2017-11-23 18:23:19 clouds 27o High | Kigali Rwanda

Dukurikire:
 
 

Abagore bo muri Kongo bigiye k’u Rwanda gutegura amatora anyuze mu mucyo

Yanditswe na IMVAHO NSHYA

Kuya 2017-06-05 10:07:19

 
Share on:
 
Yasuwe:56
 
Yavuzweho:200
 
10
 
10

Abagore basaga 120 baturutse mu mujyi wa Goma muri Repubulika iharanira Demokarasi ya Kongo (RDC), basuye akarere ka Rubavu, muri gahunda yo kwigira k’u Rwanda uko amatora ategurwa, hirindwa imvururu zitewe n’imitegurire idahwitse.

Nyuma y’ibisobanuro byimbitse bahawe, aba bagore bibumbiye mu muryango uharanira amahoro (Dynamique femme), bavuga ko hari byinshi bungutse bizabafasha mu kugaragaza uruhare rw’umugore mu gutegura neza amatora hirindwa imvururu zikunze gukurikira amatora.

Kaliza Consolée, uhagarariye abagore mu ntara ya Kivu y’Amajyaruguru, yagize ati “Nyuma yo gusobanurirwa na bagenzi bacu uko amatora ategurwa akanashyirwa mu bikorwa nta mvururu zibaye, twasanze hari byinshi tugomba kwigira k’u Rwanda, harimo guha umugore uburenganzira bwo gutorwa no gutora yisanzuye, gukumira icyakurura imvururu mu matora, kandi umugore akagira uruhare rugaragara mu gukumira izo mvururu, kwirinda ruswa, kutagendera ku moko n’uturere mu guhitamo abakandida n’ibindi.”

JPEG - 169.9 kb
Abagore bo muri Kongo n’abo mu Rwanda bamaze kungurana ibitekerezo ku guharanira amahoro mu bihugu byabo

Aba bagore bakomeje bagaragaza ko iwabo mu bihe byo kwitegura amatora, mu matora hagati, ndetse no mu bihe byo gutangaza amajwi bahura n’ibibazo bikomeye, by’imvururu zihitana ubuzima bw’abantu zikanasenya byinshi, ibi bakaba bifuza kubikumira bagendeye ku bunararibonye bw’u Rwanda.

Uru ruzinduko rwateguwe na komisiyo y’ubutabera n’amahoro ya Diyosezi Gaturika ya Nyundo, ku bufatanye n’iya Goma muri RDC, muri gahunda yo kuzamura ijwi ry’umugore mu kwamagana na gukumira imvururu n’amakimbirane ashingiye ku mitegurire n’ibiva mu matora.

Twahirwa John, uhagarariye komisiyo y’ubutabera n’amahoro muri Diyosezi Gatorika ya Nyundo, yagize ati “Abagore bo mu bihugu bikigaragaramo imvururu ziterwa n’amatora bafite uruhare mu kuzikumira.Icyo umugore ashaka n’Imana iba igishaka, abajyanwa mu mvururu bakanakoreshwa na bamwe mubanyapolitiki babi akenshi ni urubyiruko kandi ni abana babo, bagiye bababuza ntabwo imvururu zashoboka.

Turabasaba ko bakwigira k’u Rwanda kuko rwateye intambwe ikomeye isi ikwiye kureberaho.”

Umuyobozi w’akarere ka Rubavu Sinamenye Jeremie, avuga ko abagore bo muri ibi bihugu bagomba gukomeza gusangira ubunararibonye mu gushakira amahoro ibihugu byabo.

Yagize ati “Muzakomeze muhane ubunararibonye kuko ni bwo ibyo mwifuza kugeraho byakunda, impamvu u Rwanda rwageze ku ntambwe mwishimira ni uko bahisemo imiyoborere myiza.”

MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE