2017-12-12 14:14:08 clouds 27o High | Kigali Rwanda

Dukurikire:
 
 

Gukubita umugore ni ubunyamusozi, ukibitekereza abyikuremo-Guverineri Munyantwari

Yanditswe na IMVAHO NSHYA

Kuya 2017-05-15 04:37:16

 
Share on:
 
Yasuwe:262
 
Yavuzweho:200
 
10
 
10

Guverineri w’intara y’Uburengerazuba Munyantwari Alphonse, yanenze cyane abashakanye bakirangwa n’amakimbirane avamo no kurwana, yibutsa ko imyitwarire nk’iyo itakijyanye n’igihe, bityo ukibitekereza yakwihutira kubisiba mu mutwe we kuko byamugiraho ingaruka.

Munyantwari avuga ko umuntu ugikubita uwo bashakanye akwiye kujya agayirwa mu ruhame, kandi akaba ari naho asabirwa gutanga ibisobanuro, ku buryo n’abagitekereza nka we babicikaho.

Yagize ati “Ntugomba kureba umuntu ngo ubone itama rye ribereye urushyi, cyangwa mu maso he habereye igipfunsi, gukubita umugore ni ubunyamusozi! N’uwari ukibifite mu mutwe abihanaguremo, nubwo haba hari ibyo abantu batumvikanaho, barabiganira, byakwanga nka Leta twemera ko banatandukana

Abagabo bazajya bakubita abagore cyangwa abagore bakubita abagabo tuzajya tureba izo ngo zibanye nabi, za zindi murara mukiza badusobanurire impamvu bahungabanya umutekano.”

JPEG - 73.5 kb
Guverineri Munyantwari Alphonse asaba abashakanye kujya bakemura amakimbirane binyuze mu biganiro

Bamwe mu baturage bo muri aka karere ka Karongi bagaragaje ko iki gitekerezo cyo kunengera mu ruhame umugabo wakubise umugore ari kiza, kuko kizagabanya uyu muco mubi w’ihohoterwa rikorerwa mu ngo.

Mukankubito Beatrice yagize ati “Iyi gahunda ni nziza turayishimiye, abagabo bameze gutyo barahari ariko buriya kubanengera mu ruhame bizatuma amakimbirane yo mu ngo acika.”

Mukamanzi Agnes, umuturage wo mu karere ka Karongi, na we ashima cyane gahunda yo kunengera mu ruhame abagabo bakubise abagore babo.

Yagize ati “Iriya gahunda ni nziza cyane, umugabo wakubise umugore bajye bamushyira mu ruhame bamunenge, nibiba na ngombwa ashyikirizwe inzego zibishinzwe ahanwe, ibyo bizaca burundu ikibazo cy’amakimbirane n’ihohoterwa ryo mu ngo.”

Bamwe mu bagabo baganiriye n’Imvaho Nshya bagaragaje ko iki cyemezo cyo kunengera mu ruhame abakubise abagore babo gikarishye, bavuga ko bagiye kwitwararika bakirinda gukubita abagore babo, ku rundi ruhande ariko basaba ko n’umugore wakubise umugabo ko na we yajya ahabwa icyo gihano.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE