2017-10-17 06:58:11 clouds 27o High | Kigali Rwanda

Dukurikire:
 
 

Rubavu:Bishimiye kwegerezwa gahunda zo gupima Sida n’igituntu ku buntu

Yanditswe na IMVAHO NSHYA

Kuya 2017-06-15 06:01:26

 
Share on:
 
Yasuwe:35
 
Yavuzweho:200
 
10
 
10

Bamwe mu baturage batuye mu kagari Mbugangari mu murenge wa Gisenyi, mu karere ka Rubavu, bishimiye igikorwa cyo kubegereza gahunda zo kwipimisha Sida n’igituntu ku bushake kandi ku buntu.

Aba baturage bavuga ko izo serivisi z’ubuzima zabegerejwe ari ingirakamaro, cyane ko bikorwa ku buntu, aho bemeza ko zabafashije kumenya uko bahagaze, usanze arwaye akamenya uko akurikirana gahunda zo kwivuza, naho usanze ari muzima na we agafata ingamba zo kwirinda.

Birikora Patrice, umukozi ushinzwe kurwanya indwara ya Sida ndetse n’igituntu mu kigo Vision Jeunesse Nouvelle, avuga ko bategura ibi bikorwa byo gupima ku bushake no ku buntu abaturage babikora bagamije kubungabunga ubuzima bw’abaturage, kuko uwo basanze arwaye bamugira inama yo kwivuza neza, naho uwo basanze ari muzima bakamugira inama yo kwirinda.

Yagize ati “Ibikorwa nk’ibi turabitegura ku buntu tugamije kumenya abaturage bakomeje kwandura, aho tubagira inama y’uko bakwifata igihe basanze baranduye, n’ingamba bakwiye gufata mu rwego rwo kwirinda ko iki cyorezo cyakomeza kworeka imbaga y’abatari bake baba bafite ibyago byo kwandura, kandi ibikorwa nk’ibi bizakomeza.”

JPEG - 220.2 kb
Serivise zo gupima Sida n’igituntu zatanzwe ku buntu

Bamwe mu baturage baganiriye n’Imvaho Nshya, bavuga ko impamvu bafashe icyemezo cyo kujya kwipimisha ari ukugira ngo bamenye uko bahagaze, bityo binabahe uko bakwiye kwitwara.

Mushimiyimana Clementine, umwe mu bipimishije ku bushake aragira inama abantu bumva ko kwipimisha nta cyo bimaze, gucika kuri iyo myumvire kuko ngo uwipimishije amenya uko ahagaze bikanamufasha gufata ingamba z’ubuzima bwe.

Yagize ati “Njye naratinyutse kandi mbikora byibuze inshuro imwe buri mezi atatu, kwipimisha ni ibintu byiza bigufasha kumenya uko uhagaze nyuma yo kubimenya uhabwa amahirwe yo kugirwa inama bitewe n’uko bihagaze, turashima Leta y’ubumwe ishyiraho gahunda nk’izi zikagera k’ubyifuza wese nta kiguzi asabwe, ahubwo ku bushake.”

Muri iki gikorwa cyo gupima ku bushake Sida ndetse n’igituntu, imibare yatanzwe n’ushinzwe kurwanya Sida ndetse n’igituntu mu muryango Vision Jeunesse Nouvelle, igaragaza ko hapimwe abantu 71, biza kugaragara ko babiri muri bo ari bo banduye agakoko gatera Sida.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE