2017-10-17 06:58:11 clouds 27o High | Kigali Rwanda

Dukurikire:
 
 

Kigali: Ibihugu bya EAC biraganira ku kureshya abashoramari

Yanditswe na IMVAHO NSHYA

Kuya 2017-05-23 06:05:43

 
Share on:
 
Yasuwe:114
 
Yavuzweho:200
 
10
 
10

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba (MINEACOM), Kanimba François, yatangaje ko inama nkuru ya kabiri ku ishoramari ry’inganda mu bihugu bigize uwo muryango ibera mu Rwanda kuri uyu wa 23 Gicurasi 2017, iribanda cyane ku gushaka ibyakomeza kureshya abashoramari.

Mu kiganiro n’itangazamakuru, ejo hashize, Minisitiri Francois Kanimba yavuze ko muri iyo nama hazabaho guhuriza hamwe abafatanyabikorwa batandukanye, bakumva neza ibikiri imbogamizi ku muryango wa EAC, bakungurana ibitekerezo ku cyakoroshya imikoranire hagati y’inzego za Leta n’izigenga mu kureshya ishoramari mu nganda.

Ati “Iyi nama nkuru y’inganda y’umuryango EAC yateraniye i Kigali ni iyo gukurura inyungu nyinshi, by’umwihariko zivuye mu miryango y’ubucuruzi.”

JPEG - 252.3 kb
Kanimba Francois, Minisitiri w’Ubucuruzi, Inganda n’Afurika y’Iburasirazuba, ubwo yari mu kiganiro n’abanyamakuru (Foto James R.)

Kanimba yakomeje avuga ko mu bitabira iyi nama, hamaze kwiyandikisha imiryango myinshi y’ubucuruzi itandukanye, abacuruzi bo mu bihugu bya EAC n’imiryango nterankunga mu by’imari ku kigero cyo hejuru bikaba bitanga icyizere ko ikigambiriwe gishobora kugerwaho.

Umuyobozi Mukuru w’akanama gashinzwe ubucuruzi (EABC), Lilian Awinja, yavuze ko kugeza ubu urwego rw’inganda rufite uruhare rungana na 10% gusa ku bukungu bw’imbere bw’ibihugu bigize umuryango wa EAC, akizera ko bishoboka ko byazarenzaho.

Ati “Ndizera ko dushobora gukora ibyiza kuruta ibyo, mu gihe urwego rw’inganda rukoze neza. Dufite ubushobozi bwo gufasha ubukungu bw’umuryango wa EAC bihagije binyuze mu guteza imbere inganda. Nk’akanama gashinzwe ubucuruzi dushimishwa n’uko Guverinoma za Leta zishyira imbere kwita ku iterambere ry’inganda.”

Mu bindi haraganirwa kandi ku gushyiraho amasezerano y’umuryango wa EAC ubwabyo biri gufasha inganda, ibikidindiza ibyemezo bimwe na bimwe biba byafashwe hagati y’abagize umuryango bigatuma inganda zigenda gahoro, ibibazo by’imari mu gufasha inganda kubona inguzanyo ndende.

Hari no gushaka uko hakigishwa ubumenyi ku by’inganda, zaba izongerera agaciro ibituruka ku musaruro w’ubuhinzi n’inganda z’imyenda.

Inama ya mbere ku by’inganda iheruka kubera muri Uganda mu myaka ibiri ishize. Iyi ije ikurikira iy’abakuru b’ibihugu bigize umuryango wa EAC iherutse guteranira i Dar es Salaam muri Tanzania tariki ya 20 Gicurasi 2017.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE