2017-12-11 14:03:29 clouds 27o High | Kigali Rwanda

Dukurikire:
 
 

Abarera abana b’imfubyi barasaba koroherezwa kubabonera ibyangombwa

Yanditswe na IMVAHO NSHYA

Kuya 2017-05-19 10:23:39

 
Share on:
 
Yasuwe:64
 
Yavuzweho:200
 
10
 
10

Bamwe mu babyeyi bafashe gahunda yo kurera abana b’imfubyi mu miryango, bavuga ko bafite ikibazo cyo kugorwa no kubona ibyangombwa by’irangamimerere, bagasaba ubuyobozi kuborohereza.

Aba babyeyi bavuga ko kubona uburyo bwo kubinjiza mu muryango no kubabonera ibyangombwa by’irangamimerere bikenewe byose bibagora, ugasanga rimwe na rimwe hari uburenganzira aba bana batabona.

Ndorimana Emmanuel, umupasiteri mu itorero rya ADEPR muri paruwasi ya Rugerero, yagize ati “Baduhaye abana ariko ubona uburenganzira bwacu kuri bo bugorana, kubitaho nk’abacu biragorana kuko nta byangombwa bihagije baba bafite, ushaka kumujyana kuruhuka hanze y’igihugu bikanga kuko bavuga ngo nta bwo afite ibyangombwa biguha uburenganzira.

JPEG - 347.3 kb
Umuyobozi w’akarere ka Rubavu wungirije ushinzwe imibereho y’abaturage Uwampayizina Marie Grace

Ugasanga abandi bana barahangayitse ngo mukuru wacu arasigaye, we nta bwo abyumva neza, ntiyumva impamvu ahubwo yumva ko hari aho ahejwe, turifuza ko twahabwa uburenganzira bwo kubiyandikaho.”

We na bagenzi be bavuga ko iki kibazo kitagarukira aho gusa, kuko ahantu hose hakenerwa ibyangombwa usanga bagorwa, nko mu kwandikisha umwana mu bizamini bisoza amasomo, kubona indangamuntu n’ibindi bitandukanye.

Ubuyobozi bw’akarere ka Rubavu buvuga ko ababyeyi bose batari shyashya, kuko hari abashobora kurwanira kwiyandikisha ku bana bafite ibyo bakurikiye nk’imitungo n’ibindi. Hari uburyo bwemewe n’amategeko bagirwa inama yo gukurikiza ngo bahabwe uburenganzira.

Uwampayizina Marie Grace, umuyobozi w’akarere ka Rubavu wungirije ushinzwe imibereho myiza y’abaturage, yashimye abaharanira ubuzima bwiza bw’abana.

Ati “Dushima uruhare rwabo n’ubushake bafite mu guharanira gufata umwana wese nk’uwabo, ku kibazo cy’ibyangombwa n’uburenganzira ku bana turabasaba kunyura inzira zemewe bakajya mu rukiko bakaregera guhabwa uburenganzira, hari uburyo amategeko abafasha kuba babona uburenganzira kuri abo bana kandi birashoboka.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE