2017-12-11 14:03:29 clouds 27o High | Kigali Rwanda

Dukurikire:
 
 

Abahanga bagaragaje ko ibijumba ari igisubizo ku kibazo cy’ubuke bw’ibiribwa ku Isi

Yanditswe na IMVAHO NSHYA

Kuya 2017-05-23 14:31:32

 
Share on:
 
Yasuwe:235
 
Yavuzweho:200
 
10
 
10

Abakora ubushakashatsi ku biribwa, bagaragaje ko igihingwa cy’ibijumba ari kimwe mu bishobora gufasha abaturage guhangana n’ikibazo cy’ibiribwa bike, ahanini giterwa n’izuba riva igihe kirekire.

Ibijumba bigaragazwa nk’igihingwa gifite ubushobozi bwo kwihanganira amapfa igihe kirekire, kandi byera vuba, uyu akaba ari umwihariko abahanga baheraho bavuga ko byakwifashishwa mu guhangana n’ikibazo cy’ibiribwa bike gikunze kwibasira ibihugu by’Afurika.

Dr. Robert Mwanga, umushakashatsi wo muri Uganda wahawe igihembo mpuzamahanga kubera ubushakashatsi yakoze ku biribwa (World Food Prize Winner), ubwo yari mu nama ya 16 ngarukamwaka y’abashakashatsi mpuzamahanga ku bijumba, inama yateguwe ku bufatanye bwa Leta y’u Rwanda n’ikigo Mpuzamahanga cyita ku binyabijumba (Internationl Potato Center-CIP), yashimangiye ko ibijumba byakemura ikibazo cy’inzara muri Afurika.

Yagize ati “Ugereranyije n’ibindi bihingwa, ibijumba birihangana, kuko bihangana n’amapfa mu gihe ibindi bihingwa bipfa. Ikindi kandi byera vuba kuko hari n’ibyerera amezi atatu.

JPEG - 92.3 kb
Mu bushakashatsi abahanga bakoze babonye ko ibijumba ari ibiribwa bihangana n’inzara

Ibi rero ni igisubizo ku bahinzi bafite ikibazo cy’ubuke bw’ibiribwa. Muri urwo rwego rero abatubuzi b’imbuto hirya no hino ku isi barabyaza umusaruro ayo mahirwe aboneka mu bijumba.”

Ibi kandi bishimangirwa n’umuyobozi w’Ikigo cy’igihugu gishinzwe guteza imbere ubuhinzi n’ubworozi, RAB, Dr. Mark Cyubahiro Bagabe, wemeza ko u Rwanda rwanashyize ingufu mu bushakashatsi bugamije gushaka imbuto y’ibijumba ibasha kwihanganira imihindagurikire y’ikirere kandi ikera vuba, kugira ngo mu gihe habayeho ikibazo cy’ibiribwa bike, ibijumba bigoboke abaturage.

Yagize ati “Akenshi iyo ubushakashatsi budakozwe kugira ngo abantu bagire imigozi y’ibijumba yihanganira imvura nke n’uburwayi, icyo gihe ni bwo tugira ibibazo nk’ibyabaye mu myumbati. Aba bashakashatsi bamaze kugera ku moko y’ibijumba atandukanye agera kuri ane, abasha no guhangana n’ibibazo binyuranye.”

RAB ivuga ko mu gihembwe cy’ihinga gitaha, ibijumba bizahingwa kuri hegitari 900, kandi abatubuzi babihuguriwe bakaziyambazwa mu kugeza imbuto igezweho ku baturage.

Mu rwego rwo gukomeza guteza imbere ubuhinzi bw’ibijumba, Leta y’u Rwanda yateguye amafaranga agera muri miliyoni 200, azashyirwa mu bushakashatsi ku bijumba, nk’igihingwa kiyoboye ibindi mu kwihanganira imihindagurikire y’ikirere.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE