2017-10-20 08:47:26 clouds 27o High | Kigali Rwanda

Dukurikire:
 
 

Ngoma-Police week:Imiryango 98 yahawe amashanyarazi

Yanditswe na IMVAHO NSHYA

Kuya 2017-05-26 05:25:53

 
Share on:
 
Yasuwe:54
 
Yavuzweho:200
 
10
 
10

Imiryango 98 yo mu mudugudu wa Kanombe, akagari ka Karenge, umurenge wa Jarama ho mu akarere ka Ngoma, yahawe umuriro w’amashanyarazi aturuka ku mirasire y’izuba, irashimira Polisi y’u Rwanda n’ubuyobozi bw’igihugu bwabakuye mu kizima, bagacanirwa.

Gutaha ibikorwa byo gushyira amashanyarazi mu ngo 98 zo mu murenge wa Jarama, bikozwe na Polisi y’u Rwanda byabaye ku wa 24 Gicurasi 2017, mu mudugudu wa Kanombe.

Ni amashanyarazi aturuka ku misarire y’izuba abaturage bahawe muri gahunda y’icyumweru cyahariwe ibikorwa bya Polisi y’u Rwanda “Police Week”.

Abayahawe babwiye Imvaho Nshya ko bajyaga bibaza uburyo bazava mu mwijima w’icuraburindi, bikababera urujijo. Bagaragaza ko kuba batagiraga umuriro byagiraga ingaruka zirimo kuba batarumvaga radiyo, gusharija za telefoni bikagorana, ndetse n’abafite abana ntibabashe kubaha umwanya n’uburyo bwo gusubira mu masomo.

JPEG - 307.9 kb
Imwe mu nzu 98 zahawe amashanyarazi akomoka ku mirasire y’izuba

Kayitesi Marie Chantal, umwe mu bashyiriwe umuriro mu nzu, avuga ko yishimira ko ubu hari gutangira kuza umwijima, agakora ku rukuta, amatara akaka.

Ati “Polisi yaduhaye umuriro w’ubuntu, ntitukigura peteroli na twa buji twadutwikiraga imyenda. Ubundi twabaga mu kizima, ariko ubu kubera ko Kagame yaduhaye amashanyarazi, turinjira mu nzu, nakora ku gikuta hakabona, icyo nshaka nkakibona. Iri ni iterambere rwose.”

Havugiyaremye Jeremie we avuga ko kuba batagiraga umuriro hari byinshi byadindiraga, ariko kuva aho baboneye umuriro iterambere ryabo rigiye kwihuta.

Ati “Twabaga mu mwijima, ariko ubu umuntu aratambuka hose habona. Ubu abana bacu bari kuva ku ishuri bagasubira mu masomo ku rumuri. Ubundi ntibabonaga uko biga kubera ko sinashobora kubona amafaranga yo kugura buje za buri joro, ariko ubu bazamenya ubwenge, kuko babasha kwiga neza.

Kandi natwe iyo bugorobye, umuntu ashobora gukomeza gukora imirimo yo mu rugo nta cyo yikanga, kuko haba habona.”

ACP Damas Gatare, Komiseri wungirije muri Polisi y’u Rwanda ushinzwe Community Policing, avuga ko Polisi y’u Rwanda yihaye intego yo gufatanya na leta muri gahunda zitandukanye ziteza imbere abaturage, zirimo gucanira ingo, abaturage bakaba ahantu habona, bagacika ku gucana agatadowa.

Yagize ati “Polisi y’u Rwanda izakomeza ibikorwa byo gucunga umutekano, kandi yiyemeje no gufatanya na Leta y’u Rwanda mu bikorwa byo guteza imbere abaturage. Ni yo mpamvu uyu munsi imiryango 98 yasezereye gucana agatadowa.

Turashaka ko n’abandi bagifite ako gatadowa, mbere yuko uyu mwaka urangira, tube twamaze kuvuga ngo bayibayi agatadowa.”

Nambaje Aphrodise, umuyobozi w’akarere ka Ngoma, yashimiye ubufasha bw’amashanyarazi Polisi y’u Rwanda yahaye abo mu murenge wa Jarama. Asaba abaturage kubyaza umusaruro amashanyarazi bahawe, bakirinda icyayangiza.

Ati “Abakora amarondo mu mudugudu nk’uriya bashyizemo amatara bizaborohera kuhakora irondo ry’umwuga ariko ni no kurinda ko hari uwaza gushimutaho n’itara na rimwe. Ndasaba kandi abaturage bahawe aya mashanyarazi, kuyabyaza umusaruro, akabafasha guhindura ubuzima.”

Uretse ingo 98 zo mu murenge wa Jarama zacaniwe na Polisi y’u Rwanda, hanacaniwe kandi ikigo nderabuzima cya Sangaza, mu murenge wa Zaza, byose bikozwe na Polisi y’u Rwanda, muri gahunda y’icyumweru cyahariwe ibikorwa bya Polisi, bizakomeza kugeza ku wa 16 Kamena 2017, ubwo hazaha hizihizwa isabukuru y’imyaka 17 Polisi y’u Rwanda imaze ibayeho.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE