2017-12-13 09:46:30 clouds 27o High | Kigali Rwanda

Dukurikire:
 
 

Rubavu: RCA yiyambajwe mu kugenzura imikoreshereze y’umutungo w’abamotari

Yanditswe na IMVAHO NSHYA

Kuya 2017-05-23 06:12:53

 
Share on:
 
Yasuwe:43
 
Yavuzweho:200
 
10
 
10

Ubuyobozi bw’akarere ka Rubavu buvuga ko bwafashe umwanzuro wo kwiyambaza ikigo cy’igihugu gishinzwe amakoperative mu gihugu, RCA, mu rwego rwo gukora ubugenzuzi ku makoperative y’abamotari, hagamijwe kumenya ibijyanye n’imicungire y’umutungo iyavugwamo.

Ubu buyobozi buravuga ibi nyuma y’igihe kinini bamwe mu bakora umwuga wo gutwara abagenzi kuri za moto muri aka karere, bagaragaje ko batanga amafaranga menshi y’imisanzu, ariko akagenda aburirwa irengero, ndetse ntibasobanukirwe neza ibyayo.

Bigingi Gerard, umumotari ubarizwa muri imwe mu makopertive akorera muri aka karere, yagaragaje ko iki kibazo cy’amafaranga yabo batamenya imikoreshereze yayo kimaze igihe kinini, bakaba bifuza ko ubuyobozi bwite bwa Leta bwabafasha kumenya ukuri abayobozi babo babahisha.

Yagize ati “Iki kibazo kimaze igihe kuko dutanga amafaranga menshi ariko twabaza ubuyobozi ibikorwa arimo gukora ntitubigaragarizwe, ariko kuba twijejwe ko hari ikigiye gukorwa turabyishimira cyane.”

JPEG - 312.9 kb
Sentibagwe Gafora, umuyobozi w’amahuriro y’abamotari mu karere ka Rubavu imbere y’abamotari (Foto Iyaremye Y)

Uyu mumotari kimwe na bagenzi be batandukanye, bavuga ko iki kibazo gihari kandi hari bamwe mu bayobozi bitwaza imbaraga bafite mu buyobozi bakikorera ibyo bishakiye.

Gafora Sentibagwe, Perezida w’ihuriro ry’amakoperative y’abamotari mu karere ka Rutsiro, avuga ko kuba iki kigo kigiye kwifashishwa mu gusuzuma ibijyanye n’imicungire y’umutungo w’abamotari bahora bagaragaza ko itanoze ari ingirakamaro, kandi bizabafasha mu kurushaho kugengera ku murongo n’icyerekezo koperative yabo yihaye.

Yagize ati “Byo hari abamotari baba bafite ikibazo badasobanukiwe n’imikoreshereze y’amafaranga, bamwe bakabona ibintu biri gukorwa ntibasobanukirwe bakumva ko amafaranga yabo yariwe, cyakora hari aho twagiye tubibona birahari, gusa iki kigo ubwo kije kutwunganira bizadufasha cyane.”

Umuyobozi w’akarere ka Rubavu wungirije ushinzwe iterambere ry’ubukungu Murenzi Janvier, avuga ko batazihanganira uwo ari we wese waba intandaro yo gusubiza inyuma aba motari kuko umumaro wabo mu iterambere ry’akarere ugaragarira buri wese.

Yagize ati “Kubera ko tutifuza ko abamotari mu makoperative basubira inyuma, twiyambaje ikigo cya RCA ngo kize kidufashe turebe niba ibyo bavuga ari byo, bizagaragarira mu igenzura rizaduha ishusho y’uko bihagaze, aho bizagaragara ko imicungire mibi ihari haziyambazwa ubutabera.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE