2017-12-11 14:03:29 clouds 27o High | Kigali Rwanda

Dukurikire:
 
 

Perezida wa Sena yasabye ingufu mu guhangana n’ikibazo cy’ubushomeri

Yanditswe na IMVAHO NSHYA

Kuya 2017-05-31 05:13:45

 
Share on:
 
Yasuwe:83
 
Yavuzweho:200
 
10
 
10

Ubwo yatangizaga inama nyunguranabitekerezo ku murimo, Perezida wa Sena Bernard Makuza yasabye inzego zinyuranye ko umurimo ugomba gushyigikirwa, abafite ubushomeri bakagabanuka mu Rwanda.

Iyi nama yabereye mu Nteko Ishinga Amategeko umutwe wa Sena ejo hashize ku wa 30 Gicurasi 2017. Yibanze ku cyateza imbere umurimo mu Rwanda, ihuza inzego zose ziteza imbere umurimo mu Rwanda.

Atangiza iyi nama, Perezida wa Sena Bernard Makuza, yibukije abahagarariye inzego zitandukanye ko urwego rw’umurimo ari rwo rugomba gushyigikirwa kuko asanga ari rwo ruzagira uruhare mu ishyirwa mu bikorwa rya gahunda y’imbaturabukungu icyiciro cya kabiri (EDPRS II) izageza muri 2018.

Makuza akaba yaragize ati “Tugomba kuzirikana ko umurimo ari ipfundo ry’Iterambere riganisha ku mibereho myiza y’Abanyarwanda”

JPEG - 233.2 kb
Perezida wa Sena, Bernard Makuza, ubwo yatangizaga inama nyunguranabitekerezo ku murimo (Foto James R.)

Perezida wa Sena Bernard Makuza avuga ko EDPRS II ikubiyemo gufasha urubyiruko kwihangira akazi, kongera ubumenyi ngiro, ubukungu, iterambere ry’icyaro, kuko ari bwo u Rwanda ruzagera ku rwego rwiza mu karere no ku rwego mpuzamahanga.

Muri iki kiganiro, Minisitiri w’Abakozi ba Leta n’Umurimo (MIFOTRA), Uwizeye Judith yavuze ko igihe kigeze kugira ngo uturere dushishikarizwe gahunda yo gushyira mu mihigo yatwo guhanga umurimo, n’imirimo iteganyijwe kuzahangwa mu mwaka w’ingengo y’imari.

Yavuze kandi ko hari gahunda yo kongera ibigo by’imyuga ndetse n’ababyigamo bikava kuri 63 bikagera kuri 394, gufasha ibyiciro by’urubyiruko n’abagore koroherezwa kubona inguzanyo n’ingwate, gufasha abashoramari kubona abakozi bafite ubumenyi n’ibindi.

Ashingiye ku bushakashatsi bwakozwe mu mwaka 2016, Murangwa Yusuf, umuyobozi mukuru w’Ikigo cy’Igihugu cy’Ibarurishamibare, avuga ko abadafite akazi mu Rwanda ubu bageze kuri 13%.2, asanga barazamuwe nuko harimo icyiciro cy’abakora akazi k’ubuhinzi badahemberwa, naho abagera kuri 16% ari bo badafite akazi mu mijyi mu gihe mu cyaro ari 13%.

Ati “Ikindi muri abo badafite akazi abagera kuri 13% ni abagore mu gihe 14% ari abagabo”.

JPEG - 280.2 kb
Minisitiri Uwizeye Judith w’Abakozi ba Leta n’Umurimo na Munyeshyaka Vincent, Umunyamabanga wa Leta muri MINALOC ushinzwe iterambere ry’abaturage (Foto James R.

Muri rusange ubushakashatsi bwa kane ku mibereho y’ingo mu Rwanda 2013/2014 bugaragaza ko Abanyarwanda 5 479 000 ari bo bafite imirimo bakora, Leta iha akazi 3% by’abantu bafite umurimo mu Rwanda, naho urwego rw’abikorera rugakoresha 97.2%.
TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE