakira ibi byumba by’amashuri aho buri mudugudu ufite icyumba cy’ishuri, banihembera abarimu, ku buryo abana babo biga babikesha imbaraga z’ababyeyi babo.

Mutsinzi Aloys, umwe mu batuye muri iyi midugudu, yagize ati “Ishuri twiyubakiye riradufasha cyane kuko rituma abana bacu batandagara ngo birirwe mu muhanda, mbere wasangaga umubyeyi yirirwana n’umwana haba mu murima cyangwa se mu kandi kazi akora, ariko ubu byaratworohereje twese abana bajya ku ishuri ababyeyi nabo bagakora akazi kabo neza badafite impungenge z’abana biriwe mu rugo ntacyo bakora.”

JPEG - 207.1 kb
Buri mudugudu wubatswemo icyumba cy’ishuri nk’iki (Foto Hakizimana Y)

Mukashema, umubyeyi w’abana 3 utuye mu mudugudu wa Mpinga, nawe yagize ati “Mu mudugudu wacu twumvise ko hari indi midugudu yiyubakiye ishuri ry’inshuke dutangira buhoro buhoro, buri rugo rwagiye rutanga amafaranga ibihumbi 2 yo kugura ikibanza, ibyo byatangiye mu mwaka wa 2014, umwaka wakurikiyeho batwatse amafaranga 100 batangira kubaka umwaka washize na bwo buri rugo rwatanze amafaranga 2400 yo gusakara no gukinga ishuri kuko aho riri twanubatseho ibiro by’umudugudu wacu.”

Umunyamabanga Nshingwabikorwa w’Umurenge wa Mwurire Mukashyaka Chantal, avuga ko ibyakozwe byose byashingiye ku bukangurambaga bwakorewe abaturage, ariko nabo babyumva vuba, babigiramo ubushake, none ubu abana babo bafite aho bigira hameze neza.

Yakomeje agira ati “Mu midugudu 30 hasigaye imidugudu 6 gusa ni yo itaragira ishuri ry’inshuke kandi nabo bari mu nzira zo kwiyubakira, aya mashuri yose ni ay’abaturage nta bufasha bwa Leta na buke burimo kandi abana bayigiramo.

Ubu abaturage bateye intambwe yo kutazategereza inkunga ziturutse hanze yabo ngo zibakorere ibyo na bo bashobora kwikorera, n’ubwo bitwara igihe ariko nabo bashimishwa no kuba bitangiriza igikorwa bakagisoza ntawe batezeho amaboko.”

Abaturage b’i Mwurire bemeza ko bakataje mu kwishakira ibisubizo kuko aho barangije kubaka ishuri ry’inshuke, abana bishyurirwa n’ababyeyi, ariko abari mu cyiciro cy’abakene batabasha kubona amafaranga yo kwishyurira abana babo barasonerwa bakigira ubuntu.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE