2017-12-12 14:14:08 clouds 27o High | Kigali Rwanda

Dukurikire:
 
 

U Rwanda rwishimiye itorwa ry’itegeko rica amashashi muri EAC

Yanditswe na IMVAHO NSHYA

Kuya 2017-06-08 05:23:09

 
Share on:
 
Yasuwe:110
 
Yavuzweho:200
 
10
 
10

Ubuyobozi bw’Ikigo cy’Igihugu cyita ku bidukikije (REMA) buratangaza ko bwanyuzwe no kuba abadepite bagize Inteko Ishinga Amategeko y’Umuryango w’Afurika y’Uburasirazuba (EALA) baratoye itegeko rica amashashi kuko u Rwanda rwari rubangamiwe n’ibihugu bituranye bitagiraga iri tegeko.

Ku wa 01 Kamena 2016 ni bwo abadepite bagize Inteko Ishinga Amategeko y’Umuryango w’Afurika y’Uburasirazuba (EALA) batoye itegeko rica burundu ikoreshwa ry’amashashi mu bihugu bigize uyu muryango.

Iri tegeko ryari rimaze imyaka itanu rigibwaho impaka n’aba badepite ariko rikaba ryaragendaga ribangamirwa na bamwe mu batari baryishimiye baharanira inyungu zabo bakura mu bucuruzi bw’amashashi.

JPEG - 160.6 kb
Colette Ruhamya umuyobozi wa REMA

Mu kiganiro cyihariye Imvaho Nshya yagiranye n’Umuyobozi mukuru w’Ikigo cya REMA, Eng. Colette Ruhamya, yavuze ko bishimiye itorwa ry’iri tegeko kuko rizafasha u Rwanda rwari rwaciye amashashi ariko rukabangamirwa n’ibihugu bituranye bikiyemera, bityo akinjira mu buryo bwa magendu.

Eng. Colethe Ruhamya yagize ati “Iyo urinda ibidukikije, abo muturanye batabikora nta bwo bikorohera. Mwajyaga mubibona duhangana n’amashashi ava muri ibyo bihugu, urumva rero iyo bayahagaritse tukabyumva kimwe biradufasha. Burya iyo uciye ikintu aho gituruka ni bwo bigufasha mu kubishyira mu bikorwa, ariko iyo bigihari muba musa n’abahangana n’abantu benshi kandi bafite ubwenge nkawe.”

N’ubwo iri tegeko ryatowe, ntabwo rizahita rishyirwa mu bikorwa, kuko rizabanza gusinywa n’abakuru b’ibihugu bagize Umuryango w’Afurika y’Uburasirazuba, EAC.

Eng. Ruhamya, avuga ko igihe rizaba ryemejwe burundu bizafasha no kubungabunga imigezi imwe n’imwe ihuriweho n’ibi bihugu.

Yagize ati “Babishyize mu bikorwa twumva byadufasha kurushaho, nk’iyo migezi tuba turengera kandi imwe tuyifatanyije, iyo mufashe ingamba mwese biroroha.”

U Rwanda rwo rumaze igihe kinini rwaraciye amashashi, ariko ntibibuza ko hari abayacuruza mu buryo bwa magendu nubwo REMA na Polisi y’Igihugu badahwema gufata ababikora ndetse bakabihanirwa.

Amasashi menshi yinjira mu Rwanda mu buryo bwa magendu aturuka muri Uganda no mu Burundi.

Eng. Colette Ruhamya avuga ko kuba amashashi atabora iyo ari mu butaka bituma amazi yimvura atinjira mu butaka uko bikwiye, bigatuma imyaka itera neza, amashashi iyo yagiye mu mazi y’inzuzi agira ingaruka ku rusobe rw’ibinyabuzima biba mu mazi cyangwa se amatungo ayanywa. Ikindi ni uko ashobora guteza umwanda kuko atabora.

MUVUNYI ARSENE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE