2017-12-12 14:14:08 clouds 27o High | Kigali Rwanda

Dukurikire:
 
 

Kirehe:Urutoki ruhinze ku gice cya hegitari rwafashwe n’inkongi y’umuriro

Yanditswe na IMVAHO NSHYA

Kuya 2017-06-13 11:37:06

 
Share on:
 
Yasuwe:200
 
Yavuzweho:200
 
10
 
10

Mutabazi Daniel, umuhinzi-mworozi utuye mu kagari Rugarama, umurenge wa Mushikiri mu karere ka Kirehe, avuga ko yatewe igihombo no kuba abantu bataramenyekana baratwitse urutoki rwe, rwari ruhinze ku buso bungana n’igice cya hegitari, rwose rugakongoka.

Amakuru Imvaho Nshya ikesha abaturage bo mu mudugudu wa Kamarashavu, akagari ka Rugarama, bahuruye baza kuzimya inkongi y’umuriro yari yafashe urutoki rw’uyu Mutabazi Daniel, agaragaza ko iyi nkongi yibasiriye urwo rutoki yatangiye ahagana i saa yine za mu gitondo, ku wa 11 Kamena 2017.

Urutoki rw’uyu musore rugizwe ahanini n’insina z’injagi, rwari rusasiye, ndetse rwaratangiye gutanga umusaruro, dore ko hari hashize igihe kigera ku mwaka asarura, yatangiye kwinjiza amafaranga atubutse.

JPEG - 357.8 kb
Urutoki rwakongotse rwari rwaratangiye gutanga umusaruro ushimishije

Mutabazi Daniel yabwiye Imvaho Nshya ko gutwikirwa urutoki byamutunguye, ku buryo byanamugoye kugereranya igihombo bimusigiye, anavuga ko nta we akeka ko yaba yarutwitse, kuko nta muntu bari bafitanye amakimbirane yihariye.

Yagize ati “Nari nahahoze mu gitondo ndukorera, mu ma saa tanu z’amanywa ni bwo bampamagaye bamwira ngo hari gushya, ariko nahageze nsanga nta kintu naramira. Bamfashije turazimya ariko rwari rwahiye.

Ndabona uwabikoze yaba yabikoreye ubugome, kuko aha ni ho nakuraga amafaranga, nasaruraga kenshi nkagurisha, ariko ubu urabona ko ari nko kunsubiza hasi cyane.”

Hari bamwe mu baturage bageze aho iyi nkongi y’umuriro yabereye bakeka ko uwarutwitse yabikoze ari nk’ubugome kuko urutoki rw’uyu musore Mutabazi Daniel rwari hagati y’izindi, ariko rukaba ari rwo gusa rwahiye.

Kamali Jean Baptiste, umuyobozi w’umudugudu wa Karamarashavu yabwiye Imvaho Nshya ko ugutwika nk’uko ari bwo bwa mbere akubonye muri aka gace. Icyakora asanga ubuyobozi bukwiye gushyira imbaraga mu gukangurira abaturage kwirinda gutwika imisozi.

Yagize ati “Baduhamagaye kuri telefoni, batubwira ko ari urwo rutoki rw’uwo musore rwahiye. Nta we dukeka waba wabikoze, kandi ni bwo bwa mbere twakumva ibintu byo gutwika nk’uko muri aka kagari kacu. Urumva ko hakenewe ko abaturage bigishwa ububi bwo gutwika n’izi nkongi z’umuriro.”

Gatsinzi Ananie, umunyamabanga Nshingwabikorwa w’umurenge wa Mushikiri, we yabwiye Imvaho Nshya ko gutwika urutoki rwa Mutabazi Daniel bishobora kuba byabaye nk’impanuka.

Avuga ko kugeza ubu nta we uramenyekana waba wateye iyi nkongi, cyane ko na nyir’uru rutoki rwafashwe n’inkongi y’umuriro avuga ko nta we bari bafitanye amakimbirane akeka ko yaba ari we wabikoze.

Icyo ubuyobozi bwihutiye gukora ni ukwihanganisha Mutabazi Daniel, no gusaba abaturage kwirinda ibintu byose byateza inkongi z’umuriro.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE