2017-10-16 07:05:01 clouds 27o High | Kigali Rwanda

Dukurikire:
 
 

Abanyarwanda baba hanze bishimira ko bahawe Agaciro

Yanditswe na IMVAHO NSHYA

Kuya 2017-06-12 15:19:32

 
Share on:
 
Yasuwe:88
 
Yavuzweho:200
 
10
 
10

Amateka y’u Rwanda rwa kera yerekana ko Abanyarwanda bagiye batura mu bihugu duturanye bitewe n’impamvu zinyuranye. Mu gihe cy’ubukoloni Abanyarwanda bajyanywe mu bihugu byo muri Afurika yo hagati nk’amaboko abakoloni bifashishaga mu mirimo yabo y’ubuhinzi cyangwa gucukura amabuye y’agaciro.

Indi mpamvu nyamukuru ni inzara yabaye mu Rwanda rwo hambere bitewe nuko abari bashoboye gukora bari barajyanywe gukorera abakoloni ndetse n’imihindagurikire y’ikirere yabaye mu Rwanda mbere y’umwaka wa 1945.

Mu bwicanyi bwabaye mu gihe cy’ubwigenge ni bwo Abanyarwanda benshi bahunze igihugu berekezwa mu bihugu bihana imbibi n’u Rwanda bityo biba ubwa mbere, ubwo Abanyarwanda benshi batuye hanze y’igihugu.

JPEG - 149.1 kb
Abanyarwanda bo mu Burayi bishimiye kuganira na Perezida Kagame muri Rwanda Day 2017

Bamwe mu bahungiye mu bihugu duturanye, babifashijwemo n’imiryango mpuzamahanga bafashijwe kujya mu mpande zose z’isi. Nuko Abanyarwanda bakwiriye isi.

Mu gihe cya Repubulika ya mbere n’iya kabiri, Ambasade zashyirwaga mu bihugu zari zifite intego nyamukuru yo kuneka izo mpunzi zahunze guhera 1959, ngo bamenye ubuzima bwabo ndetse nuko babayeho.

Uwashakaga kujya hanze hakagira imishyikirano agirana nabo, yitabaga Perezidansi ya Repubulika mu biro bishinzwe iperereza. Ubuhamya bw’abantu batandukanye ni uko nta muntu wari kubonana n’umuvandimwe we wabaga hanze; Ambasade yabaga ikureba.

Ibi byarebaga umuntu usanzwe cyangwa umunyacyubahiro. Twese tuzi imbaraga Kiliziya Gatorika yari ifite kuri Repubulika ya mbere n’iya kabiri, ariko ibi ntibyatumaga Musenyeri Yohani Batista Gahamanyi ashobora gusuhuza mukuru we Michel Kayihura wari warahungiye mu gihugu cya Kenya kuko yari umusushefu mu gihe cya cyami.

Undi twatangaho urugero, ni Esther Mujawayo umwanditsi w’ibitabo warokotse Jenoside, wari umuturage usanzwe, akimwa uburenganzira igihe kirekire bwo gusohoka igihugu, aho abuboneye akagera mu Bubiligi, agarutse mu Rwanda yagiye kwitaba Elie Sagatwa wari umujyanama wa Perezida Habyarimana, abazwa impamvu yasuhuje Abanyarwanda yasanze mu Bubiligi.

Nta bwo Abanyarwanda babaga hanze bahawe agaciro na Repubulika ya mbere ndetse n’iya kabiri, ahubwo inzego za Ambasade zari zibereyeho kubaneka ndetse no kubakumira mu gihe babonye akazi gasaba gushyigikirwa (recommendation) n’igihugu bavukamo.

Ng’uko uko Fabien Singaye, muramu wa Kabuga Felisiyani yari ashinzwe kumenya imibereho ya buri munsi y’Abanyarwanda babaga mu Burayi nubwo yabaga akorera mu Busuwisi.

Nyuma ya Jenoside yakorewe Abatutsi, Abanyarwanda bagiye hanze bikubye inshuro nyinshi. Mu bagiye hanze kandi ntitwakwibagirwa ko harimo umubare munini w’abari bamaze kurokoka Jenoside yakorewe Abatutsi, benshi bari baratereye igihugu icyizere. Bamwe babashije kongera kugira umutima wo kugarukira u Rwanda nyuma y’imyaka 10, 15 ndetse na 20, dore ko hari n’abataragaruka mu gihugu.

Guhuriza hamwe Abanyarwanda bakaganira n’umukuru w’igihugu mu cyiswe “Rwanda Day” byafashije benshi cyane cyane ababaga barabeshywe uko u Rwanda ruhagaze. Muri abo hari abana bahunze bakiri bato ababyeyi babo baragize uruhare muri Jenoside cyangwa se baracengewe na politiki y’ivangura ndetse n’abagiye hanze baziko u Rwanda rutazongera kuba u Rwanda.

Igihe cyose Umukuru w’Igihugu yabaga ari hanze akenshi yakundaga kwegera Abanyarwanda akababwira aho igihugu kigeze. Ndibuka mu mwaka wa 2006, Perezida Kagame abonana n’Abanyarwanda mu Busuwisi bakabaza ibibazo byinshi kuri Gacaca, dore ko bahabwaga amakuru mabi n’abari bakwiye gukurikiranwa n’iyo Gacaca uruhare runini mu mateka mabi y’iki gihugu, batangira gusebya u Rwanda, wasoma amakuru ku Rwanda ugasoma amakuru mabi gusa.

Guhera mu mwaka wa 2010, “Rwanda Day” iba buri mwaka igamije gusubiza Agaciro Abanyarwanda cyane cyane ko no mu nama y’igihugu y’Umushyikirano Abanyarwanda baba hanze baba bahagarariwe kandi bagahabwa ijambo.

Nk’uko nabo bakunda kubyivugira babaye intara ya gatandatu y’u Rwanda. Ibi nta wabishidikanya kuko bagira uruhare rukomeye mu bikorwa by’iterambere ry’igihugu, cyane cyane imibereho myiza y’abaturage.

Leta y’u Rwanda igira gahunda nyinshi zo gusubiza Agaciro Abanyarwanda baba hanze, gahunda ya Rwanda Day yiyongera kuri serivisi zikorwa na Ambasade mu korohereza Abanyarwanda mu kugira uruhare mu guteza imbere uruhare rwabo.

By’umwihariko ku bahunze bakiri hanze bataragaruka mu Rwanda, hari gahunda yihariye, aho woroherezwa kuza mu gihugu ugasura imiryango ukongera ugasubirayo. Hafi ya bose basubirayo bagiye gutahura imiryango yabo baba basize inyuma.

Umunyarwanda aho ari hose icyo yaba akora cyose agomba guharanira ishema ndetse n’agaciro k’u Rwanda. Kuba hari aho tugeze ni ukubera politiki nziza, dukomeze kubiharanira tunarinda ibimaze kugerwaho.

KAMBANDA NOEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE