2017-10-17 06:58:11 clouds 27o High | Kigali Rwanda

Dukurikire:
 
 

Amateka ya Manzi Thierry umaze guhesha Rayon Sports ibikombe bibiri

Yanditswe na IMVAHO NSHYA

Kuya 2017-05-22 11:33:28

 
Share on:
 
Yasuwe:1136
 
Yavuzweho:200
 
10
 
10

Manzi Thierry ni umwe mu bakinnyi bashobora gukina ku myanya yose y’ubwugarizi. Ni umusore benshi bifuje kumenya ibye ubwo bumvaga ko Rayon Sports yamukuye muri Marines FC, arangije agira uruhare mu gufasha Rayon Sports kuzamura igikombe cy’Amahoro 2016 na shampiyona ya 2016-2017.

Manzi, myugariro ukina witonze binatuma adakunze kubona amakarita, yaganirije Imvaho Nshya ku buzima bwe bw’umupira w’amaguru n’icyerekezo afite.

Manzi ni muntu ki?

JPEG - 155.2 kb
Manzi Thierry umaze imyaka ibiri muri Rayon Sports akaba amaze gutwara ibikombe bibiri

Manzi Thierry ufite akazina yahimbwe n’abana bakuranye ka ’’Papa Tulan”, yabonye izuba taliki 12 Nyakanga 1996 i Gikondo mu Mujyi wa Kigali. Ni bucura mu muryango w’abana barindwi (abahungu babiri n’abakobwa batanu) ba Gahonzire Venant na Mukandoli Berancille utuye i Gikondo mu Karere ka Kicukiro.

Yize amashuri y’inshuke ku Isano i Gikondo, amashuri abanza ayiga i Mburabuturo i Gikondo. Yagiye mu cyiciro rusange i Nyarusange mu Karere ka Muhanga asoreza amashuri yisumbuye muri Ecole St Emmanuel i Kabuga mu ishami ry’ikoranabuhanga no gusakaza amajwi (Informatique et Electronique) mu 2014.

Mu rugo ntibigeze bamwemerera gukina akiri muto

Manzi agaragaza ko mu bwana bwe ababyeyi batigeze bamuha uburenganzira bwo gukina kuko babifataga nk’uburara, nawe akabikora yihishe.

Ati ’’Najyagayo nataha nkaba nziko ndibukubitwe. Nabaye nkugira agahenge maze gukura ngiye mu mashuri yisumbuye ’’.

Uyu musore yatangiye gukina mu ngimbi za Police FC mu 2012, ntiyahatinda ajya muri ASPOR FC yo mu cyiciro cya kabiri ahakina umwaka umwe. Mu 2013 yakinnye mu makipe abiri (Isonga na SEC Academy), mu 2014 ajya muri Marines FC nyuma y’umwaka umwe asinyira Rayon Sports.

Manzi avuga ko yagiye muri Marines FC nk’uburyo bwo kwiyereka Habimana Sosthene wari wamwijeje kuzamugura naramuka agizwe umutoza mukuru wa Rayon Sports.

Ati ’’Muri Marines FC nari mfite intego yo kuzabona ikipe nziza. Nagiye muri Marines FC mvuye mu makipe y’abato, abantu benshi bari banzi banabihuza n’ubushobozi bwanjye bakambwira ko ninkomeza kwitwara neza nzaba umukinnyi ukomeye. Nagiye muri Marines FC numva ko atari ho nzasoreza umupira ahubwo byari ukugira ngo menyere ngire n’ubunararibonye bwo gukina mu cyiciro cya mbere’’.

Kuza muri Rayon Sports

Manzi wari umaze kwigaragaza muri Marines FC aho akina imikino hafi ya yose yo muri shampiyona yaje kugurwa na Rayon Sports, agera ku ndoto z’ubuzima bwe.

Aha uyu myugariro aravubanza kugaruka ku buryo yasinyiye Marines FC agitegereje kugurwa na Rayon Sports

Ati ’’Mbere yo kujya muri Marines FC hari umutoza wantozaga muri SEC witwa Habimana Sosthene (kuri uburi utoza Musanze), yari yarambwiye ati jyenda uzamure urwego ati binakunze nazanakugura mbere y’uko shampiyona itangira. Nagiye mu myitozo ndakora, CECAFA (ya 2014) irangiye mbona amakipe ari gutanga za Licence ndavuga nti ibya Rayon reka ndeke kubitegereza ahubwo nsinye muri Marines FC. Rayon Sports iza kumpamagara mu ijoro naraye nsinyemo barambwira ngo nze ariko mbasobanurira ko nasinyiye Marines FC barambwira bati nta kibazo igaragaze n’ubundi umwaka utaha tuzakugura’’.

Anaze kwigaragaza muri Marines FC nyuma y’umwaka Manzi noneho yaje kujya muri Rayon Sports kimwe mu bihe atazibagirwa.

Ati “Ubundi gukinira ikipe y’izina nka Rayon Sports byari inzozi kuri buri mwana twakinanaga i Gikondo. Nabonye ko bishoboka ubwo inshuti yanjye magara uwo mfata nka mukuru wanjye muri ruhago Usengimana Faustin yabigeragaho. Nanjye nahise niyemeza ko ngomba gukora cyane nkagera ku rwego rwo hejuru.”

Akigera muri Rayon Sports, Manzi yamaze imikino ibiri ku ntebe ku mukino wa gatatu ahabwa amahirwe yo kwigaragaza anabwirwa ko iyi kipe itajya yihanganira umuntu ivuga ko akizamuka.

Imyaka ibiri, ibikombe bibiri no guhamagarwa mu ikipe y’igihugu

Mu myaka ibiri Manzi amaze muri Rayon Sports yatwaye igikombe cy’Amahoro cya 2016 ari umukinnyi ubanza anatwara igikombe cya shampiyona 2016-2017.

Bijyanye n’imbaraga ashyiramo, Manzi yanahamagawe mu ikipe y’igihugu Amavubi muri Gicurasi 2016. Mu mwaka we wa wa kabiri, Manzi yafashije Rayon Sports gutwara igikombe cya shampiyona cya 2016-2017.

Manzi ’’Ni umwaka ntazigirwa. Ni umwaka w’amateka kuri twe ni igikombe ntazibagirwa kuko twari dufite ikomeye turi ikipe ishyize hamwe, abakinnyi bumvikana n’umutoza akatuba hafi’’.

Mu gihe arimo asoza amasezerano ye, Manzi myugariro avuga ko amahirwe menshi ari ayo kwerekeza mu ikipe zo hanze y’u Rwanda cyane muri Afurika y’Epfo ahari amakipe amwifuza kandi bamaze kugirana ibiganiro.

Usengimana ni we mukinnyi w’icyitegererezo

Manzi agaragaza ko mu bakinnyi bose babayeho mu mupira w’u Rwanda, Usengimana Faustin kuri ubu ukina muri APR FC ari we mukinnyi mwiza wabayeho.

Ati ’’Hari igihe mbivuga abantu ntibabyumve neza, ariko njye mbona Faustin ari we muntu nakwigiraho. Ni wa muntu utuje kandi ukina umupira, iyo awufashe arawugumana akamenya kuwuhereza mugenzi we. Wenda ubu hari ubwo byaba bitari gukunda ariko abamuvugiriza induru bajye babanza barebe ngo mu minsi ishize yari myugariro umeze gute? Hari akazi yakoze.Hari ibyo yafashije igihugu.Abo babikora bajye babyibuka bitume bongera kumutera ingufu kugira ngo agaruke mu bihe bye’’.

Usibye Usengimana, uyu musore anakunda imikinire ya Laurent Kochienly, myugariro w’ikipe ya Arsenal. Mu buzima busanzwe kandi Manzi ni umukristu Gatolika ukunda kujya misa za buri gitondo.

Ubutumwa ku bana bifuza kumera nkawe

Manzi yagize ati ’’Ibanga rizatuma batera imbere ni ukwigira ku babaruta bagakurikiza inama y’abatoza kuko ari byafashije abakinnyi bose babyeho mu mupira’’.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE