2017-10-17 06:58:11 clouds 27o High | Kigali Rwanda

Dukurikire:
 
 

Kayonza: Abapfakazi ba Jenoside bagiye korozwa inka

Yanditswe na IMVAHO NSHYA

Kuya 2017-05-06 09:42:00

 
Share on:
 
Yasuwe:38
 
Yavuzweho:200
 
10
 
10

Mu bikorwa bitandukanye bigamije gufasha no kuremera abasizwe iheruheru na Jenoside yakorewe Abatutsi mu 1994, abapfakazi batatu batuye mu mudugudu wa Rwakigeri, Akagari ka Cyinzovu, Umurenge wa Kabarondo mu karere ka Kayonza, Intara y’iburasirazuba, bijejwe n’Umuryango utegamiye kuri Leta « Send a Cow » ko bagiye korozwa inka mu minsi mike iri imbere.

Ni mu gikorwa cy’umuganda wabaye ku wa Gatanu tariki 5 Gicurasi 2017, aho abayobozi n’abakozi b’uyu muryango wa Send a Cow bafatanyije n’abafatanyabikorwa baturutse muri Sosiyete ya “Starbucks” babubakiye ibiraro bya kijyambere bizororerwamo izi nka.

Umuyobozi wa Send a Cow mu Rwanda, Nsengiyumva André, avuga ko bateguye iki gikorwa bafatanyije na sosiyete ya Starbucks, bagamije gufasha abantu bafite ibibazo by’ubukene kuzamura ubukungu bwabo cyane cyane abatishoboye, by’umwihariko abasizwe iheruheru na Jenoside.

Yagize ati “Muri iyi minsi ijana turimo yo kwibuka abazize Jenoside yakorewe Abatutsi mu 1994, twatekereje ko iki gikorwa twagikora muri iki gihe. Mu guhitamo twahisemo abantu barokotse Jenoside yakorewe Abatutsi bafite ibibazo byo kutabasha kuzamura ubukungu bwabo. Twaje rero kubafasha ngo tubatere inkunga, kandi twahisemo kuza kubikorera mu karere ka Kayonza aho Send a Cow isanzwe ihafite ibindi bikorwa bitandukanye. ”

Nsengiyumva yemeza ko nyuma yo kububakira ibi biraro mu minsi mike bazabona inka. Yagize ati “Uyu munsi twarimo tububakira ibiraro, iyo ibiraro bihari n’inka ziba ziri mu nzira. Mu minsi mike hagati y’iby’umweru bibiri cyangwa mu kwezi zizaba zabonetse, kuri ubu igikorwa cyo kuzishakisha cyamaze gutangira.”

Uretse iki gikorwa cyo koroza aba bapfakazi uko ari batatu ari bo Uwamwezi Beatha, Murekatete Gerardine na Muteteri Savera, uyu mushinga wabubakiye uturima tw’igikoni tuzabafasha kubona imboga ndetse bashyikirijwe n’ibigega by’amazi.

JPEG - 133.4 kb
Abakozi ba Send a Cow bafatanyije n’abaturutse muri Starbucks bahinga uturima tw’igikoni

Umunyamabanga Nshingwabikorwa w’Akagari ka Cyinzovu, Umugwaneza Sandrine, yavuze ko iki gikorwa ari icy’ingirakamaro cyane, ko muri aka kagari basanzwe bafite abantu batishoboye, yemeza ko aba bagenerwabikorwa bizabafasha mu kwiteza imbere bikanabakura mu bwigunge.

Yagize ati “Kubona abantu baza gufasha abatishoboye byongeyeho ko ari abarokotse Jenoside, ari abapfakazi nta miryango bafite, ikigaragara ni ikintu babongereyeho gikomeye kuko nabo bagiye kuva mu bwigunge.”

Yakomeje avuga ko ibi bigega by’amazi bahawe bizabafasha gukemura ikibazo cy’amazi gisanzwe kigaragara aho byabasabaga kujya kuyakura kure, anemeza y’uko n’izo nka bagiye korozwa zizajya zibona amazi yo kunywa mu buryo buboroheye.

Muteteri Savera w’imyaka 54 y’amavuko, afite abana batanu, akaba ari umwe mu bazorozwa inka, avuga ko inka izamufasha kuzamura umusaruro ndetse akarushaho kwiteza imbere, bikaba bimuha n’icyizere cy’ubuzima bwiza mu minsi iri imbere.

Yagize ati “Iyo ufite inka ubona ifumbire, ukagira umusaruro uhagije kandi iyo ikunze ikagira umukamo iguha n’amafaranga ukikenura ukaba wabasha no kubaka iyindi nzu biturutse kuri iyi nka. Izangirira akamaro, izamvana mu cyiciro cyo hasi cyo kwitwa umukene nanjye nkumva ko nta kwiheba mfite ahubwo nzageza mu myaka 80 mfite ubuzima bwiza.”

Uyu muryango wa Send a Cow watangiye ibi bikorwa mu Murenge wa Kabarondo myaka itatu ishize, ukaba usanzwe ufasha Abanyarwanda mu kwivana mu bukene hibandwa bijyanye n’ubuhinzi n’ubworozi bukozwe neza. Barateganya kandi ko bafatanyije na Sosiyete ya Starbucks isanzwe itunganya ikawa, muri Send a Cow bazatangira undi mushinga mushya muri Nyakanga 2017, uzibanda cyane cyane mu gufasha abasanzwe bahinga ikawa kuva mu bukene.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE