2017-09-21 09:07:12 clouds 27o High | Kigali Rwanda

Dukurikire:
 
 

Abatahutse bava mu mashyamba ya Kongo batishoboye bahawe inzu

Yanditswe na IMVAHO NSHYA

Kuya 2017-06-03 11:33:29

 
Share on:
 
Yasuwe:48
 
Yavuzweho:200
 
10
 
10

Imiryango y’abanyarwanda bavuye muri Repubulika iharanira Demokarasi ya Kongo batishoboye bahawe inzu zo kubamo, mu rwego rwo guteza imbere imibereho yabo.

Umuhango wo gutaha ku mugaragaro izi nzu 6 zubatswe mu murenge wa Mudende, mu kagari ka Ndoranyi, mu mudugudu wa Nyabishongo, wabaye ku wa 1 Kamena 2017.

Abenshi mu baturage bahawe izi nzu batahutse nyuma y’umwaka wa 2014, bakaba bashimira Leta y’u Rwanda yita ku baturage bose, ikabamenyera ikibateza imbere.

Musabimana Phillipe, umwe muri abo baturage bahawe inzu, yagaragaje ko yahunganye n’ababyeyi be bageze muri Kongo bitaba Imana, asigara mu buzima bubi cyane, nyuma aho atahiye Leta y’u Rwanda imwigisha imyuga, imuha n’ubufasha bw’ibanze bwo kwikorera, none akaba anejejwe cyane nuko hejuru y’ibyo byose ahawe n’inzu.

Yagize ati “Mu by’ukuri ubufasha nahawe nkigera mu gihugu bwari buhagije, ariko kuba bampaye n’inzu yo guturamo ndabishimira ubuyobozi bwiza burangajwe imbere n’Umukuru w’Igihugu Paul Kagame.”

JPEG - 137.8 kb
Buri nzu muri izi yatwaye amafaranga asaga miliyoni 7 (Foto Magarambe T)

Uyu mugore kimwe na bagenzi be baboneyeho n’umwanya wo guhamagarira abanyarwanda bakiri mu mashyamba ya Kongo gutahuka, nabo bakagerwaho n’ibyiza Leta y’u Rwanda ikomeje kugeza ku baturage bose nta vangura.

Minisitiri w’imicungire y’ibiza no gucyura impunzi, Mukantabana Seraphine, yavuze ko izi nzu zuzuye zitwaye amafaranga y’u Rwanda miliyoni 42, bazubakiye aba baturage kuko babonaga bafite ubushobozi buke, akaba ari muri gahunda yo kubafasha kubona aho baba, ariko abibutsa ko nabo bafite inshingano yo guharanira kwiteza imbere.

Yagize ati “Leta yabubakiye amazu meza ajyanye n’igihe kandi ashobora guhangana n’ibiza. Ni ahanyu kuyafata neza no kuyabyaza umusaruro, mugomba gukora cyane kugira ngo muzayashyiremo ibikibuze, ntimugomba kuyagurisha, mugomba kuyitaho no kuyakorera isuku. Ibi ni urukundo Umukuru w’igihugu abakunda.”

Mu Rwanda hose hamaze kubakwa inzu 115 z’abatahutse bava mu bihugu bitandukanye, Minisiteri y’imicungire y’ibiza n’impunzi ikaba ivuga ko zubatswe ku bufatanye n’ishami ry’Umuryango w’Abibumbye ryita ku miturire “UN Habitat”.

MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE