2017-10-18 07:01:40 clouds 27o High | Kigali Rwanda

Dukurikire:
 
 

Ibibazo by’umutekano muri Afurika byasubizwa n’Abanyafurika ubwabo- Gen. Kabarebe

Yanditswe na IMVAHO NSHYA

Kuya 2017-05-16 05:56:26

 
Share on:
 
Yasuwe:430
 
Yavuzweho:200
 
10
 
10

Minisitiri w’Ingabo Gen. James Kabarebe, yavuze ko ibihugu by’Afurika bikwiye gufata umwanzuro uhamye ku gukemura ibibazo by’umutekano muke n’amakimbirane akunze kubiragaragaramo, yibutsa ko igisubizo cy’ibibazo nk’ibi nta handi cyashakirwa uretse mu banyafurika ubwabo.

Ubu butumwa Minisitiri Gen Kabarebe yabutangiye mu ishuri rikuru rya Gisirikare riri mu karere ka Musanze, mu muhango wo gutangiza ku mugaragaro inama nyunguranabitekerezo yiga ku mutekano w’ibihugu byo muri Afurika, iteranye ku nshuro ya gatanu.

Mu ijambo rifungura ku mugaragaro iyi nama yitabiriwe n’abasirikare bakuru bo mu Rwanda biga mu ishuri rikuru rya gisirikare i Musanze n’abo mu bindi bihugu bitandukanye by’Afurika no hanze yayo, yagaragaje ko uyu mugabane uhura n’ibibazo byinshi by’umutekano muke, yibutsa ko umuti w’ibyo bibazo nta handi wava uretse mu banyafurika ubwabo.

Yagize ati “Ibihugu byinshi by’Afurika bihura n’ibibazo bikomeye ari byo: Amakimbirane akomoka ku mitwe yitwaje intwaro, iterabwoba, imiyoborere mibi n’ibyaha byambukiranya imipaka, ibiyobyabwenge n’icuruzwa ry’abantu. Ibi byose n’ibijyanye n’umutekano w’abantu ku giti cyabo mu karere no mu bindi bice by’Afurika, hakenewe imyanzuro ihamye ivuye muri Afurika ubwayo”.

JPEG - 283.1 kb
Iyi nama yitabiriwe n’abasirikare 47 bo mu bihugu bitandukanye (Foto Ngaboyabahizi P)

Minisitiri w’Ingabo z’u Rwanda yabwiye abitabiriye iyi nama y’iminsi itatu ko umutekano wa buri gihugu ari wo nkingi y’iterambere ryacyo, bityo hakwiye gukorwa ibishoboka byose ukabungabungwa uko bikwiye, igishobora kuwuhungabanya kikamaganirwa kure.

Lt. Col Like Like wo mu gihugu cya Zambia, ni umwe mu bitabiriye iyi nama, akaba n’umunyeshuri mu ishuri rikuru rya Gisirikare i Musanze. Avuga ko iyi nama azayungukiramo byinshi bizamugirira akamaro mu kubungabunga umutekano mu gihugu cye ndetse no hanze yacyo.

Yagize ati “Umutekano ni ngombwa mu karere, iyi nama kuri njye ni ingirakamaro kuko iduha impamba tuzifashisha mu kazi kacu ka buri munsi ko gucunga umutekano”.

Iyi nama ngarukamwaka yiga ku bijyanye n’umutekano wo muri Afurika no mu yindi migabane, kuri iyi nshuro yitabiriwe n’abasirikare bakuru bo mu rwego rwa ofisiye bagera kuri 47 n’izindi mpuguke mu bumenyi butandukanye.

Abitabiriye iyi nama bakomoka mu bihugu nka Ethiopia, Kenya, Malawi, Sudani y’Epfo, Tanzania, Uganda, Zambia, Nigeria, Israel n’u Rwanda rwayakiriye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE