2017-10-17 06:58:11 clouds 27o High | Kigali Rwanda

Dukurikire:
 
 

Abanyeshuri ba Kaminuza ya Wharton banyuzwe n’iterambere ry’u Rwanda

Yanditswe na IMVAHO NSHYA

Kuya 2017-05-26 05:15:38

 
Share on:
 
Yasuwe:249
 
Yavuzweho:200
 
10
 
10

Nyuma yo kwakirwa na Perezida Paul Kagame mu ruzinduko barimo mu Rwanda, abanyeshuri bo mu ishuri ry’ubucuruzi muri kaminuza ya Wharton, yo muri Leta Zunze Ubumwe z’Amerika, batangaje ko banyuzwe n’iterambere u Rwanda rumaze kugeraho.

Ab banyeshuri basuye ibice binyuranye by’igihugu, bagirana ibiganiro n’Umukuru w’Igihugu Paul Kagame, byibanze ku iterambere ry’u Rwanda mu myaka 23 ishize. Yabasobanuriye uko u Rwanda rwahisemo kwishakamo ibisubizo nyuma ya Jenoside yakorewe Abatutsi mu 1994.

Umuyobozi wungirije mu ishuri ry’ubucuruzi muri kaminuza ya Wharton, (Wharton Business School) Katherine Krein, yavuze ko bashimishijwe n’intambwe u Rwanda rwateye nyuma y’igihe gito ruvuye muri Jenoside.

Yagize ati “Tumaze iminsi hamwe n’abanyeshuri turi mu gihugu. Twanyuzwe mu buryo budasubirwaho n’iterambere rihari, kandi twagize amahirwe yo gusobanurirwa icyerekezo cy’Umukuru w’Igihugu.”

JPEG - 282.1 kb
Perezida Paul Kagame, ari kumwe n’abanyeshuri ba Kaminuza ya Wharton nyuma y’ibiganiro bagiranye. Bavuze ko banyuzwe n’iterambere ry’u Rwanda

Katherine yavuze ko bamenye neza icyerekezo cya Perezida Paul Kagame, mu bufatanye, uburyo yubatse igihugu hamwe n’abo bafatanyije. Ati “Twari dukeneye gusobanukirwa imbogamizi n’amahirwe biri mu Rwanda, kandi twanyuzwe n’ibyiza bihari.”

Umuyobozi mukuru w’Ikigo cy’Igihugu cy’Iterambere, RDB, Clare Akamanzi, avuga ko urugendo nk’uru rw’abanyeshuri ari rwiza.

Ati “Nk’igihugu, icyo tubonamo, aba ni abantu bashobora kuzagaruka gushora imari mu gihugu, kuko nibabona ibyiza dukora, uburyo dufasha abikorera, bashobora kuzagaruka kandi byabayeho.”

Yavuze ko hari abajya baza gusura u Rwanda, bahasanga amahirwe y’ishoramari bakazagaruka. Ikindi cyiza, ni uko ngo bazaba abavugizi b’u Rwanda kuko baba baturutse mu bihugu bitandukanye, harimo abo muri Leta Zunze Ubumwe z’Amerika, abakomoka mu bihugu by’Asia n’ahandi.

Aba banyeshuri kandi basobanuriwe uruhare rw’ubuyobozi mu iterambere ry’abaturage, kwegereza abaturage ubuyobozi, gahunda ya Girinka, uruhare rw’abikorera mu iterambere ry’igihugu n’ibindi.

Ni ku nshuro ya gatandatu abanyeshuri baturutse muri kaminuza ya Wharton basura u Rwanda. Aba bageze mu Rwanda ku wa 23 Gicurasi, bazasoza uruzinduko rwabo ku wa 27 Gicurasi 2017.

Mbere yo gusoza uruzinduko rwabo, bazasura urwibutso rwa Jenoside rwa Kigali ruri ku Gisozi, umudugudu w’icyitegererezo wa Rweru, n’Ikigo cy’amashuri cya Gashora kigamo abana b’abakobwa.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE