2017-12-11 14:03:29 clouds 27o High | Kigali Rwanda

Dukurikire:
 
 

Umuyobozi mwiza ni ufite icyerekezo - Minisitiri Kaboneka

Yanditswe na IMVAHO NSHYA

Kuya 2017-05-22 09:36:45

 
Share on:
 
Yasuwe:83
 
Yavuzweho:200
 
10
 
10

Minisitiri w’ubutegetsi bw’igihugu Francis Kaboneka, yasabye abayobozi n’abaturage bo mu ntara y’Uburengerazuba kujya barangwa n’ubushishozi mu gihe batora abayobozi, bagashishoza bakareba ufite icyerekezo kizima aganishamo abanyarwanda.

Ubu butumwa uyu muyobozi yabugarutseho mu y’intara y’Uburengerazuba, yahuje abayobozi batandukanye, abavuga rikumvikana, abahagarariye ibikorwa by’amatora, abanyamadini n’amatorero, yari igamije gusobanura byimbitse gahunda y’amatora ya Perezida wa Repubulika ateganyijwe muri Kanama uyu mwaka.

Minisitiri w’ubutegetsi bw’igihugu Francis Kaboneka, asobanura umuyobozi mwiza abaturage bakwiye gutora, yagize ati “Umuyobozi nyawe muyobozi ni ufite icyerekezo, ntushobora kugira icyerekezo udakunda abo uyobora, umuyobozi ni ufatanya n’abo ayobora, bagashyira hamwe, bakicara bakaganira bagafatanya icyerekezo, akabagira inama akabareka bakamugorora, bakumvikana bakemeranya icyerekezo bagomba kujyamo.

JPEG - 370.9 kb
Minisitiri Kaboneka asaba abaturage gushishoza bakajya batora abayobozi bafite icyerekezo

Umuyobozi ni utireba ku giti cye, akababazwa n’uko abo ayoboye hari ibyo babuze, batameze neza, batishimye, agaharanira y’uko batera intambwe ibakura mu bibazo barimo bafatanyije, yababona akababonamo imbaraga, akababonamo ibisubizo”.

Umuyobozi wa Komisiyo y’igihugu y’amatora Prof. Kalisa Mbanda, yagize ati “Umuntu uzatorwa yaba umugore cyangwa umugabo azaba afite inshingano z’imibanire y’ubumwe bw’abanyarwanda, azaba ashinzwe umutekano w’igihugu, ni we utugezaho buri mwaka uko igihugu gihagaze…. birasaba kugira ngo tuzatore uw’inyangamugayo.”

Umuyobozi w’intara y’Uburengerazuba Munyantwari Alphonse, avuga ko hari ibyo bamaze kugeraho babikesha imiyoborere myiza, bakaba biteguye kongera gutora neza.

Yagize ati “Mu kongerera agaciro ibikomoka ku buhinzi dufite inganda eshanu zitunganya umuceri, zirindwi zitunganya ibigori, eshatu zitunganya ibikomoka ku mbuto, amakusanyirizo y’amata 19, amabagiro ya kijyambere akomeye abiri, inganda z’icyayi umunani, inganda zitunganya kawa 115, ku mashanyarazi tugeze kuri 24%, amazi meza tugeze kuri 84,5%...amatora turayiteguye nk’ubukwe”.

Ndahayo Eriyezeri utuye mu karere ka Nyamasheke, we avuga ko nk’abarobyi biteguye gutora neza, kuko iterambere bamaze kugeraho ribategeka gutora neza kugira ngo iryo terambere rikomeze kwihuta.

Ati “Bitewe n’imiyoborere myiza twagezeho, umunsi uradutindiye, turiteguye nta kigwari kiri mu barobyi”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE