2017-10-18 07:01:40 clouds 27o High | Kigali Rwanda

Dukurikire:
 
 

#Army Week - Musanze: Abatishoboye bazafashwa kubaka ubwiherero buboneye

Yanditswe na IMVAHO NSHYA

Kuya 2017-05-18 07:09:37

 
Share on:
 
Yasuwe:180
 
Yavuzweho:200
 
10
 
10

Ubuyobozi bw’akarere ka Musanze buravuga ko ku bufatanye n’ingabo z’igihugu muri gahunda ya Army Week, bagiye gufasha bamwe mu baturage batishoboye kubaka ubwiherero buboneye.

Ubuyobozi bw’aka karere bugaragaza ko hari abaturage basaga 800 badafite ubwiherero buboneye, ahanini bitewe n’imiterere y’aho batuye usanga hataborohereza gucukura ngo barenze santimetero 60 z’ubujyakuzimu, cyangwa se kubona itaka ryo guhomesha bitewe n’amakoro.

Umuyobozi w’akarere ka Musanze wungirije ushinzwe imibereho myiza y’abaturage, Uwamariya Marie Claire, yemeza ko bigoye cyane kubaka umusarane muri ako gace.

Yagize ati “Ni byo koko hari imiryango ifite ikibazo cyo kugira imisarane itujuje ibyangombwa, kubera ko muri kariya gace k’amakoro kubona umusarane ni ikibazo gikomeye, kuko hasi ni urutare rw’amakoro na mwe murabibona.

Kugeza ubu rero dufite imiryango 832 idafite ubwiherero, ariko habarurwamo n’ababufite ariko butujuje ibyangombwa. Hari na none na bamwe mu baturage badafite ubwiherero batabitewe n’uko nta bushobozi, ahubwo imyumvire mike ikiri hasi kuri bamwe”.

JPEG - 201.9 kb
Ingabo z’u Rwanda zifatanya n’abaturage kubakira abatishoboye muri Musanze (Foto Ngaboyabahizi P)

Uwamariya akomeza avuga ko ku bufatanye n’ingabo z’u Rwanda muri iki gihe cyahariwe ibikorwa bya Army week, ngo bagiye kubaka ubwiherero kimwe n’andi mazu y’abatishoboye nk’uko bisanzwe bikorwa mu bufatanye akarere kagirana n’abandi bafatanyabikorwa.

Mukandayisaba Justine wo murenge wa Kinigi, hafi y’ikirunga cya Sabyinyo, yagize ati “Hano kubona ubwiherero nibura bufite metero imwe y’ubujyakuzimu ni ikibazo. Iyo ugize amahirwe nkanjye utishoboye nshukura santimetero 60 ngatambikaho uduti ubundi nkapfa kuhikinga.

Urabona nta bushobozi mfite bwo kuba nayubaka, keretse Leta ningoboka n’aho ubundi nta bwo norohewe, kuko ndi mu cyiciro cya mbere cy’ubudehe, kandi ndi n’umupfakazi”.

Kagaba Anicet, umwe mu baturanye n’abatagira ubwiherero mu murenge wa Nyange, yagize ati “Rwose kuba duturanye n’abatagira ubwiherero ni ikibazo gikomeye kuko amasazi ashobora kuzana umwanda ukadutera indwara. Nifuza ko ubuyobozi bwabafasha kubona ubwiherero tukabaha umuganda na bwo bukazana igitaka tukabahomera, kuko kuri ubu ikamyo y’igitaka itugeraho ifite agaciro k’amafaranga ibihumbi 45. Isuku igenda k’umurongo, iyo mugenzi wawe afite umwanda ntiwakwizera ko bitazakugiraho ingaruka”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE