2017-12-12 14:14:08 clouds 27o High | Kigali Rwanda

Dukurikire:
 
 

Amagare: Uwizeyimana agiye gukinira ikipe ya Lowestrates.ca muri Canada

Yanditswe na IMVAHO NSHYA

Kuya 2017-05-30 06:24:41

 
Share on:
 
Yasuwe:154
 
Yavuzweho:200
 
10
 
10

Uwari umukinnyi w’ikipe ya Benediction y’i Rubavu mu gusiganwa ku magare, Uwizeyimana Bonaventure yamaze kwerekeza mu ikipe y’ababigize umwuga ya Lowestrates.ca muri Canada.

Uyu musore w’imyaka 24 wegukanye shampiyona y’igihugu umwaka ushize wa 2016 yari amaze iminsi yitwara neza dore ko mu marushanwa ya “Rwanda Cycling Cup 2017” aherutse no kwegukana intera yitiriwe kwibuka yavaga mu Karere ka Ruhango igasorezwa i Karongi.

Nk’uko urubuga rw’iyi kipe ya Lowestrates.ca Cycling Team rwabitangaje, umuyobozi mukuru, Frédérick Gates yatangaje ko Uwizeyimana Bonaventure agomba gusanga abandi bakinnyi ahitwa Outaouais mu mujyi wa Québec agafatanya na bo kwitegura dore ko bazahita bitabira irushanwa “Grand Prix de Saguenay” isiganwa rizaba tariki 08 Kamena 2017.

JPEG - 267.1 kb
Uwizeyimana Bonaventure wegukanye shampiyona y’igihugu muri 2016 ubu ni umukinnyi wa Lowestrates.ca yo muri Canada

Uwizeyimana agiye muri Lowestrates.ca avuye mu ikipe ya Benediction yagarutse nyuma y’umwaka akinira ikipe ya Dimension Data for Qhubeka aho yari mu ikipe ya kabiri mu mwaka wa 2016.

Frédérick Gates yagize ati “Ubwo nari ndi mu Rwanda mu Gushyingo 2016 ni bwo nifuje uyu mukinnyi. Ni umukinnyi mwiza ubasha kuzamuka kandi akanafatana ku murongo (Sprint), yakinnye amarushanwa menshi mpuzamahanga mbese afite ubunararibonye buhagije, ndizera ko azagira uruhare runini mu kwitwara neza kw’ikipe yacu”.

Frédérick Gates yakomeje avuga ko kuza kwa Uwizeyimana guhuriranye n’igenda rya Edward Greene wagiye mu ikipe yo ku mugabane w’u Burayi.

Uyu muyobozi avuga ko kuba Uweziyimana agiye gukina mu ikipe yabo bizatuma umubano we n’abakunzi b’umukino w’amagare mu Rwanda utera intambwe.

Ati “Nishimiye uburyo umukino wo gusiganwa mu magare uhagaze neza ndetse n’intego yo kuwuteza imbere mu Rwanda ubwo nahasuraga, byatumye nifuza gukomeza gukorana n’u Rwanda”.

Umutoza mushya wa Lowestrates.ca , Lyne Bessette we avuga ko yishimiye kuba agiye gukorana na Uwizeyimana wegukanye shampiyona y’igihugu ya 2016.

Ikipe ya Lowestrates.ca mu mwaka ushize wa 2016 yitabiriye bwa mbere Tour du Rwanda, isoza ku mwanya wa 4 mu makipe 12 yari yitabiriye. Iyi kipe yakinirwaga n’umunyamerika, Rigg Timothy witwaye neza akegukana intera ebyiri gusa uyu mwaka yagiye mu ikipe ya Cycling Academy yo muri Israel.

Uwizeyimana Bonaventure yatangiye kwitabira amarushanwa mpuzamahanga muri 2012, muri 2014 yakoze amateka yegukana intera ya 5 muri “La Tropicale Amissa Bongo”, isiganwa rya mbere muri Afurika. Muri 2016yongeye kwigaragaza yegukana shampiyona y’igihugu.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE