2017-10-17 06:58:11 clouds 27o High | Kigali Rwanda

Dukurikire:
 
 

Ngoma:Amasibo yitezweho kuzamura ubwitabire mu kwishyura umusanzu wa mituweli

Yanditswe na IMVAHO NSHYA

Kuya 2017-05-11 12:54:54

 
Share on:
 
Yasuwe:92
 
Yavuzweho:200
 
10
 
10

Ubuyobozi bw’akarere ka Ngoma, mu ntara y’Uburasirazuba buvuga ko bufite icyizere ko mu mwaka utaha wa 2017/2018, ubwitabire bw’abaturage mu gutanga umusanzu w’ubwisungane mu kwivuza buzaba bwiza, bitewe n’uburyo bushya abaturage bakoreramo bw’amasibo.

Amasibo ni amatsinda abaturage bashyizwemo mu karere ka Ngoma. Ahenshi isibo iba igizwe n’ingo zibarizwa gahati ya 15 na 25, zegeranye mu mudugudu.

Binyuze muri aya masibo abaturage bafashanya mu bikorwa bitandukanye nko kubakirana inzu, ubujyanama, ubukanguramba, kwicungira umutekano no gukeburana mu buryo butandukanye.

JPEG - 172.3 kb
Rwiririza Jean Marie Vianney (uhagaze)avuga ko amasibo azazamura ubwitabire bwa Mituweli (Foto Manishimwe N)

Umuyobozi w’akarere ka Ngoma ushinzwe ubukungu, Rwiririza Jean Marie Vianney, avuga ko umwe mu musaruro witezwe muri iyi gahunda ari ukuzamura ubwitabire bw’abatanga umusanzu w’ubwisungane mu kwivuza, Mituweli, kuko abaturage ubwabo bagenzurana bakamenya uwamaze gutanga Mituweli, n’abatawutanga, kandi bakagirana inama.

Mwongera Oreste, Umuyobozi w’umudugudu wa Dufatanye, mu murenge wa Jarama, atorezwa mu isibo y’Umurava, avuga ko biyemeje ko binyuze mu masibo yabo, umuhigo wa Mituweli mu mwaka utaha bazawesa.

Yagize ati “Amasibo ari gukora neza, kandi mu bigendanye na Mituweli ubona ko abaturage babaye intore kandi buri wese agenda asobanukirwa ko ubuzima ari bwo bufite agaciro gakomeye.

Binyuze mu bimina rero bigaragara ko buri wese yiteguye gutanga Mituweli. Hari n’abamaze kuyitangira abo mu miryango yabo. Dushimira n’akarere kadushyiriyeho amasibo karatworohereje cyane kuko duhanahana amakuru, tukamenya utari gutanga Mituweli, tukagenda tukamuganiriza.”

Rwiririza Jean Marie Vianney, Umuyobozi w’akarere ka Ngoma ushinzwe ubukungu, avuga ko akarere kizeye ko ubwitabire bw’abagatuye mu gutanga Mituweli bizazamuka ku buryo bufatika mu mwaka utaha.

Avuga ko nubwo kuri ubu akarere ka Ngoma kari ku bwitabire bungana na 83% mu gutanga Mituweli, gahunda y’amasibo yashyizweho muri uyu mwaka wa 2016/2017, izatangira gutanga umusaruro mwiza mu mwaka utaha.

Asaba abayobozi ubufatanye mu kuba hafi y’abaturage no kubashishikariza gutanga umusanzu wa Mituweli, ku buryo nta muturage n’umwe uzasigara adafite ubu bwisungane.

Yagize ati “Mu isibo mwegere abaturage, umunsi ku munsi urebe uko abaturage uyobora bari kwitabira ubwisungane mu kwivuza, kandi ubitangire hakiri kare. Umenye abihuta, abanyantege nke, ndetse n’utabyumva, ugerageze kubimwumvisha.”

Akomeza agira ati “Wowe muyobozi sura amasibo, urebe ko abayagize bari mu kimina, urebe uko batanga imisanzu yabo ya Mituweli.

Ingingo ya mbere mu gihe murangije ibikorwa byo mu masibo, ibe aho tugeze dutanga ubwisangane mu kwivuza. Nibikorwa neza rwose, twizeye ko amasibo azazamura ku buryo bugaragara ubwitabire mu gutanga Mituweli.”

Akarere ka Ngoma kihaye intego yuko uyu mwaka wa 2016-2017 usigaje amezi atagera kuri 2 ngo urangire, wazasiga ubwitabire mu gutanga Mituweli bugeze nibura kuri 85%, naho umwaka utaha wa 2017/2018 bukagera kuri 95%.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE