2017-10-18 07:01:40 clouds 27o High | Kigali Rwanda

Dukurikire:
 
 

Arashimira ingabo z’u Rwanda zamurokoye impanuka y’ibiza zikanamukura mu manegeka

Yanditswe na IMVAHO NSHYA

Kuya 2017-05-13 16:12:26

 
Share on:
 
Yasuwe:133
 
Yavuzweho:200
 
10
 
10

Mukanoheri Béatrice, umugore w’imyaka 44 uvuka mu karere ka Nyabihu, umurenge wa Karago, avuga ko atazibagirwa uburyo ingabo z’u Rwanda zamurokoye urupfu rw’ibiza mu mwaka wa 2012, none ubu akaba yarubakiwe agatuzwa mu mudugudu wa Kabyaza.

Uyu mubyeyi avuga ko umugabo we yitabye Imana akamusiga mu nzu ishaje kandi nayo iri mu manegeka.

Avuga ko ngo nyuma y’aho ingabo z’u Rwanda zamurokoye urupfu ubwo imvura idasanzwe yamusangaga mu nzu n’abana be uko ari 8 zikamurohora, none kuri ubu ngo zamutuje mu nzu nziza, mu mudugudu wa Kabyaza, uri muri aka karere.

Ubwo Mukanoheri yaganiraga n’Imvaho Nshya, yatangaje ubuzima bubi yabagamo mu gishanga cya Karago mbere y’uko yimurirwa muri uyu mudugudu.

Yagize ati “Ubu ndi umuntu ubarizwa mu cyiciro cya mbere cy’budehe, ibi ni byo byatumye mara imyaka myinshi ntabasha kwikura mu manegeka, kuko n’ubuyobozi bwahoraga bubinsaba ariko nkabura uburyo.

PNG - 1.1 Mb
Mukanoheri avuga ko yahinduye ubuzima abikesha ingabo z’igihugu (Foto Ngaboyabahizi P)

Ariko hari ijoro ntazibagirwa mu buzima bwanjye, ni iryo ku wa 13 Werurwe 2012, aha imvura y’amahindu yaraguye maze njye n’abana banjye uko ari 8, amazi atwuzurana mu nzu kandi hari mu gihe cya saa tanu z’ijoro natekerezaga ko abana banjye bose bapfuye, ingabo za marine n’amato yazo ni zo zaje kunkuramo na Polisi.

Gusa byageze saa mbiri za mu gitondo babuze uko bagera aho nari ndi, baje kunkuramo njye n’abana ariko tukiri bazima, ndashimira ingabo z’u Rwanda kuko twari tuzi ko zibereyeho kujya ku rugamba gusa, ariko noneho njye niboneye ko ziyemeje kurwana intambara yose aho yava igamije kwangiza u Rwanda n’abarutuye.”

Akomeza avuga ko ngo nyuma yo kurokoka yakodesherejwe n’akarere ka Nyabihu aho kuba arambitse umusaya n’abana be umunani kugeza ubwo muri Kanama 2016, we na bagenzi be bari batuye mu manegeka baje gutuzwa mu mudugudu w’ikitegerezo wa Kabyaza.

Arashimira ubuyobozi bwiza kuko ngo mu buzima bwe ntiyari azi ko yakubakirwa inzu, ngo ijyemo amashanyarazi ndetse n’umugezi mu rugo rwe.

Umuyobozi w’akarere ka Nyabihu Uwanzwenuwe Theoneste, na we ashimangira ko uyu mugore yari atuye nabi, ubu akaba yaratujwe ahadashyira mu kaga ubuzima bwe.

Yagize ati “Mukanoheli koko yari umwe mu baturage bahangayikishije ubuyobozi urebye inzu yabagamo n’aho yari atuye, ariko ku bufatanye bw’ingabo z’u Rwanda na Minisiteri y’umutungo kamere na Minisiteri ishinzwe gucyura impunzi no gukumira ibiza, na we yaje kubakirwa inzu mu mudugudu wa Kabyaza ugizwe n’imiryango 200 na yo yari ibayeho mu manegeka.

Ndasaba rero buri wese wo muri aka karere wumva akinangiye agatura mu manegeka, aho bamwe usanga bavuga ngo ntibava kuri gakondo, ko bakwiye kubizibukira, nongera kandi kwibutsa bariya bose bagenda bakurwa mu manegeka gufata neza amazu bubakiwe, bazirikana kandi ko biriya inkomoko yabyo ari uko igihugu gifite amahoro n’umutekano, nibabungabunge rero ibimaze kugerwaho n’ubuyobozi bwiza bw’u Rwanda”.

Uwo Mudugudu wa Kabyaza wuzuye utwaye amafaranga y’u Rwanda miliyari imwe na miliyoni magana atandatu na mirongo inani n’enye (1,684,000,000).

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE