2017-12-12 14:14:08 clouds 27o High | Kigali Rwanda

Dukurikire:
 
 

Kayonza: Hafashwe ingamba zo guhashya indwara y’uburenge yagaragaye mu nka

Yanditswe na IMVAHO NSHYA

Kuya 2017-05-25 05:58:51

 
Share on:
 
Yasuwe:30
 
Yavuzweho:200
 
10
 
10

Ubuyobozi bw’akarere ka Kayonza buravuga ko bwafashe ingamba zitandukanye mu gukumira indwara y’uburenge yagaragaye kuri zimwe mu nka zo muri aka karere.

Iyi ndwara yagaragaye mu mirenge ya Murundi na Mwiri yatumye kuva ku itariki ya 17 Gicurasi 2017, inka zo muri aka karere zishyirwa mu kato, kugira ngo hakumirwe ko iyi ndwara yasakara ahandi.

Gushyirwa mu kato bisobanuye ko nta biterane n’ibikomera by’inka byongera kubaho, gucuruza inyama muri icyo gice biba bibujijwe, ndetse n’urujya n’uruza rw’amatungo narwo ruba rukumiriwe, nk’uko bisobanurwa n’ubuyobozi bw’aka karere.

JPEG - 270.1 kb
Umuyobozi w’akarere ka Kayonza Murenzi Jean Claude aganira n’abarozi ku kibazo cy’indwara y’uburenge

Umuyobozi w’akarere ka Kayonza Murenzi Jean Claude, yemeza ko iki ari ikibazo gihangayikishije cyane, ndetse bakaba basaba abaturage kukigira icyabo kugira ngo amatungo atari yandura nayo atazanduzwa uburenge.

Yagize ati “Ubu turi mu kato kubera ikibazo cy’uburenge, hari aborozi bari baratwaye inka Tanzania, aho zigarukiye byagaragaye ko zaje zifite indwara y’uburenge, ubu twafashe ingamba zo kureba ko twakumira izagaragaye zivanwe mu zindi, ariko izitaragaragara nazo zikingirwe kuko ikibazo kigaragara hirya no hino mu mirenge itandukanye.”

Ubuyobozi burakangurira abaturage kudahisha amatungo arwaye ahubwo bakayagaragaza kugira ngo avurwe atarandura nayo agakingirwa. Ikindi ubuyobozi busaba abaturage ni ukurekera amatungo ari mu ishyamba rya Gabiro muri iryo shyamba, kugira ngo ataza kwanduza ayandi.

Hashyizweho kandi ahantu hihariye hazajya hakirirwa inka muri Kayonza, ahitwa i Nyawera, kugira ngo mu gihe cy’iminsi 21 inka zibe zitabwaho zinasuzumwe ko nta kibazo zifite.

Ku ruhande rw’abaturage mu murenge wa Murundi, bashyizeho imboni z’aborozi zibafasha kugenzura ibice bise amazone, aho batanga amakuru bakanakumira uburenge aho bushobora kugera hose, ibi kandi ngo bizabafasha no kumenya inka zinjiye mu nzuri zitarakingiwe cyangwa ngo zisuzumwe uburenge.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE