2017-09-25 08:13:20 clouds 27o High | Kigali Rwanda

Dukurikire:
 
 

Nyuma y’amezi atatu, kwagura imihanda ya Kigali bigeze ku 10%

Yanditswe na IMVAHO NSHYA

Kuya 2017-05-22 12:07:40

 
Share on:
 
Yasuwe:479
 
Yavuzweho:200
 
10
 
10

Kompanyi y’Abashinwa ifite isoko ryo kwagura imihanda yatoranyijwe mu Mujyi wa Kigali, (CRBC) itangaza ko imirimo yo kwagura iyo mihanda 9 igeze ku kigero cya 10% mu mezi atatu ashize itangiye kubakwa.

Nk’uko ushinzwe ibikorwa by’ubwubatsi Gu Tengfer yabitangaje ejo hashize ku wa Gatandatu tariki ya 20 Gicurasi 2017, mu kwagura iyo mihanda ifite ibilometero 54, imbaraga nyinshi zatangirijwe mu mihanda ibiri y’ibanze bitewe n’uko ikenerwa cyane kurusha uko indi isanzwe ikenerwa.

Iyo mihanda ni uva i Gatsata ugera ku Muhima no ku isangano rinini ry’imihanda ya Kigali (Rond-point) wa kilometero ebyiri, uwa Rwandex-Sonatube-Prince House; n’uwo mu Kanogo – Rwandex iteganyijwe kuzura mu mpera z’umwaka wa 2017.

JPEG - 201.2 kb
Uyu ni umuhanda uva ku isangano rinini ry’imihanda ya Kigali ukamanuka ku Muhima ukagera Nyabugogo, urimo kwagurwa kandi uzarangira vuba

Gu Tengfer yagize ati “Uyu muhanda wa kilometero ebyiri unyura ku Muhima ndatekereza ko tuba tuwurangije mu mpera z’ukwezi kwa Nyakanga 2017, urenda kurangira kandi tuzakomeza kwihutisha ibikorwa byacu, kuko dufite icyizere cyo kuwurangiza mu mezi abiri cyangwa atatu ari imbere.”

Bizumurenyi Telesphore, Umukozi mu biro bya kompanyi CRBC, yavuze ko imbogamizi bagenda bahura na zo zirimo kwimura ibikorwa remezo nk’imiyoboro ya murandasi n’imiyoboro y’amazi n’ibindi.

Ati “Icyo kibazo kiriho, cyane ibijyanye n’imirongo y’itumanaho ica mu butaka (Fiber Optic), amatiyo y’amazi n’insinga z’amashanyarazi ariko dufatanyije n’umujyi wa Kigali nk’urwego bireba bigenda bikemuka.”

Imihanda yose uko ari 9 iri kwagurwa ni itatu yavuzwe haruguru wongeyeho umuhanda wa Kimihurura, Nyamirambo-Rebero-Nyanza, Nyamirambo-Cyumbati-Gikondo, Kimisange-Gikondo, Kagugu-Batsinda-Nyacyonga na Down Town-Yamaha.

Iteganyijwe gutwara amadolari y’Amerika miliyoni 76, asaga amafaranga y’u Rwanda miliyari 63, ikazuzura mu mezi 32, ni ukuvuga muri Kanama 2019 uhereye muri Gashyantare 2017 itangira kwagurwa.

Iyi mihanda nk’uko ubuyobozi bw’Umujyi wa Kigali bubisobanura, iri muri gahunda yo kubaka imihanda migari ishobora kunyurwamo n’imodoka ebyiri kuri buri cyerekezo cy’umuhanda mu rwego rwo kugabanya umubyigano w’ibinyabiziga bihurira mu mihanda mito.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE