2017-12-11 14:03:29 clouds 27o High | Kigali Rwanda

Dukurikire:
 
 

Kuva muri 2010 ubucuruzi buzamukaho 11% buri mwaka – Min. Kanimba

Yanditswe na IMVAHO NSHYA

Kuya 2017-05-15 04:46:26

 
Share on:
 
Yasuwe:241
 
Yavuzweho:200
 
10
 
10

Minisitiri w’Ubucuruzi, Inganda n’Ibikorwa by’Umuryango w’Afurika y’Iburasirazuba (MINEACOM) François Kanimba, yatangaje ko mu myaka itandatu ishize isatira irindwi, imibare igaragaza ko ubukungu bw’u Rwanda buzamuka neza mu iterambere ry’ibikorwa by’ubucuruzi, kuko ibyavanywe n’ibyoherejwe mu mahanga byazamutseho 11% buri mwaka muri rusange.

Mu kiganiro Imvaho Nshya yagiranye na Minisitiri François Kanimba, yavuze ko iyo ufashe agaciro k’ibicuruzwa byose Abanyarwanda bavanye mu mahanga n’ibyo boherejeyo byose ukabiteranya, byazamutse ku mpuzandengo ya 11% buri mwaka, aho byavuye kuri miliyari ebyiri z’amadolari y’Amerika muri 2010, bikagera kuri miliyari enye z’amadolari mu 2016.

Kanimba yasobanuye ko ibyoherezwa mu mahanga byo biri ku gipimo cyo hejuru, aho byavuye kuri miliyoni 680 z’amadolari y’Amerika muri 2010, bigera kuri miliyari 1.5 mu 2016.

Ati “Urumva ko ni umuvuduko munini mu mpuzandengo igeze kuri 16% uyu mwaka wa 2016.”

JPEG - 181.7 kb
Francois Kanimba, Minisitiri w’Ubucuruzi, Inganda n’Afurika y’Iburasirazuba (Foto James R.)

Ibitumizwa mu mahanga nabyo byarazamutse ariko ku gipimo cya 9%, agasobanura ko bitari ku gipimo kinini.

Ati “Byazamutse ku gipimo cya 9%, kubera ko ibyo dutumiza mu mahanga agaciro kabyo kari hejuru; ni yo bizamutse gato amafaranga biba bisaba aruta ayinjizwa n’izamuka rinini ry’ibyo twohereza mu mahanga ku buryo n’ubundi kuri icyo gihe, mu mwaka wa 2010 kugeza mu 2016, ikinyuranyo hagati y’agaciro k’ibyo u Rwanda rwohereza mu mahanga n’ibyo dutumizayo mu gaciro k’amadolari byakomeje kugenda byiyongera n’ubwo ibyo twohereza byazamutse vuba kuruta ibyo dutumiza.

Ariko ugasanga nta bwo umuvuduko w’ikinyuranyo wabaye munini cyane, wagiye uzamukaho muri rusange 7% ndetse muri uyu mwaka wa nyuma, 2016 mwarabyumvise byatangiye kumanuka.”

Ibigaragaza izamuka ry’ubukungu bw’igihugu mu byoherezwa mu mahanga, birimo ibicuruzwa by’ibanze byoherezwa mu mahanga guhera ku gihe cy’umwaduko w’abazungu mu Rwanda, birimo ikawa, icyayi, amabuye y’agaciro n’ibindi, hakaba n’ibicuruzwa byitwa bishya birimo ibitunganywa ku musaruro w’ibiribwa bigenda bijyana n’uko ubukungu buzamuka.

Kanimba ati “Umuvuduko w’ibishya uri hujuru cyane ugereranyije n’uw’ibyo bicuruzwa by’ibanze bya kera. Ugiye mu mibare usanga byarazamutse muri rusange ku gipimo kirenga 20% buri mwaka mu gihe ibisanzwe byazamukaga hafi ku 8%.”

U Rwanda ni igihugu gikomeje kuzamuka ku muvuduko wo hejuru mu bukungu, rukaba rufite intego yo kongera ibicuruzwa byoherezwa mu mahanga, hakagabanywa ibivanwayo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE